اسلام آباد : باجوڑ میں جے یو آئی کے ورکرز کنونشن میں ہونے والے دھماکے کے نتیجے میں ہونے والے جانی اور مالی نقصانات کی ملک بھر کے سیاسی و مذہبی رہنماؤں نے شدید مذمت کی ہے۔
تفصیلات کے مطابق باجوڑ میں جے یو آئی کے ورکرز کنونشن میں دہشت گردوں نے دھماکا کیا جس کے نتیجے میں 35 افراد جاں بحق اور 150سے زائد افراد زخمی ہوگئے۔
واقعے پر افسوس کا اظہار کرتے ہوئے چیئرمین پیپلز پارٹی اور وزیر خارجہ بلاول بھٹو زرداری نے شہداء کے خاندانوں اور جے یو آئی سے اظہار ہمدردی کرتے ہوئے کہا ہے کہ حکومت دہشت گردوں کے سرپرستوں کو قانون کی گرفت میں لائے۔
امیر جماعت اسلامی سراج الحق نے مذمتی بیان میں کہا کہ حکومت سیاسی قائدین اور شہریوں کی جان ومال کے تحفظ کو یقینی بنائے، حملے کا مقصد ملک میں افراتفری کی صورت حال پیدا کرنا ہے، حکومت بم دھماکے کی فوری اورمکمل تحقیقات کرائے۔
پی پی کے شریک چیئر پرسن آصف علی زرداری نے کارکنوں کی شہادت پر مولانا فضل الرحمان سے اظہار تعزیت کیا اور بم دھماکے میں زخمیوں کی جلد صحت یابی کیلئے دعا کی انہوں نے کہا کہ ملک کو دہشت گردی کی نرسریوں سے پاک کرنے کی ضرورت ہے۔
اسپیکر، ڈپٹی اسپیکر قومی اسمبلی نے بھی جے یو آئی ورکرز کنونشن بم دھماکے کی مذمت کرتے ہوئے جانی نقصان پر اظہار افسوس کیا ہے، راجہ پرویزاشرف نے کہا کہ معصوم شہریوں کو دہشت گردی کا نشانہ بنانا شرمناک فعل ہے، بزدلانہ کارروائیوں میں ملوث عناصر انسانیت و ملک دشمن ہیں۔
گورنر سندھ کامران ٹیسوری دھماکے میں جاں بحق ہونے والے افراد کے درجات کی بلندی اور لواحقین کے لئےصبر و جمیل کی دعا کی ان کا کہنا تھا کہ دہشت گرد عوام کے حوصلے پست نہیں کرسکتے، پوری قوم دہشت گردی کے خلاف متحد ہے۔
متحدہ قومی موومنٹ کے کنوینئر خالد مقبول صدیقی نے جاں بحق افراد کےلواحقین سےاظہار تعزیت کرتے ہوئے کہا کہ دہشت گردوں کو قانون کے کٹہرے میں لاکر سخت ترین سزائیں دی جائیں، حکومت اور تمام اسٹیک ہولڈرز کو مل کر سنجیدہ اقدامات کی ضرورت ہے۔
جماعت اسلامی کراچی کے امیر حافظ نعیم الرحمان نے اپنے بیان میں کہا کہ جمعیت علمائے اسلام کے جلسےمیں دھماکہ کھلی دہشت گردی ہے، حکومت کی ذمہ داری ہے شہریوں کی جان ومال کے تحفظ کو یقینی بنائے، بم دھماکے کی فی الفور اور مکمل تحقیقات کرائی جائے۔
