Tag: azadi march

مولانا کے مطالبات ، حکومتی مذاکرتی کمیٹی کا اپوزیشن سے رابطہ

اسلام آباد : حکومتی مذاکراتی کمیٹی نے اپوزیشن سے رابطہ کرکے ملاقات کے لیے وقت مانگ لیا اور کہا جمہوری لوگ ہیں جمہوری طریقے سے مسئلے کا حل چاہتے ہیں۔

تفصیلات کے مطابق جے یو آئی ف کے سربراہ مولانا فضل الرحمان کے مطالبات سامنے آنے کے بعد حکومتی مذاکراتی کمیٹی نے اپوزیشن سے رابطہ کیا ، چیئرمین سینیٹ صادق سنجرانی نے رہنماپیپلزپارٹی نیر بخاری کو فون کرکے اپوزیشن کی رہبرکمیٹی سے ملاقات کےلیےوقت مانگ لیا۔

صادق سنجرانی نے کہا مارچ کے معاملے پر بات چیت کرنا چاہتے ہیں ، جمہوری لوگ ہیں جمہوری طریقے سے مسئلے کا حل چاہتے ہیں ، ہر مسئلہ بات چیت کے ذریعے حل کیا جاسکتا ہے۔

اسپیکر قومی اسمبلی اسدقیصر نے بھی شہبازشریف اور میاں افتخار سے رابطہ کیا۔

یاد رہے گذشتہ روز مولانا کے مارچ پر حکومتی مذاکراتی کمیٹی کا اجلاس ہوا تھا ، اجلاس میں وزیراعظم عمران خان سے رابطہ کرکے پرویزخٹک نے مولانا کے مطالبات سے آگاہ کیا تھا۔

حکومت کی مذاکراتی کمیٹی نے مولانا فضل الرحمان سے رابطہ کرنے کا فیصلہ کیا، جس کے تحت کمیٹی کے سربراہ پرویز خٹک جمیعت علماء اسلام ف کے سربراہ سے رابطہ کریں گے، ذرائع کے مطابق حکومتی مذاکراتی ٹیم فضل الرحمان سے ملاقات کاوقت مانگے گی۔

مزید پڑھیں : حکومت کا مولانا فضل الرحمان سے پھر رابطے کا فیصلہ

حکومتی مذاکراتی کمیٹی کے رکن نورالحق قادری کا کہنا تھا کہ فضل الرحمان اوررہبرکمیٹی کو معاہدے پر قائم رہنے کیلئے قائل کریں گے، کوشش ہے ایسی صورتحال پیدا نہ ہو جو مشکلات کاباعث بنے، حالات دو دن بعد ان کے قابو میں نہ ہوئے تو ہمارے بھی قابومیں نہ ہوں گے، نقصان جو بھی ہوگا اس کی ذمہ داری رہبر کمیٹی پر عائد ہوگی۔

ان کا کہنا تھا کوشش ہو گی رہبر کمیٹی کی وساطت سےمولاناتک رسائی حاصل کریں،عوام کے دینی اور روحانی جذبات سے نہ کھیلا جائے، عمران خان پر بے ہودہ الزام لگانا علما اکرام کو زیب نہیں دیتا۔

نومبر 2, 2019
مولانا فضل الرحمان کی ساری سیاست ان کے مفادات کے گرد گھومتی ہے، مراد سعید

اسلام آباد : وزیر مواصلات مراد سعید نے کہا ہے کہ گاؤں کے سارے چور جب مل جائیں تو سمجھو تھانیدار ایماندار آیا ہے، مولانا فضل الرحمان کی ساری سیاست ان کی ذات اور ان کے مفادات کے گرد گھومتی ہے۔

ان خیالات کا اظہار انہوں نے آزادی مارچ پر تبصرہ کرتے ہوئے میڈیا سے گفتگو میں کیا، وزیر مواصلات نے کہا کہ ہمارے احتجاج میں کارکنوں پر تشدد کیا گیا لیکن ہم نے کہیں بھی راستے بلاک نہیں کیے تھے۔

انہوں نے کہا کہ ہم نے ان کے مارچ میں کوئی رکاوٹ نہیں ڈالی۔ان کے ساتھ معاہدہ ہوا تھا کہ کہیں کنٹینرنہیں ہوگا۔ انہوں نے صرف جلسہ کرنے کا کہا تھا۔

