کراچی : اے آر وائی نیوز کے اینکر اقرار الحسن کے خلاف مقدمے میں ضمانت کا معاملے میں اہم پیش رفت ہوئی ہے، سندھ ہائی کورٹ نے اقرار الحسن کی ایک ہفتے کی حفاظتی ضمانت منظور کرلی
تفصیلات کے مطابق ڈپٹی کمشنر میرپورخاص کی کرپشن بے نقاب کرنے کی پاداش میں مقدمے کا سامنا کرنے والے صحافی اور اینکر اقرارالحسن کی عدالت نے ضمانت منظور کرلی۔
سندھ ہائی کورٹ نے اقرار الحسن کو50ہزار روپے کے مچلکے ادا اور7دن میں متعلقہ عدالت میں پیش ہونےکی ہدایت دی ہے۔
کیس کی سماعت کے موقع پر وکیل نے کہا کہ اقرار الحسن معروف ٹی وی اینکر ہیں اور عوامی آگاہی کے پروگرام کرتے ہیں۔
وکیل نے عدالت کو بتایا کہ ڈی سی میرپورخاص نے بدنیتی کی بنیاد پر سرکاری کام میں رکاوٹ کامقدمہ درج کرادیا، اقرار الحسن ڈپٹی کمشنر آفس میں بلدیاتی انتخابات میں ڈی آراو سے معلومات کیلئے گئے تھے۔
معاملہ کچھ یوں ہے کہ اے آر وائی نیوز کی ٹیم سرعام نے گزشتہ روز ڈپٹی کمشنر میرپورخاص کی کرپشن بے نقاب کی تھی، سرعام ٹیم نے ڈپٹی کمشنر اور اسسٹنٹ کمشنر میرپور خاص کو رشوت لیتے پکڑ لیا تھا۔
کرپشن بے نقاب کرنے کی سزا، اینکر اقرار الحسن پر پرچہ کٹ گیا
ڈپٹی کمشنر میرپور خاص نے 100اسلحہ لائسنس کے لئے 20لاکھ روپے رشوت مانگی تھی جبکہ اسسٹنٹ کمشنر میرپور خاص نے معاملے میں مدد کیلئے 50ہزار روپے رشوت لی تھی۔
ٹیم سرعام آ ڈپٹی کمشنر کے دفتر پہنچی تو متعلقہ افسر ٹیم کو دیکھتے ہی فرار ہوگیا، کرپشن بے نقاب کرنے پر ڈپٹی کمشنر کے عملے نے اقرارالحسن پر ہی مقدمہ درج کرادیا، اقرارالحسن پر درج مقدمے میں کار سرکار میں مداخلت سمیت دیگر دفعات شامل کی گئیں ہیں۔
