لندن: وزیرِاعظم نواز شریف کا کہنا ہے کہ دھرنے والے دھرنا دے رہے ہیں، ہم اپنا کام کررہے ہیں۔
وزیرِاعظم نواز شریف نے لندن میں میٖڈیا سے بات کرتے ہوئے کہا ہے کہ پاکستان میں موجود جمہوری ادارے مثبت کردار ادا کر رہے ہیں، پوری پارلیمنٹ ایک طرف ہے ۔۔۔۔قوم اور چند لوگ ایک طرف ہیں۔
وزیرِاعظم نواز شریف نے اس بار کی بھی یقین دہانی کر وائی کہ موجودہ نظام میں موجود خرابیوں کو ضرور ٹھیک کریں گے، نواز شریف کا مزید کہنا تھا کہ جنرل اسمبلی میں پاکستانی عوام کے جذبات کی ترجمانی کی ہے۔
اسلام آباد: عمران خان نے کہا کہ جنرل جیلانی اورضیاءکی نرسری میں نہیں پلابڑھا نوازشریف ابھی استعفیٰ نہ دیں،تحریک گھر گھر پہنچادونگا۔
لاہور میں جلسہ عام سے خطاب کے دوران عمران خان نےکہاکہ برطانیہ میں دیکھا کہ جب بھی کوئی ناانصافی ہوتی تو عوام کھڑے ہوجاتے تھے، انہوں نے پاکستان کو عروج سے زوال کی جانب جاتے ہوئے دیکھا ہے، حکمران آتے گئے اور اپنی باریاں لیتے رہے، 18 سال سے وہ کہتے تھے کہ نواز شریف اور آصف زرداری بھائی بھائی ہیں لیکن قوم سوئی ہوئی تھی۔ 2 خاندانوں کے اربوں ڈالر بیرون ملک ہیں۔ نواز شریف کا بیٹا لندن میں 800 کروڑ روپے کے فلیٹ میں رہتا ہے، ان کی 18 برس کی جدو جہد ایک جانب اور کنٹینر میں گزارے 45 ایک جانب ہے، وہ اللہ تعالٰی کے شکر گزار ہیں کہ قوم اب جاگ گئی ہے، حمزہ شہباز سے لاہور اور نواز شریف کے ساتھ نیو یارک میں جو ہوا اس سے انہیں خوشی ہوئی۔
عمران خان کا کہنا تھا کہ عظیم قوم بننے کیلئے ہمیں خود کو بدلنا ہوگا، سچ بولنا ہوگا، سچ ايک چھوٹے انسان کو بڑا بناديتا ہے، بزدل انسان کبھی بڑے کام نہيں کرسکتا، جمعرات کو میانوالی اور اس کے بعد ملتان میں جلسہ کریں گے۔
عمران خان نے کہا کہ دھاندلی کو اب الیکشن کمیشن نے بھی تسلیم کر لیا ہے۔ الیکشن کمیشن کی رپورٹ عوام کے دبائو کی وجہ سے سامنے لائی گئی ہے جس میں واضع طور پر کہا گیا ہے کہ آخری وقت میں پولنگ سٹیشن بدل دیے گئے تھے۔ تحریک انصاف کی سونامی کو دیکھ کر الیکشن سے دو دن قبل جعلی بیلٹ پیپر چھپوائے گئے۔
ان کا کہنا تھا کہ الیکشن کمیشن نے ابھی تک فارم 14 کو ویب سائٹ پر نہیں ڈالا کیونکہ اسے ویب سائٹ پر ڈالنے سے ریٹرننگ افسران پکڑے جائیں گے، ان ریٹرننگ افسران کو پاکستان کا میر جعفر افتخار چودھری کنٹرول کر رہا تھا، نواز شریف نے اپنی تقریر میں ریٹرننگ افسران سے کہا کہ مجھے اکثریت دلوائو۔ نواز شریف کی تقریر کے بعد یو این ڈی پی کے سسٹم کو جان بوجھ کر بند کر دیا گیا تھا۔
