اسلام آباد: لائن آف کنٹرول کے دونوں جانب سے جاری ہونے والی کشمیری اخباروں نے ’’ایک دوسرے کے مسائل سمجھنے کے لئے‘‘ انٹرنیٹ کے ذریعے خبروں کے تبادلے کا فیصلہ کرلیا۔
تفصیلات کے مطابق خبروں کے تبادلے کے پہلے مرحلے میں 12 اخبارات انٹرنیٹ کے ذریعے خبروں کا تبادلہ کریں گے اوربعد ازاں اس سلسلے میں ایک مفاہمتی یادداشت پر بھی دستخط کئے جائیں گے۔ فیصلہ کیا گیا ہے کہ ابتدائی طور پر صرف سیاسی خبروں کا تبادلہ کیا جائے گا۔
سری نگر سے تعلق رکھنے والے اخبار’رائزنگ کشمیر‘ کئ ایڈیٹرشجاعت بخاری کا کہنا ہے کہ یہ فیصلہ اسلام آباد میں ہونے والی میٹنگ میں کیا گیا ہے جس میں 29 صحافی اور اخبار مالکان شریک تھے۔ انہوں مزید کہا کہ اس سلسلے میں ایک نیوز پول بھی تشکیل دیا جائے گا جہاں سے خبری مواد تک مشترکہ طور پر رسائی حاصل کی جاسکے گی۔
آزاد کشمیر سے صحافتی فورم کے صدر اعجاز عباسی کا کہنا تھا کہ 70 سالوں میں یہ پہلا موقع ہے کہ جموں اور کشمیر کے صحافی اس سطح پرمعلومات کا تبادلہ کرسکیں گے۔ اس سے معلومات تک براہ راست رسائی میں مدد ملے گی۔
