کوئٹہ : وزیرِداخلہ بلوچستان کا کہنا تھا کہ غیرمصدقہ اطلاعات کے مطابق کالعدم بی ایل ایف کا سربراہ ڈاکٹر اللہ نذر بلوچ فورسز کی کارروائی کے دوران مارا گیا ہے ، پریس کانفرنس کے دوران انہوں نے رابطہ سینٹر کی تصویریں بھی دکھائیں۔
بلوچستان کے وزیرِداخلہ سرفراز بگٹی نے کوئٹہ میں پریس کانفرنس کرتے ہوئے بتایا کہ اطلاعات ہیں کہ آوران میں سرچ آپریشن کے دوران فورسز کے چھڑپ میں کالعدم بی ایل ایف کا سربراہ ڈاکٹر اللہ نذر مارا گیا ہے اور مارے جانے والوں میں اُن کے قریب کمانڈرز بھی شامل ہیں۔
انہوں نے کہا کہ حساس اداروں ایف سی نے کارروائی کے دوران کالعدم تنظیموں اور راکے کارندوں کے زیر استعمال کمیونیکیشن سنٹر ختم کردیا ہے، جو دلبندین کے بلند وبالا پہاڑوں پر واقع تھا۔
سرفراز بگٹی کا کہنا تھا کہ کارروائی کے دوران دہشتگرد تنظیموں سے تعلق رکھنے والے سات ملزمان کو گرفتار کر لیا ہے ، جن سے اسلحہ ، وی وائرلیس سیٹ سمیت بڑی تعدادمیں بھارت اور افغانستان سمیت کئی غیر ملکی سمیں برآمد ہوئی ہے۔
وزیرداخلہ کا کہنا تھا کہ پی ٹی سی ایل وی کے نمبز کالعدم تنظیموں انڈین راء ، افغان انٹیلی جنس ، تحریک طالبان افغانستان ، القاعدہ ، بلوچ علیحدگی پسند ، جنداللہ اور اسلحہ منشیات اسمگلرز کے زیر استعمال تھا یہ نمبرز وہ اپنے انٹرنیشنل ہینڈلرز اور بلوچستان بلکہ پورے پاکستان میں دہشتگردانہ کارروائیاں کرنے کے لئے استعمال کرتے تھے۔
اُن کا کہنا تھا کہ ان سمز میں افغانی ، انڈین ، ایرانی ، یو کے ، یو ایس اے ، خلیجی اور یورپین ممالک کے نمبرز موجود ہیں۔