چیئرمین تحریک انصاف نے کہا کہ میں نے کسی کے کاندھوں پر بیٹھ کر سیاست نہیں کی، میں جنرل جیلانی کی نرسری اور ضیاء الحق کی گود میں بیٹھ کر پروان نہیں چڑھا اور نہ ہی آئی ایس آئی سے کوئی رقم وصول کی، پاکستان تحریک انصاف کے چیئرمین عمران خان نے کہا کہ ایک وقت آئے گا کہ وزیراعظم کے گھر سے بھی ”گو نواز گو” کے نعرے گونجیں گے، جب تک مجھے انصاف نہیں ملے گا نواز شریف حکومت نہیں کر سکیں گے، خطاب کے آخر میں عمران خان نےجمعرات کومیانوالی میں جلسےکااعلان بھی کیا۔
لاہور: شیخ رشید نے کہا کہ زندگی کی آخری تحریک میں حصہ لے رہا ہوں، چوروں کے بجائے چوکیداروں کو آگے آنا ہوگا۔
لاہور میں مینار پاکستان پر پی ٹی آئی کے جلسہ عام سے خطاب کرتے ہوئے پاکستان عوامی مسلم لیگ کے سربراہ شیخ رشید احمد نے کہا کہ اس حکومت کا جا ناطے ہو چکا ہے، میں نے بڑی عید سے پہلے قربانی کی بات کی تھی مگر لگتا ہے نواز شریف کو سنت ابراہیمی پسند نہیں ، ان کو رخصت کرنے کے لئے’جھٹکے‘ کی ضرورت ہو گی۔
پاکستان عوامی مسلم لیگ کے سربراہ شیخ رشید احمد نے کہا کہ نواز شریف جو کل لاہور میں حمزہ شہباز کا حال ہوا تھا تمھار ا بھی وہی ہو گا، ’گو نواز گو‘ تمہارا مقدر بن چکاہے،کل آصف زرداری نے کہا کہ عمران خان نا تجربہ کار ہیں ،ہاں عمران خان ناتجربہ کار ہیں کیونکہ ان کو کمیشن لینا نہیں آتی اور یہ چوری بھی نہیں کر سکتا۔ نواز شریف کوکہنا چاہتاہوں کہ ٹی پر دیکھ لیں پورا لاہور نکل آیا ہے اب خود ہی استعفیٰ دے دیں تو بہتر ہو گا۔
لاہور: وزیراعلی شہباز شریف نے کہا ہے کہ انقلاب لانے والے یاد رکھیں کہ یہ ملک دو طبقات میں تقسیم ہو چکا ہے اور اگر وسائل سے محروم طبقہ باہر نکل آیا تو نہ جاتی عمرہ رہے گا اور نہ ہی بنی گالہ بچے گا۔
وزیراعلی ہاوس میں لیڈی ہیلتھ وزیٹرز ، ورکرز اور الائیڈ سٹاف کو مستقل کرنے کی تقریب سے خطاب کرتے ہوئے وزیراعلی شہباز شریف نے کہا کہ ملک میں بحران پیدا کرنے والے عوام کی حالت پر رحم کھائیں ،انہوں نے معیشت کو ناقابل تلافی نقصان پہنچایا ہے، ان کا کہنا تھا کہ پاکستان محروم اور وسائل رکھنے والے طبقات میں تقسیم ہو چکا ہے، وسائل رکھنے والے محروم لوگوں سے ہاتھ ملانا پسند نہیں کرتے ۔
انہوں نے انقلاب کی بات کرنے والوں پر واضح کیا کہ اگر وسائل نہ رکھنے والے باہر نکل آئے تو ملک میں کچھ نہیں بچے گا، وزیراعلی نے کہا کہ اپوزیشن والے قوم کی حالت پر رحم کھاتے ہوئے ہوش کے ناخن لیں، وزیراعلی نے کہا کہ شعبہ صحت سے تعلق رکھنے والے باون ہزار ملازمین کو مستقل کرنے میں اگرچہ تاخیر ہوئی مگر انہیں انکا حق مکمل طور پر ملے گا۔