مراد سعید نے کہا کہ مولانا فضل الرحمان کی سیاست کبھی عوامی نہیں رہی، مولانا کی ساری سیاست ان کی ذات اور ان کے مفادات کے گرد گھومتی ہے۔

انہوں نے کہا کہ مولانا فضل الرحمان کو کشمیر کمیٹی کی چیئرمین شپ چلے جانے کا دکھ ہے، ان کے جانے کے بعد آج کشمیر کی آواز دنیا تک پہنچی ہے، مولانا نوکری کی تلاش میں زرداری کے فرزند کے پاس بھی گئے تھے مگر کام نہ بنا۔

آزادی مارچ کے حوالے سے انہوں نے کہا کہ گاؤں کے سارے چور جب مل جائیں تو سمجھو تھانیدار ایماندار آیا ہے، یہی حال ان کا ہے۔

وزیر مواصلات نے کہا کہ ان لوگوں کے پاس کوئی بیانیہ ہی نہیں ہے، مولانا فضل الرحمان نے آج تک دھاندلی کیخلاف کسی عدالت میں اپیل نہیں کی۔

نومبر 2, 2019
غیر آئینی طریقے سے کوئی بھی وزیراعظم سے استعفیٰ نہیں لے سکتا، پرویز خٹک

اسلام آباد : وزیر دفاع پرویز خٹک نے کہا ہے کہ آئین کے ماورا کوئی بھی وزیراعظم سے استعفیٰ نہیں لے سکتا، فضل الرحمان اور اپوزیشن جماعتیں افراتفری پھیلانا چاہتی ہیں۔

ان خیالات کا اظہار انہوں نے اسلام آباد میں میڈیا سے گفتگو کرتے ہوئے کیا۔ انہوں نے کہا کہ مذاکرات میں ہمارے ساتھ وزیر اعظم کے استعفیٰ کے حوالے سے کوئی بات نہیں ہوئی تھی.

رہبر کمیٹی کے اراکین نے کہا تھا کہ ہم یہاں آکر بیٹھیں گے جس پر ہم نے انہیں خوش آمدید کہا اور راستے کھولے تھے، ،ہمیں امید ہے کہ مولانا فضل الرحمان اور اپوزیشن جماعتیں یہیں بیٹھے رہیں گے۔

ایک سوال کے جواب میں وزیر دفاع نے کہا کہ ان کے مطالبے جائز ہیں یا ناجائز؟ ان کا حق ہے جو مرضی مطالبے کریں لیکن ایک بات طے ہے کہ آئین کے اندر ہی مطالبہ کیا جا سکتا ہے اور اس پر فیصلہ ہو سکتا ہے۔

ان کا مزید کہنا تھا کہ آئین کے ماورا کوئی بھی وزیراعظم سے استعفیٰ نہیں لے سکتا، اسمبلی میں عدم اعتماد کی تحریک لائی جاسکتی ہے اس کے علاوہ استعفے کا اور کوئی راستہ نہیں ہے۔ اگر وہ غیر آئینی راستہ اختیار کریں گے تو اس کا مطلب ہے کہ وہ ملک میں افراتفری پھیلانا چاہتے ہیں۔

؎وزیردفاع پرویزخٹک نے کہا کہ معاہدے کی خلاف ورزی کوئی بھی کرے قانونی چارہ جوئی ہوگی، معاہدے پر رہبر کمیٹی میں شامل تمام جماعتیں متفق ہوچکی ہیں۔ ہم نے معاہدہ کیا ہے کوئی ڈیل نہیں کرنی اور اس معاہدے کی پاسداری بھی کریں گے۔

نومبر 2, 2019
عمران خان پر بے ہودہ الزام لگانا علما کرام کو زیب نہیں دیتا، نور الحق قادری

اسلام آباد: وفاقی وزیر مذہبی امور نور الحق قادری نے کہا ہے کہ وزیراعظم عمران خان پر بے ہودہ الزام لگانا علما کرام کو زیب نہیں دیتا ہے۔

تفصیلات کے مطابق وفاقی وزیر مذہبی امور اور رکن حکومتی مذاکراتی کمیٹی نور الحق قادری نے کہا ہے کہ وزیراعظم سے آج اہم ملاقات ہوگی جس میں اہم فیصلے کیے جائیں گے۔

