پاک پتن : برصغیر پاک وہند کے صوفی بزرگ حضرت بابا فریدالدین شکرگنج رحمتہ اللہ علیہ کے 777 ویں عرس کی تقریبات آخری مراحل میں داخل ہوگئیں، بہشتی دروازہ چوتھے روز بھی زائرین کے لیے کھول دیا گیا۔
تفصیلات کے مطابق حضرت بابا فریدالدین گنج شکر کے سات سو ستترویں عرس کی تقریبات پاکپتن میں اپنے اختتام کو پہنچنے والی ہیں، دنیا بھر سے آئے لاکھوں زائرین تقریبات میں شرکت کر کے فیض و برکات سمیٹ رہے ہیں۔
پندرہ لاکھ سے زائد زائرین عرس میں شرکت کے لئے پاکپتن آئَے ہیں، ان میں مسلمانوں کے ساتھ ساتھ ہندو ، سکھ اور دیگر مذاہب کے زائرین بھی شامل ہیں۔
پاکپتن کے دربار میں بہشتی دروازہ چوتھے روز بھی زائرین کے لیے کھول دیا گیا۔ قفل کشائی کی سعادت کمشنرساہیوال اور آر پی او ساہیوال نے حاصل کی، بہشتی دروازے کی قفل کشائی پر شاندار آتش بازی کا مظاہرہ کیا گیا، بہشتی دروازے سے گزرنے کیلئے دنیا بھر سے آئے زائرین کی قطاریں لگی رہیں۔
اس موقع پر تبرکات عقیدت مندوں میں تقسیم کی گئی۔ عرس میں اندرون و بیرون ملک سے زائرین کی بڑی تعداد شریک ہے۔
سجادہ نشین دیوان مودود مسعود چشتی نے ملک و قوم کی سلامتی پاکستان کے تحفظ عالم اسلام کی سلامتی کیلئے دُعا کی، عرس کے موقع پر ضلعی انتظامیہ کی جانب سے زائرین کیلئے خصوصی انتطامات کیے گئے ہیں۔
مزید پڑھیں: پاکپتن ۔ حضرت بابا فریدالدین گنج شکرکےعرس کی تقریبات عقیدت و احترام سے جاری
عرس کی تقریبات میں محافل سماع کا انعقاد کیا گیا جس میں ملک کے نامور قوالوں نے کلام عقیدت پیش کیا۔ حضرت بابا فریدالدین گنج شکر کے عرس میں لاکھوں عقیدت مند شرکت کر کے فروغ اسلام کے لیے بابا جی خدمات کو خراج عقیدت پیش کررہے ہیں۔
