چمن: تاج روڈ پر دھماکہ زوردار دھماکہ متعدد افراد زخمی، تفصیلات کے مطابق بلوچستان کے شہر چمن میں تاج روڈ پر گاڑی میں نصب بم پھٹ گیا۔
دھماکے نتیجے میں ایک شخص جاں بحق اور آٹھ افراد زخمی ہوگئے، دھماکہ اتنا شدید تھا کہ آس پاس کی عمارتوں کے شیشے بھی ٹوٹ گئے، دھماکہ پارکنگ میں کھڑی گاڑی میں ریموٹ کے ذریعے کیا گیا۔
سیکیورٹی فورسز نے علاقے کو گھیرے میں لے لیا، جبکہ زخمیوں کو طبی امداد کیلئے سول اسپتال منتقل کیا گیا ہے،مذکورہ مقام پر بازار ہونے کے باعث لوگوں کا کافی رش رہتا ہے۔
کوئٹہ :بلوچستان میں بلدیاتی انتخابات کے آخری مرحلے کے لئے پولنگ کا سلسلہ جاری ہے ، ڈسٹرکٹ کونسل کوئٹہ کے چئیرمین اور ڈپٹی چئیرمین کا انتخاب ٹاس کے ذریعے عمل میں آیا۔
تفصیلات کے مطابق آبادی کے لحاظ سے ملک کا سب سے چھوٹا صوبہ بلوچستان بازی لے گیا، بلوچستان میں بلدیاتی انتخابات کے نتیجے میں منتخب ہونے والے کونسلرز نے حلف اٹھا لیا ہے۔
کوئٹہ کےمئیر اور ڈپٹی مئیر اور دیگر اضلاع میں چئیرمین اور وائس چئیرمین کے انتخاب کا عمل جاری ہے، جبکہ متعدد اضلاع میں چئیرمین اور وائس چئیرمین کا بلامقابلہ انتخاب عمل میں آچکا ہے۔
دلچسپ صورتحال اس وقت سامنے آئی جب ڈسٹرکٹ کونسل کوئٹہ کے چئیرمین اور وائس چئیرمین کے لئے امیدواروں کو برابر ووٹ ملنے پر فیصلہ ٹاس کے ذریعے کیا گیا۔
فیصلے کے مطابق آل پارٹیز ڈیموکریٹک الائنس کے نعیم بازئی کو چئیرمین اور پشتونخوا ملی عوامی پارٹی کے عصمت اللہ بازئی کو کامیاب قرار دے دیا گیا۔
ڈیرہ بگٹی ، ہرنائی، پنجگور، جھل مگسی اور حب میں چئیرمین اور وائس چئیرمین کو بلامقابلہ منتخب کرلیا گیا ہے۔ جبکہ ژوب ، موسی خیل ، جعفر آباداور ڈیرہ مراد جمالی میں بھی چئیرمین اور ڈپٹی چئیرمین کا انتخاب عمل آ چکا ہے۔
کوئٹہ : ملک میں بجلی کی لوڈشیڈنگ سے سب سے زیادہ متاثرہ صوبہ بلوچستان کو قرار دیا جائے تو بے جا نہ ہوگا،ہفتہ اور اتوار کی درمیانی شب طویل بریک ڈاﺅن کے باعث ملک بھر میں بجلی معطل رہی تاہم گزشتہ کئی ماہ سے بلوچستان کے دیہی اضلاع میں لوگ رات اور دن اسی طرح بغیر بجلی کے ہی گزارتے ہیں۔
جس سے زراعت کا شعبہ تباہی کے دہانے پہنچ گیا ہے ،صوبے کے ضلعی ہیڈ کوارٹرز میں بجلی کی اعلانیہ لوڈشیڈنگ کا دورانیہ14سے 18گھنٹے جبکہ صوبائی دارالحکومت میں 4سے 8گھنٹے بجلی بند رہتی ہے تاہم بجلی کے ٹاورز گرائے جانے اور دیگر وجوہات کے باعث غیر اعلانیہ لوڈشیڈنگ نے لوگوں کو اذیت میں مبتلا کردیا ہے۔
بریک ڈاﺅن کے بعد بلوچستان میں بجلی بحال تو ہوگئی تاہم چھتر میں تباہ شدہ ٹاورز کی مرمت کا کام مکمل ہوا ہی نہیں تھا کہ گزشتہ رات ضلع نصیر آباد کے علاقے نوتال میں بھی 220کے وی کے مزید دو ٹاوزر دھماکہ خیز مواد سے اڑا دئیے، جس سے کوئٹہ سمیت بلوچستان کے بیشتر اضلاع میں بجلی کی لوڈشیڈنگ میں مزید اضافہ ہوگیا ہے جو عوام کیلئے کسی اذیت سے کم نہیں۔‘
