اسلام آباد : تحریک انصاف کے رہنما بابر اعوان نے کہا ہے کہ حکومت سزا یافتہ مریم نواز کا نام ای سی ایل سے نہیں نکال سکتی، پاکستان سے بیمار لوگ لندن جا کر صحت مند ہو جاتے ہیں۔
یہ بات انہوں نے اسلام آباد میں پریس کانفرنس سے خطاب کرتے ہوئے کہی، پی ٹی آئی رہنما بابر اعوان نے کہا کہ حکومت کا فیصلہ تھا سزا یافتہ شخص کو باہر جانے کی اجازت نہیں دی جائے گی تاہم نوازشریف کی بیماری پر کوئی سیاست نہیں کی گئی۔
انہوں نے کہا کہ ای سی ایل کے قوانین1980 میں بنائے گئے تھے،2010 میں ان میں تبدیلی کی گئی۔ مریم نواز کو بیرون ملک جانے کی اجازت نہ دینا قانون کی بالا دستی ہے۔
ایک سوال کے جواب میں ان کا کہنا تھا کہ پرویز مشرف کے خلاف شکایت سے متعلق نوازشریف اور شہباز شریف خاموش ہیں، وہ صاف کہہ دیں کہ ان سے غلطی ہوگئی ہے۔
بابر اعوان نے مزید کہا کہ مشرف کیس میں حکومت آئینی راستہ اختیار کرے گی۔ مناسب سمجھا گیا تو حکومت مشرف کیس پر عدالت جا سکتی ہے۔ اداروں کے تصادم کے بارے میں کوئی نہ سوچے اداروں میں تصادم کے خدشے کو تفصیلی فیصلے کے پیرا66 سے جوڑا جا رہا ہے۔