نور الحق قادری نے کہا کہ فضل الرحمان، رہبر کمیٹی کو معاہدے پر قائم رہنے کے لیے قائل کریں گے، کوشش ہے ایسی صورت حال پیدا نہ ہو جو مشکلات کا باعث بنے۔

وفاقی وزیر نے کہا کہ حالات دو دن بعد ان کے قابو میں نہ ہوئے تو ہمارے بھی قابو میں نہ ہوں گے، نقصان جو بھی ہوگا اس کی ذمہ داری رہبر کمیٹی پر عائد ہوگی۔

مزید پڑھیں: آزادی مارچ: فضل الرحمان کی تنقید،حکومت کو2 دن کی مہلت

رکن حکومتی کمیٹی نے کہا کہ کوشش ہوگی رہبر کمیٹی کی وساطت سے مولانا تک رسائی حاصل کریں، عوام کے دینی اور روحانی جذبات سے نہ کھیلا جائے۔

نور الحق قادری نے کہا کہ عمران خان نے او آئی سی، اقوام متحدہ پلیٹ فارم پر اسلام کی بے مثال جنگ لڑی ہے، اپوزیشن کو وزیراعظم پر الزام تراشی زیب نہیں دیتی ہے۔

واضح رہے کہ اس سے قبل وزیر برائے مذہبی امور نور الحق قادری نے مولانا فضل الرحمان کے بیان پر ردعمل دیتے ہوئے کہا تھا کہ ناموسِ رسالت ﷺ کے مقدس نام پر لوگوں کو ورغلانا سمجھ سے بالاتر ہے۔

نومبر 2, 2019
مذاکرات کی خواہش کو کمزوری نہ سمجھا جائے، فردوس عاشق اعوان

اسلام آباد : معاون خصوصی برائے اطلاعات فردوس عاشق اعوان نے کہا ہے کہ ہماری مذاکرات کی خواہش کو کمزوری نہ سمجھا جائے، سیاست کے بارہویں کھلاڑی کو بلاول اورشہباز نے اپنا لیڈر مان لیا۔

یہ بات انہوں نے اسلام آباد میں صحافیوں سے گفتگو کرتے ہوئے کہی، انہوں نے کہا کہ وزیراعظم آج بھی مقبول ترین لیڈر ہیں، مولانا فضل الرحمان نے ہر قسم کے وعدوں سے لاتعلقی کا اظہار کیا، ایک عالم دین وعدے سے پیچھے ہٹتا ہے تو ناقابل معافی جرم ہے۔

انہوں نے کہا کہ اپنے ذاتی مفاد کیلئے اسلام کے بنیادی اصولوں کی نفی کی جارہی ہے، ہماری مذاکرات کی خواہش کو کمزوری نہ سمجھا جائے، جس پارلیمنٹ میں مولانا خود ہوں تو حلال ورنہ وہ حرام ہے۔

ان کا کہنا تھا کہ بلاول بھٹو اور شہبازشریف نے مولانا کو اپنا لیڈرتسلیم کرلیا ہے، سیاست کے بارہویں کھلاڑی کو بلاول بھٹو اور شہباز شریف نے اپنا لیڈر مان لیا، ج ان کو مولانا کے دھرنے میں ادھار میں آکر اپنا درد بیان کرنا پڑا، ثابت ہوتا ہے عوام اب ان کی آواز پر لبیک کہنے کو تیار نہیں۔

معاون خصوصی نے کہا کہ عمران خان کے بغض میں یہ سب ایک گھاٹ کا پانی پی رہے ہیں، عمران خان نے پہلی تقریر میں ہی کہہ دیا تھا سب چور ایک جگہ جمع ہوں گے، آج وقت نے ثابت کردیا عمران خان نے درست کہا تھا۔

فردوس عاشق اعوان کا کہنا تھا کہ15سیاسی جماعتیں مل کر بھی لوگوں کو نکال نہ سکیں، اپوزیشن پاور شو دکھانے میں ناکام ہوگئی۔5دن سڑکوں پر دھکے کھا کر مذہبی کارڈ استعمال کیا گیا، مذہبی کارڈ استعمال کرنے کے باوجود یہ ناکام رہے،

