کراچی: ملتان ایئرپورٹ پر عمرے کی آڑ میں جانے والے بھکاریوں اور انسانی اسمگلرز کا ایک گروہ آف لوڈ کر دیا گیا۔
تفصیلات کے مطابق ایف آئی اے امیگریشن نے ملتان ایئرپورٹ پر ایک کارروائی میں عمرے کی آڑ میں جانے والے بھکاریوں اور انسانی اسمگلرز کے ایک گروہ کو آف لوڈ کر دیا۔
ترجمان ایف آئی اے کے مطابق 8 مسافر عمرے کے ویزے پر سعودی عرب جا رہے تھے، امیگریشن میں معلوم ہوا کہ مسافر بھیک مانگنے کے لیے سعودی عرب جا رہے ہیں، دوران تفتیش انکشاف ہوا کہ مسافر ایجنٹس کی ملی بھگت سے سعودی عرب جا رہے تھے۔
مسافروں نے انکشاف کیا کہ بھیک سے حاصل آدھی رقم ایجنٹ کے حوالے کرنی تھی، مسافروں کو سعودی عرب پہنچنے پر پاکستانی ایجنٹوں نے وصول کرنا تھا، آف لوڈ کیے گئے مسافروں میں 5 مرد اور 3 خواتین شامل ہیں۔
26 پیشہ ور بھکاریوں کو سعودی عرب جانے سے روک دیا گیا
ترجمان ایف آئی اے کے مطابق عمرہ ویزے کی مدت پوری ہونے کے بعد مسافروں نے واپس پاکستان آنا تھا، مسافروں کو قانونی کارروائی کے لیے ایف آئی اے ملتان سرکل منتقل کر دیا گیا ہے۔