سکھر: جے آئی ٹی کی استدعا پر عدالت نے صحافی عزیز میمن کی قبر کشائی کا حکم دے دیا۔
تفصیلات کے مطابق جے آئی ٹی کی استدعا پر عدالت نے صحافی عزیز میمن کی قبر کشائی کا حکم دے دیا، جے آئی ٹی میں شامل سینئر ڈاکٹرز نے دوبارہ پوسٹ مارٹم کی تجویز دی تھی۔
جے آئی ٹی ارکان نے عدالت میں موقف اختیار کیا کہ پہلے کیے گئے پوسٹ مارٹم میں بہت سے مسائل ہیں، دم گھٹنے سے موت میں وجہ ہی بیان نہیں کی گئی کہ کیسے قتل کیا گیا۔
جے آئی ٹی کا کہنا تھا کہ پی ایف یو جے سمیت صحافتی تنظیموں نے دوبارہ پوسٹ مارٹم کا مطالبہ کیا تھا جس کے بعد نوشہروفیروز کی عدالت نے قبر کشائی کی تحریری اجازت دے دی۔
،مزید پڑھیں: صحافی عزیز میمن قتل کیس، جے آئی ٹی سربراہ تبدیل
واضح رہے کہ چند روز قبل محکمہ داخلہ سندھ کی جانب سے ایڈیشنل آئی جی ڈاکٹر ولی اللہ کو جے آئی ٹی کی سربراہی سے ہٹا دیا گیا تھا۔
مقتول کے اہلخانہ اور صحافتی تنظیموں نے ڈاکٹر ولی اللہ کی سربراہی میں بننے والی جے آئی ٹی پر اعتراض کیا تھا جس پر انہیں سربراہی سے ہٹایا گیا تھا۔
محکمہ داخلہ سندھ کی جانب سے ایڈیشنل آئی جی کراچی غلام نبی میمن کو جے آئی ٹی کا سربراہ مقرر کیا گیا تھا جس کا نوٹیفکیشن بھی جاری کردیا گیا تھا۔
یاد رہے کہ گزشتہ ماہ ضلع نوشہروفیروز کے شہر محراب پور میں سندھی چینل کے رپورٹر عزیز میمن کی لاش نہر سے برآمد ہوئی تھی جس کے بعد قتل کے شبے میں ان کے ساتھی کیمرا مین سمیت 2 افراد کو حراست میں لیا گیا تھا۔