ان کا مزید کہنا تھا کہ گلگت میں بسیں نہ کھانا دیا گیا اورلوگ محبت میں نکلے، لیڈر اور مال کی محبت میں فرق واضح ہوتا ہے، مذاکراتی کمیٹی کی سفارشات کے بعد لائحہ عمل طے کریں گے، سیاسی اداکاروں کے ساتھ ڈائیلاگ کرتے رہیں گے۔

نومبر 1, 2019
کوئی بھی حکومت مسائل سے اکیلے نہیں نمٹ سکتی، فردوس عاشق اعوان

لاہور: معاون خصوصی برائے اطلاعات فردوس عاشق اعوان نے کہا ہے کہ کوئی بھی حکومت مسائل سے اکیلے نہیں نمٹ سکتی ہے۔

تفصیلات کے مطابق معاون خصوصی برائے اطلاعات فردوس عاشق اعوان نے کہا ہے کہ حکومت نے جمہوریت کو پروان چڑھانے کے لیے اپوزیشن کی سہولت کاری کی ہے، واحد حکومت ہے جس نے عمران خان کی قیادت میں اعلیٰ ظرفی کا مظاہرہ کیا ہے۔

فردوس عاشق اعوان نے کہا ہے کہ ماضی کی حکومتوں نے پاکستان کو دلدل میں پھینکا ہے، پاکستان کی معیشت اب درست سمت میں چل رہی ہے، معیشت کو ٹریک سے اتارنے کے لیے چوں چوں کا مربہ چل رہا ہے۔

انہوں نے کہا کہ سانجے کی ہنڈیا بیچ چوراہے پر پھوٹے گی، یہ لوگ آپس میں سیاست کررہے ہیں، آپس میں سچ نہیں بول رہے ہیں تو عوام سے کیا سچ بولیں گے۔

مزید پڑھیں: کوریج کی اجازت نہ دے کر پتھر کے زمانے کی یاد تازہ کی گئی، فردوس عاشق اعوان

معاون خصوصی برائے اطلاعات نے کہا کہ حکومت جہاں غلطی کرتی ہے تنقید ہونی چاہئے لیکن جہاں اچھا کام ہو اس کی حوصلہ افزائی بھی ہونی چاہئے۔

واضح رہے کہ اس سے قبل فردوس عاشق اعوان کا کہنا تھا کہ آزادی مارچ میں خواتین اینکرز کو کوریج کی اجازت نہ دے کر پتھر کے زمانے کی یاد تازہ کردی گئی ہے، مولانا فضل الرحمان کے اقدامات جمہوری روایات، آئینی حقوق روندنے کے مترادف ہیں۔

یاد رہے کہ کہ جے یو آئی (ف) نے خواتین سے امتیازی سلوک روا رکھتے ہوئے خواتین صحافیوں اور اینکرز کو آزادی مارچ کی کوریج سے روک دیا تھا اور پیشہ وارانہ امور کی انجام دہی کے لیے آنے والی خواتین میڈیا ورکرز کو واپس بھیج دیا گیا تھا۔

نومبر 1, 2019
کسی حد تک آزادی مارچ سے بھارت کو فائدہ ہوا ہے، شاہ محمود قریشی

اسلام آباد : وزیر خارجہ شاہ محمود قریشی نے کہا کہ معاہدےکی پابند رہیں تو جو کہنا ہے کہیں کوئی قدغن نہیں، بیانیہ بدلنے کیلئے کسی حد تک آزادی مارچ سے بھارت کو فائدہ ہوا ہے، کوئی پاکستانی نہیں چاہےگاکہ کشمیریوں کاقاتل مودی پاکستان میں قدم رکھے۔

تفصیلات کے مطابق وزیر خارجہ شاہ محمود قریشی نے ریسکیو 1122 کی تقریب سے خطاب کرتے ہوئے کہا ہم جب اسلام آباد کیلئے نکلے تو گوجرانوالہ میں حملہ ہوا، میرے حلقے میں آزادی مارچ کا قیام تھا تمام سہولتیں دیں، ہم عزت دینے والے ہیں اور عزت دیں گے، معاہدےکی پابند رہیں تو جو کہنا ہے کہیں کوئی قدغن نہیں۔