لاہور: تحریک انصاف چیئرمین عمران خان جلسہ گاہ پہنچ گئے،کارکنوں نے اپنےقائدکاپرتپاک استقبال کیا۔
پاکستان تحریک انصاف کے سربراہ عمران خان مینار پاکستان پر تحریک انصاف کے جلسہ گاہ میں پہنچ گئے ہیں، اس موقع پر ہزاروں کارکن کپتان کی آمد کے منتظر تھے اور مسلسل ’گو نواز گو‘ کے نعرے بلند کر رہے ہیں۔
عمران خان نے اسٹیج پرکھڑے ہوکر کارکنوں کو ہاتھ ہلا کر ان کے نعروں کا جواب بھی دیا، انہوں نے میڈیا سے مختصر بات چیت میں کہا کہ اللہ جس کو چاہتا ہے عزت دیتا ہے، لاہور نے اپنا فیصلہ دے دیا ہے اور اس عوامی ریفرنڈم میں عوام نے حکومت کے خلاف ووٹ دے دیا ہے۔
اس سے قبل عمران خان کو اسٹیج تک پہنچے کے لئے بھی کافی مشکلات کا سامنا کرنا پڑا کیونکہ کارکنوں کی ایک بڑی تعداد ان کو دیکھنے کے لئے اسٹیج کے قریب پہنچ گئی تھی، اس موقع پر پاکستان تحریک انصاف کے تمام مرکزی رہنماءبھی ان کے ہمراءتھے۔
لاہور : مینار پاکستان گراؤنڈ میں آج ہونے والے تحریک انصاف کے جلسے کی تیاریاں آخری مراحل میں داخل ہوگئیں۔ اسٹیج تیار کرلیا گیا۔ شرکا کیلئے پچاس ہزار کرسیاں لگائی گئیں ہیں۔ تحریک انصاف آج لاہور میں عوامی طاقت کا مظاہرہ کرے گی۔
جلسہ گاہ کی سکیورٹی کیلئے اسی کنٹینرز بھی لگائے گئے ہیں، جلسہ گاہ میں داخلے کیلئے پانچ پوائنٹس رکھے گئے ہیں، ایک راستہ تحریک انصاف کے سربراہ عمران خان اور وی آئی پیز جبکہ ایک خواتین کیلئے مختص کیا گیا ہے۔
ضلعی انتظامیہ نے اسٹیج، پنڈال اور داخلی راستوں پر پچاس سے زائد سی سی ٹی وی کیمرے نصب کیے ہیں،جلسے کی سیکورٹی کیلئے تین ہزار پولیس اہلکار فرائض انجام دے رہے ہیں۔ تین ایس پیز پچاس ایس ایچ اوز اور ڈی ایس پیز جلسہ گاہ کے اطراف موجود ہونگے۔
گزشتہ روز لاہور میں تحریک انصاف کے کارکنان کی بڑی تعداد نے جلسے کے سلسلے میں لبرٹی چوک سے مینار پاکستان تک ریلی نکالی، ریلی میں شریک خواتین اور بچوں کا جوش و جذبہ دیدنی تھا۔ انہوں نےپارٹی پرچم لہراتے ہوئے گو نواز گو کے نعرے لگائے۔
اسلام آباد: عمران خان کا کہنا ہے کہ شہر شہر جلسے کرکے حکومت پر محمود غزنوی کی طرح حملے کروں گا، نوازشریف جھوٹ بولنے کے جرم میں عدالت بلالئے گئے ہیں۔
وفاقی دارالحکومت میں آزادی مارچ کے دھرنے میں شریک لوگوں سے خطاب کرتے ہوئے کہا کہ ملک کو اردو میڈیم، انگلش میڈیم اور مدرسہ میڈیم میں تقسیم کیا گیا، ہم سب کے لئے ایک تعلیمی نظام لائیں گے۔
انہوں کے کہا کہ بچوں کی تحریک ِ انصاف بنائی جائے گی جس کا منشور وہ خود لکھیں گے۔
انہوں نے اللہ کا شکر ادا کرتےہوئے نوجوانوں سے کہا کہ ان کے دھرنے کی وجہ سے نواز شریف جھوٹ بولنے کے جرم میں عدالت میں بلالئے گئے ہیں۔
