مصر میں مقامی ڈرائیور کی ایمانداری کی بدولت سعودی خاندان کو لاکھوں ڈالر اور قیمتی زیورات واپس مل گئے، مذکورہ خاندان قیمتی سامان سے بھرا بیگ ٹیکسی میں بھول گیا تھا۔
بین الاقوامی ویب سائٹ کے مطابق مصری شہری نے 20 لاکھ ڈالر سے زیادہ کیش اور 3 لاکھ 50 ہزار ریال مالیت کے زیورات سے بھرا بیگ واپس کر کے سعودی فیملی کا دل جیت لیا۔
مصر میں بحر احمر صوبے کے گورنر نے بیگ واپس کرنے والے مصری ملازم کو اعزاز سے بھی نوازا۔
بحر احمر ٹریفک کے عارضی ملازم کو 20 لاکھ ڈالر سے زیادہ کیش اور 3 لاکھ 50 ہزار سعودی ریال مالیت کے زیورات سے بھرا بیگ ملا تھا، وہ الغردقہ شہر کے کیفے ٹیریا میں ڈیوٹی پر تھا جہاں اسے مبینہ بیگ ملا تھا۔
مصری ملازم نے بتایا کہ جیسے ہی اس نے بیگ کے مالک کا پتہ لگانے کے لیے اسے کھولا وہ یہ دیکھ کر حیرت زدہ رہ گیا کہ اس میں بڑی تعداد میں ڈالرز اور زیورات بھی ہیں۔
مصری کارکن فوری طور پر مقامی افسر کے پاس پہنچا، تفتیش کے بعد پتہ چلا کہ بیگ ایک سعودی فیملی کا ہے، ان کے ہمراہ ایک مصری بھی تھا۔ یہ تینوں کسٹم کی گاڑی میں سوار ہو چکے تھے۔
مصری افسر نے گاڑی کو رکوانے کے لیے موبائل کے ذریعے رابطہ کیا اور سعودی فیملی کو خوشخبری سنائی گئی کہ ان کا جو بیگ گم ہوگیا تھا وہ مل گیا ہے۔
سعودی خاندان راستے سے واپس آیا، اس نے بیگ کھول کر ڈالر اور زیورات چیک کیے۔ سب کچھ ملنے پر انہوں نے مصری کارکن کا شکریہ ادا کیا۔