وزیرخارجہ شاہ محمود قریشی کا کہنا تھا کہ سوشل میڈیا کا زمانہ ہے کوئی چیز دبانا چاہیں تو بھی نہیں دب سکتی، ہمارا رویہ جمہوری ہے اور ہم اسے برقرار رکھیں گے، توقع کرتا ہوں آزادی مارچ کا رویہ بھی مناسب اور رواداری کا ہوگا۔

وزیر خارجہ نے کہا مقبوضہ کشمیر میں کرفیو اورزیادتیاں دنیا بھر کامیڈیا اجاگرکررہاہے، مقبوضہ کشمیر کی صورتحال پر آزادی مارچ کی وجہ سے میڈیا کی توجہ ہٹی ہے، بیانیہ بدلنے کیلئے کسی حد تک آزادی مارچ سے بھارت کو فائدہ ہوا ہے، بھارت یہ سمجھ رہا ہے کہ پاکستان اندرونی معاملات میں الجھ گیا ہے۔

کوئی پاکستانی نہیں چاہےگاکہ کشمیریوں کاقاتل مودی پاکستان میں قدم رکھے

کرتارپور راہداری کے حوالے سے ان کا کہنا تھا کہ کرتارپور خیرسگالی کا پیغام ہے، نو نومبر کو وزیراعظم افتتاح کریں گے، پاکستان نےسکھ کمیونٹی میں خیرسگالی کے جذبات کو ابھارا ہے، سکھ کمیونٹی پاکستان کی کاوش سے خوش ہے، ایسا 72سالوں میں نہیں ہوا۔

وزیر خارجہ نے کہا کہ دنیا دیکھ رہی ہے پاکستان میں مذہبی آزادی ہے، مندر،گوردوارہ ، چرچ آباد ہیں سب بلاخوف جاسکتے ہیں، دوسری طرف مقبوضہ کشمیر میں نمازجمعہ کی اجازت نہیں دی جارہی۔

شاہ محمود قریشی کا کہنا تھا کہ مسئلہ کشمیر پرہمارااصولی مؤقف ہے جسے بھارت نے تسلیم کیا ہے، بھارت نے عالمی برادری ،کشمیریوں سے وعدے کئے جووفا نہیں ہوئے، کوئی پاکستانی نہیں چاہےگاکہ کشمیریوں کاقاتل مودی پاکستان میں قدم رکھے،من موہن سنگھ کو دعوت دی اور انہوں نے دعوت قبول کی ، من موہن سنگھ کرتارپور کی تقریب میں عام شہری کی حیثیت سے شرکت کریں گے

حریم شاہ سے متعلق انھوں نے کہا کہ ٹک ٹاک گرل کے دفتر خارجہ جانے کی تحقیقات ہوگئی، وزیر اعظم کو رپورٹ مل گئی ایکشن لیا جائے گا۔

اکتوبر 31, 2019
‌‌’کنٹینر ہمیں اسلام آباد آنے سے نہیں روک سکتے’

لاہور : جے یو آئی ف کے رہنما عبدالغفورحیدری نے کہا ہے کہ کنٹینر ہمیں اسلام آباد آنےسے نہیں روک سکتے، راستے بند نہیں ہونےچاہئیں ،مریم اورنگزیب نے جلسہ ملتوی کی بات کہی ہے تو ہم لاج رکھ رہےہیں۔

تفصیلات کے مطابق جے یو آئی ف کے رہنما عبدالغفورحیدری نے میڈیا سے گفتگو میں کہا کنٹینر ہمیں اسلام آباد آنےسے نہیں روک سکتے، انتظامیہ سے طے ہوا ہے راستے بند نہیں ہونےچاہئیں۔

عبدالغفورحیدری کا کہنا تھا کہ کل نمازجمعہ مولانافضل الرحمان پڑھائیں گے ، اسلام آبادمیں جلسےکا باقاعدہ آغاز کل صبح سے ہوگا، رات گئے قافلے پہنچیں گے تو ویلکم کرتے رہیں گے۔

رہنما جے یو آئی ف نے مزید کہا مریم اورنگزیب سے میرا رابطہ ہوانہ انھوں نے کیا، مریم اورنگزیب نے جلسہ ملتوی کی بات کہی ہے تو ہم لاج رکھ رہےہیں، قافلے ابھی تک اسلام آباد نہیں پہنچےآج دن ویسے ہی گزر گیا۔