انہوں نے یہ بھی کہاکہ نواز اور شہباز کے ساتھ گلوبٹ جو آئی جی بنا پھرتاہے اس کو بھی انصاف کے کٹہرے میں لائیں گے۔
ان کا یہ بھی کہنا تھا کہ نادرا کے سابق چیئرمین طارق ملک نے ٹی وی پروگرام میں انکشاف کیا کہ دھاندلی چھپانے کے لئے انہیں ڈرایا گیا، ملک سے بھگایاگیااوران کی بیٹی کو دھمکیاں دیں۔ آخر مسلم لیگ ن نے ایسا کیوں کئے،صرف اورصرف دھاندلی چھپانے کے لئے۔
عمران خان کے مطابق طارق ملک نے یہ بھی کہا کہ عوام کے اربوں روپے خرچ کئے گئے لیکن نہ ہی مقناطیسی سیاہی استعمال کی گئی اورنہ ہی وہ کاغذ استعمال کیا گیا جس کا کہا گیا تھا۔
عمران خان کا کہنا تھا کہ وہ شہرشہر جلسے کرکے محمود غزنوی کی طرح حکومت پرحملے کریں گے تاکہ پوراملک جاگ جائے اور ساتھ ہی ساتھ اسلام آباد میں بھی نواز شریف کے استعفے تک دھرناجاری رکھیں گے۔
انہوں وزیر ِاعظم کو چیلنج کرتے ہوئے کہا کہ مسلم لیگ ن ان کے بعد مینارِ پاکستان میں جلسہ کر کے دکھائیں سب کوپتہ چل جائے گا کہ لاہور کس کا ہے۔
ٹنڈومحمد خان : امیرجماعتِ اسلامی سراج الحق نے سیاسی بحران کے حل نہ کرنے کا اعتراف کرلیا ہے۔
سراج الحق نے کہا ہے کہ دھرنے کے رہنماؤں نے مزید جذبات کا مظاہرہ کیا تو آئین اور جمہوریت ختم ہو جائے گی۔
ٹنڈو محمد خان کے ایوبیہ اسٹاپ پر جلسے سے خطاب میں سراج الحق کا کہنا تھا کہ بلدیاتی الیکشن وقت کی اہم ضرورت ہے، سندھ کی تقسیم کا مطالبہ کر نے والےعوام کو آپس میں لڑانا چاہتے ہیں۔
سراج الحق نےکہا ہے کہ وزیراعظم سے اپیل ہے کہ وہ ڈاکٹرعافیہ کو بھی اپنے ہمراہ لائیں، انہوں نے کہا ہے کہ ہم پاکستان میں خلافتِ راشدہ کا نظام چاہتے ہیں، سراج الحق نے تیئس نومبر سے مینارِ پاکستان سے چترال تک پاکستان تحریک شروع کرنے کا اعلان بھی کیا ہے۔
اسلام آباد: عمران خان نے کہا ہے کہ نواز شریف ایک نظام کا نام ہے اوروہ نظام میثاقِ جمہورت معاہدہ تھا۔
اسلام آباد میں آزادی دھرنے سے خطاب کے دوران پاکستان تحریک انصاف کے چیئرمین عمران خان کا کہناتھا کہ آج بتانا چاہتا ہوں کہ ہم کیوں نکلے ہیں تاکہ ذہنوں میں کوئی ابہام نہ رہے، پاکستان میں انسانوں کے حقوق ایسے ہیں جیسے دوسرے ممالک میں جانوروں کی حقوق ہوتے ہیں ۔
انہوں نے کہا کہ نواز شریف ایک نظام کا نام ہے اوروہ نظام میثاقِ جمہورت معاہدہ تھا، جو پیپلز پارٹی اور مسلم لیگ ن کے درمیان ہوا تھا، ہم اس نطام کے خلاف نکلے ہیں، ہم اسمبلی میں بیٹھ کر ان سے نہیں لڑسکتے تھے۔
