پاکستان شوبز انڈسٹری کے معروف اداکار بابر علی نے غدر 2 کے اداکار سنی دیول کو پاکستان مخالف فلمیں بنانے پر آڑے ہاتھوں لے لیا۔
بابر علی نے حال ہی میں ایک پوڈ کاسٹ میں بطور مہمان شرکت کی جہاں اُنہوں نے مختلف مضوعات پر بہت دلچسپ گفتگو کی۔
بابر علی نے بھارتی اداکار سنی دیول کی فلم ’غدر 2‘ کی کامیابی کے بارے میں بات کرتے ہوئے کہا کہ اگر کوئی پاکستان کو برا بھلا کہہ کر کامیابی حاصل کرے گا تو میرے دل میں تو اس کی کوئی عزت نہیں ہے۔
اُنہوں نے کہا کہ بھارتیوں اور پاکستانیوں میں یہی فرق ہے، میں یہ نہیں کہتا کہ آپ اپنے ملک کے لیے کچھ نہ کریں لیکن آپ کم از کم کسی دوسرے ملک کو تو برا بھلا نہ کہیں۔
اداکار کا کہنا تھا کہ ہم نے بہت سی پاکستانی فلمیں بنائی ہیں تو ہم نے کبھی کسی کو گالی نہیں دی تو ہونا یہ چاہیے کہ کسی بھی جھنڈے کو یا کسی بھی ملک کی فوج کو برا بھلا نہ کہا جائے۔
اُنہوں نے کہا کہ ہماری فوج جو ہمارے لیے ایک قابلِ فخر ادارہ ہے اب اس پر کوئی انگلی اُٹھائے گا تو ہم اسے بالکل بھی اچھا نہیں سمجھیں گے۔
بابر علی نے سنی دیول سے مخاطب ہوتے ہوئے کہا کہ آپ یاترا کے لیے پاکستان آئے تو ہم نے آپ کا کھلے دل سے استقبال کیا، اب آپ ایسا نہ کریں۔
پاکستانی اداکار نے بھارتی اداکار سنی دیول کو متنازع فلموں میں کام کرنے سے اجتناب کرنے کا مشورہ دیتے ہوئے کہا کہ ہر وہ چیز جو میرے ملک کے، میرے پرچم کے اور میری پاک فوج کے خلاف ہو اس کے لیے کوئی جگہ نہیں۔