مزید پڑھیں : آزادی مارچ جلسہ ملتوی نہیں ہوا ، مولانا فضل الرحمان کا اعلان

دوسری جانب راشدمحمودسومرو کا کہنا تھا کہ جلسہ شیڈول کے مطابق ہوگا، جلسےسے خطاب رات میں کریں یاکل مشاورت جاری ہے، اسلام آبادجارہے ہیں،جلسہ گاہ میں بیٹھیں گے۔

اس سے قبل جمعیت علمائے اسلام ف کے سربراہ مولانا فضل الرحمان نے اسلام آباد میں آزادی مارچ جلسہ ملتوی نہ کرنے کا اعلان کرتے ہوئے کہا تھا یہ ہمارا پروگرام ہے ہم فیصلہ کریں گے کیا کرنا ہے؟ سب اسلام آباد کی طرف رخ کریں۔

ان کا کہنا تھا کہ ن لیگ کی قیادت کو بتادیا کہ اسلام آباد میں جلسہ آج ہی ہوگا ، قافلےاپنےوقت کےمطابق اسلام آباد پہنچیں گے، جلسہ ہوگا یا نہیں ابہام پیدا نہ کریں، مارچ کےاندرجلسہ دھرناسب کچھ ہے۔

یاد رہے مسلم لیگ ن کی ترجمان مریم اورنگزیب کی جانب سے اسلام آباد جلسہ ملتوی ہونے کابیان آیا تھا اور کہا تھا کہ جلسہ ملتوی کرنے کا فیصلہ مشترکہ اپوزیشن کی جانب سے کیا گیا ، آزادی مارچ کا اسلام آباد میں جلسہ کل ہو گا اور مولانا فضل الرحمان کل آئندہ کے لائحہ عمل کا اعلان کریں گے۔

اکتوبر 31, 2019
سانحہ تیز گام ، اپوزیشن کا اسلام آباد میں آزادی مارچ جلسہ ملتوی

اسلام آباد : سانحہ تیز گام کے باعث اپوزیشن کا آزادی مارچ جلسہ ملتوی کردیا گیا ، اسلام آبادمیں جلسہ کل ہو گا اور مولانا فضل الرحمان کل آئندہ کے لائحہ عمل کااعلان کریں گے۔

تفصیلات کے مطابق زرائع کا کہنا ہے کہ سانحہ تیز گام کے باعث اپوزیشن نے آزادی مارچ جلسہ ملتوی کردیا، ترجمان مسلم لیگ ن مریم اورنگزیب نے کہا جلسہ ملتوی کرنے کا فیصلہ مشترکہ اپوزیشن کی جانب سے کیا گیا ، آزادی مارچ کا اسلام آباد میں جلسہ کل ہو گا۔

آزادی مارچ آج اسلام آباد پہنچے گا تاہم مولانا فضل الرحمان کل آئندہ کے لائحہ عمل کا اعلان کریں گے۔

رہنمان لیگ احسن اقبال کا کہنا ہے کہ 31 اکتوبر کاعوامی جلسہ موخرکردیاگیاہے، حکومتی پالیسیوں کےخلاف جلسہ کل ہوگا، کارکنان اسلام آباد میں قیام کریں اور کل جلسے میں شرکت کریں۔

احسن اقبال نے مزید کہا کہ ٹرین حادثے میں قیمتی انسانی جانوں کے ضیاع پر جلسہ موخر کیا گیا، متاثرہ خاندانوں سے دلی ہمدردی اور افسوس کا اظہار کرتے ہیں ، تیزگام سانحے پر ہر پاکستانی کا دل زخمی ہے۔

دوسری جانب راولپنڈی پولیس، انتظامیہ اور جے یو آئی مذاکرات میں ڈیڈ لاک برقرار ہے، سی پی او راولپنڈی، انتظامیہ کے جے یو آئی سے مذاکرات ناکام ہوگئے ہیں ، پولیس اور ضلعی انتظامیہ مولانافضل الرحمان سے ملاقات کیلئے پہنچ گئی ہے۔