بلوچستان: بلدیاتی انتخابات کے آخری مراحل کی تیاریاں مکمل کرلی ہے، الیکشن کمیشن نے اٹھائیس جنوری کو پولنگ شیڈول جاری کردیا ہے۔
بلوچستان میں بلدیاتی الیکشن کے آخری مراحلے کی تیاری مکمل کرلی گئی ہے، بلدیاتی انتخابات میں چودہ سو پچاس مئیر ، ڈپٹی مئیر، چیئرمین، اور وائس چیئرمین کی نشستوں پر ووٹ ڈالے جائینگے۔
الیکشن کمیشن کے مطابق کوئٹہ میڑوپولیٹین کارپوریشن میں میئر اور ڈپٹی مئیر کی ایک ایک نشست ہے، یونین کونسلز کی باقی تمام نشستیں چیئرمین اور وائس چیئرمین کی ہے۔
مئیر اور چیئرمین کیلئے بیلٹ پیپر کا رنگ نیلارکھا گیا ہے جبکہ یونین کونسلز کے ڈپٹی میئر،اور وائس چیئر مین کیلئے بیلٹ پیپر کا رنگ سفید ہے ۔
یاد رہے کہ بلوچستان میں بلدیاتی انتخابات کا پہلا مرحلہ سات دسمبر دو ہزار تیرہ کو ہوا تھا، دوسرے مرحلے میں بلدیاتی انتخابات انتیس اور تیس دسمبر کو ہوئے تھے، بلوچستان پہلا صوبہ ہوگا۔ جہاں اٹھائیس جنوری کو بلدیاتی انتخابات مکمل ہوجائینگے۔
کوئٹہ : ایران نے صوبہ بلوچستان کیلئے دو ہزار میگاواٹ بجلی فراہم کرنے پر رضامندی ظاہر کر دی ہے۔ وزیراعلیٰ بلوچستان عبدالمالک اور گورنر سیستان نے پریس کانفرنس میں یہ اس معاہدے کی تفصیلات سے آگاہ کیا۔
تفصیلات کے مطابق وزیراعلیٰ بلوچستان اور سیستان کے گورنر کے درمیان ہونے والے معاہدے کے مطابق ایک ہزار میگاواٹ بجلی گوادر کیلئے جب کہ بقیہ صوبے میں تقسیم کی جائے گی۔
اس کے علاوہ وزیراعلیٰ بلوچستان عبدالمالک نے ایرانی کاروباری حضرات کو پاکستان میں کان کنی ، انڈسٹریز اور فشریز میں سرمایہ کاری کرنے کی دعوت دی ۔
گورنر سیستان کا کہنا تھا کہ ایرانی حکومت کیلئے پاکستان سے تعلقات بہت اہمیت کے حامل ہیں۔
کوئٹہ: وزیر داخلہ بلوچستان کا کہنا ہے کہ قلات اور پنجگور میں شرپسندوں کے خلاف کارروائیوں میں آٹھ شدت پسند مارے گئے اور پندرہ کو گرفتار کرلیا گیا۔
بلوچستان کے صوبائی وزیر داخلہ میر سرفراز بگٹی نے ایف سی حکام کے ہمراہ پریس کانفرنس کرتے ہوئے بتایا کہ دہشتگردی کے خلاف مضبوط حکمت عملی اپنائی گئی ہے، دہشتگردی میں ملوث افراد کے خلاف کارروائیاں جاری ہیں،ان کا کہنا تھا قلات اور پنجگور میں سیکورٹی فورسز نے کارروائی کرکے آٹھ شدت پسندوں کو ہلاک کردیا اور پندرہ کو گرفتار کرلیا ہے اور شدت پسندوں کے دو ٹھکانے بھی مسمار کردئیے ہیں۔
صوبائی وزیر داخلہ کا کہنا تھا ژوب اور قلعہ سیف اللہ سے اغوا کیئے جانے والے مسافروں کی بازیابی کے لئے کارروائیاں جاری ہیں ۔وزیرداخلہ بلوچستان کا مزید کہنا تھا کہ قومی ایکشن پلان پر عملدرآمد کیلئے کابینہ کی منظوری سے کارروائی کی جائے گی ،دہشتگردی میں ملوث کسی بھی دہشتگردکو کسی صورت معاف نہیں کیا جائے گا۔
کوئٹہ : بلوچستان کانسٹیبلری کے مال خانے سے کروڑوں روپے مالیت کا اسلحہ غائب کرکے مال خانے کو آگ لگا دی گئی، تحقیقات کے بعد بی سی کے چھ اہلکاروں کو گرفتار کرلیا گیا ہے۔
