لاہور : بہاولنگر میں گزشتہ دنوں پیش آنے والے واقعے پر حکومت پنجاب کی جانب سے اہم پیشرفت سامنے آئی ہے۔
اے آر وائی نیوز کی رپورٹ کے مطابق بہاولنگر واقعے پر حکومت پنجاب کی قائم کردہ جے آئی ٹی کا نوٹیفکیشن سامنے آگیا۔
نوٹیفکیشن میں اسپیشل سیکرٹری ہوم فضل الرحمان جےآئی ٹی کے کنونیر مقرر کردیے گئے جبکہ کمشنر بہاولپور نادر چھٹہ، ڈی آئی جی اسپیشل برانچ فیصل راجہ کو جے آئی ٹی کا ممبر مقرر کیا گیا ہے۔
اس کے علاوہ نوٹیفکیشن کے مطابق آئی ایس آئی اور آئی بی کا ایک، ایک نمائندہ بھی جے آئی ٹی کا رکن ہوگا
قبل ازیں اس واقعے سے متعلق آئی ایس پی آر کی جانب سے جاری بیان میں کہا گیا تھا کہ بہاول نگر میں پیش آنے والے افسوسناک واقعے کو فوج اور پولیس حکام کی مشترکہ کوششوں سے فوری طور پر حل کر لیا گیا ہے تاہم معاملہ حل ہونے کے باوجود مخصوص عناصر نے سوشل میڈیا پر منفی پروپیگنڈا شروع کردیا۔