مزید پڑھیں : آزادی مارچ آج شہر اقتدار میں داخل ہوگا

ضلعی انتظامیہ کا مؤقف ہے کہ ریلی راولپنڈی کی حدود سے نہ گزاریں جبکہ جے یو آئی ریلی کو راولپنڈی مری روڈ سے گزارنے پر بضد ہے۔

خیال رہے مولانا فضل الرحمان کا قافلہ گجرخان سے آج اسلام آباد پہنچے گا، اسلام آباد میں مولانا کے آزادی مارچ کا اسٹیشن تیارکرلیا گیا ہے اور ایچ نائن سیکٹرمیں سو ایکڑ کے میدان پر تیاریاں مکمل ہوگئیں ہیں، اس موقع پر اسلام آباد میں سیکیورٹی کے سخت انتظامات کئے گئے ہیں۔

یاد رہے لیاقت پورکےقریب تیزگام ایکسپریس کی تین بوگیوں میں ہولناک آتشزدگی سے تہترافراد کےجاں بحق ہونےکی تصدیق کردی گئی ہے، واقعہ میں درجنوں افراد زخمی بھی ہوئے، بہاولپور، ملتان اور رحیم یار خان کے سرکاری اسپتالوں میں ایمرجنسی نافذ کردی گئی ہے جبکہ اموات میں اضافے کا خدشہ ہے۔

مزید پڑھیں : تیزگام کی 3 بوگیوں میں آگ لگ گئی، 73 افراد جاں بحق

سی اوجنیداسلم کا کہنا ہے کہ متاثرہ تین بوگیوں میں دو سو سات مسافرسوار تھے،اکانومی کلاس کی دو بوگیاں امیر حسین اینڈ جماعت کے نام سے بک تھیں، اکانومی کی ایک بوگی میں ستتر، دوسری میں چھہتر مسافر سوار تھے، اکانومی کلاس کی بوگیوں میں مسافر زیادہ تر حیدرآباد سے سوار ہوئے تھے جبکہ بزنس کلاس کی بوگی میں چوون مسافر سوار تھے۔

اکتوبر 31, 2019
آزادی مارچ: راولپنڈی کے داخلی راستوں کو سیل کردیا گیا

اسلام آباد: مولانا فضل الرحمان کے آزادی مارچ سے متعلق حکومت نے نئی حکمت عملی تیار کرلی، راولپنڈی کے داخلی راستوں کو سیل کردیا گیا۔

تفصیلات کے مطابق جہلم روڈ مورگاہ سے راولپنڈی جانے والا راستہ بند کردیا گیا ہے۔ مری روڈ اور سوان پل کے دونوں اطراف سڑکیں سیل دی گئی گئیں۔

ذرائع کا کہنا ہے کہ فیض آباد سے اسلام آباد جانے والی سڑک کنٹینرز لگا سیل کردی گئی، جبکہ انتظامیہ کسی بھی قسم کے ناخوشگوار واقعے سے نمٹنے کے لیے تیار ہے۔

ذرائع کے مطابق آزادی مارچ کو روات ٹی چوک سے اسلام آباد داخل ہونےدیا جائے گا، اسلام آباد ایکسپریس وے کو فیض آباد کے قریب بند کر دیا گیا ہے۔

خیال رہے کہ جمعیت علمائے اسلام ف کا آزادی مارچ آج شہر اقتدار میں داخل ہوگا، ایچ نائن سیکٹر میں سو ایکڑ کے میدان میں تیاری آخری مراحل میں ہیں، حکومت نے واضح کردیا ہے کہ مارچ والے آئیں، جلسہ گاہ تک جائیں، کوئی رکاوٹ نہیں ملے گی۔

آزادی مارچ آج شہر اقتدار میں داخل ہوگا

آزادی مارچ کے لیے اسلام آباد میں تیاریاں حتمی مرحلے میں داخل ہو گئی ہیں، اسلام آباد ضلعی انتظامیہ نے مارچ کیلئے سو ایکڑ کی زمین کشمیر ہائی وے پر مختص کر دی ہے تاہم جے یو آئی کے مقامی رہنماﺅں کا کہنا ہے کہ سو ایکڑ زمین ناکافی ہے اور ضلعی انتظامیہ ڈیڑھ سو ایکڑ زمین مزید دے، جس کی حامی ضلعی انتظامیہ نے بھر لی ہے۔

اکتوبر 31, 2019