عمران خان نے کہا کہ ان حکمرانوں نے اخبارخریدا ہوا ہے، ججج کو خریدے ہوئے ہیں، پی ٹی وی کو ان کا اپنا ہے ہے،ان کا مقابلہ صرف عوام کرسکتی ہے، چوالیس دن میں مجھے سب سے زیادہ خوشی ملی ہے کیونکہ عوام جاگ اٹھی ہے جس پر میں نفل ادا کروں گا۔
انہوں نے کہا کہ جب زرداری حکومت آئی تھی تو ہر پاکستانی 35 ہزار کا مقرض تھا جب وہ گیا تو 70 ہراز کا ہر پاکستانی مقروض تھا،پچھلے ڈیرھ سال میں ہر پاکستانی 85 ہزار کا مقروض ہوگیا ہے۔ جتنے ٹیکس لگتے ہیں اس کا 60فیصد قرضوں میں جاتا ہے 25 فوج کو جاتا ہے ، 15 فیصد عوام کے لئے رکھا جاتا ہے، حکمران کو عوام کی فکر نہیں ہے، اگر اللہ نے مجھے موقع دیا تو جب تک عوام کا قرضہ نہ پورا کرتا میں باہر نہیں جاوں گا، امام خمینی کبھی اپنے ملک سے باہر نہیں گئے
عمران خان کا کہنا تھا کہ ایک چیز آپ نے اپنے کپتان سے سیکھنی ہےکہ کوئی چیز نا ممکن نہیں ہے ، جب میں سیاست میں آیا سب نے کہا کہ بے وقوف ہے، جب نئے پاکستان کی بات کی تو لوگ کہتے ہیں نیا پاکستان ممکن نہیں ہے، ایک آدمی جب تک ہار نہیں مانتا ہار اس کو ہرا نہیں سکتی ، میں بڑے بڑے مگرمچھوں کو پکڑوں گا ایک ایک کو سزا دلاوں گا ، میں 200ارب ڈالر واپس پاکستان لاوں گا، میاں صحاب سرمایہ کاری کے لئے باہر جاتے ہیں، میاں صحاب پہلے اپنا پیسہ تو باہر سے واپس لائیں۔
کپتان نے کہا کہ ہم اس دلدل سے نکلے گئے اپنا عدل وانصاف کا نظام لائیں گئ، قائد اعظم اس ملک میں عدل وانصاف چاہتے تھے، ہم پولیس کے نظام کو بہتر بنائیں گے، ’حضرت علی نے اپنے خط میں لکھا تھا کہ جج کی تنخوا اتنی ہو کہ اسے رشوت نہیں پڑی‘، انہوں نے کہا کہ آپ کی طاقت بیرون ملک پاکستانی ہے، ہم اس ملک کا گورںر سسٹم ٹھیک کر کے دیکھائیں گے، نئے پاکستان میں سب سے زیادہ تعلیم پر پیسہ خرچ کرنا ہے۔
عمران نے خطاب کے آخر میں نوجوانوں سے کہا کہ ہم نے چار باتیں یاد رکھنی ہیں۔
ہم نے سچ بولنا ہے کیونکہ سچ انسان کی عزت کرواتا ہے ۔
ہم نے خوف کی زنجیروں کو توڑنا ہے ۔
ہمیں اپنی ’میں‘ پر قابو پانا ہے
ہمیں سچ کو سچ اور جھوٹ کو جھوٹ کہنا ہے۔
اسلام آباد: پاکستان تحریک انصاف کے ترجمان کا کہنا ہے کہ پولیس نے پارٹی چیئرمین عمران خان کی کتاب میں اور میرا پاکستان کی 4ہزار کاپیاں قبضے میں لے کر گاڑی سمیت تھانے میں منتقل کر دی ہیں۔
یہ کتابیں آزادی مارچ کے دھرنے میں شامل لوگوں میں تقسیم کرنے کے لئے لائی جا رہی تھیں تاہم پولیس نے ڈی چوک کے قریب پہنچنے پر تلاشی کے نام پر روکا اور کتابوں کو قبضے میں لے لیا ہے۔
ان کا کہنا تھا کہ یہ کتابیں عمران خان کی ہدایت پر لائی جارہی تھیں تا کہ شرکاءان کے خیالات اور نظریات سے مکمل آگاہی حاصل کر سکیں۔