پولیس کے مطابق سات دسمبر کو بلوچستان کانسٹیبلری کے مرکزی مال خانے میں آگ لگ گئی، تحقیقات کی بعد معلوم ہوا کہ آگ لگی نہیں بلکہ لگائی گئی تھی اور یہ آگ مال خانے سے اسلحہ غائب کرنے کے بعد جان بوجھ کر لگائی گئی ۔
سی سی پی او کوئٹہ عبدالزاق چیمہ کا کہنا ہے کہ بلوچستان کانسٹیبلر کے اسلحہ خانہ سے اسلحہ مختلف اوقات میں غائب ہوتا رہا ہے، پولیس نے کارروائی کرتے ہوئے بلوچستان کانسٹیبلری کے مال خانہ انچارج سمیت چھ اہلکاروں کو گرفتار کرکے مقدمہ درج کرلیا گیا ہے۔
تحقیقات کے دوران پولیس نے مختلف علاقوں سے تیرہ اسلحہ ڈیلرز کو بھی حراست میں لیا ہے، اسلحہ خانے سے سات لاکھ سے زائد راؤنڈز ، درجنوں کلاشنکوفیں اورمختلف بورز کی رائفلیں چوری کی گئیں، علاقے کی ناکہ بندی کرکے اسلحہ کی تلاش میں سرچ آپریشن جاری ہے۔
کوئٹہ : فرنٹیئر کور بلوچستان نے دوہزار چودہ کے حوالے سے رپورٹ جاری کردی ،جس کے مطابق سال بھرکے دوران ایف سی پر صوبے کے مختلف علاقوں میں چار سو پچاس حملے ہوئے۔
فرنٹیئر کور بلوچستان کے ترجمان کے مطابق رپورٹ جنوری سے دسمبر دوہزار چودہ تک پیش آنے والے واقعات اور ایف سی کارکردگی پر مبنی ہے۔
رپورٹ میں بتایا گیا ہے کہ ایف سی نے صوبے کے مختلف علاقوں میں کارروائیوں کے دوران ایک ٹن سے زائد دھماکہ خیز مواد،اڑھائی ہزار کلوگرام سے زائد منشیات،بھاری تعداد میں اسلحہ اور ایک لاکھ ستائیس ہزار سے زائد راؤنڈز برآمد کئے اور ڈیڑھ سو خطرناک ملزمان کے علاوہ چار ہزار آٹھ سو چونتیس غیر قانونی طور پر آنے والے تارکین وطن کو بھی گرفتارکیا۔
کوئٹہ: بلوچستان میں بلدیاتی انتخابات کاتیسرا مرحلہ اکتیس دسمبر کو ہوگا۔کسان اور ورکر کی چودہ سو بیاسی نشستوں پر پولنگ ہوگی، بلوچستان میں بلدیاتی انتخابات کا تیسرا مرخلہ اکتیس دسمبر سے ہوگا۔
مجموعی طور پر چودہ سو بیاسی نشستوں پر مقابلہ ہوگا۔ امیدوارں میں سات سو اڑسٹھ بلامقابلہ کامیاب، تین سو اٹھتر کسان،اور تین سو نوے ورکرشامل ہیں۔
بلدیاتی انتخابات کے لئے کسان اور ورکرکی ایک سو پانچ نشستیں خالی ہیں جس پر چھ سو تیرہ امیدوار آمنے سامنے ہوں گے۔ بلوچستان کے بلدیاتی انتخابات کے دو مرحلے پہلے ہی مکمل ہوچکے ہیں۔
بلوچستان : سوئی کے مقام پر گیس پائپ لائن کی مرمت نہ ہونے کے باعث پنجاب اور بلوچستان میں گیس کا بحران شدت اختیار کرگیا ہے، سردی میں گیس کی عدم فراہمی شہری ٹھٹھر کے رہ گئے۔
بلوچستان میں سوئی کے مقام پر گیس پائپ لائن میں آتشزدگی کے باعث شارٹ فال دو سو چالیس ایم ایم سی ایف ڈی بڑھ گیا ہے، گیس پائپ لائن کی مرمت دو دن گزر نے کے بعد بھی نہ ہوسکی۔ مرمت نہ ہونے کے باعث پنجاب میں صنعتوں کو گیس کی فراہمی بند جبکہ گھریلو صارفین کے لیے گیس پریشر انتہائی کم ہوگیا ہے۔
کوئٹہ میں گیس کی فراہمی دوسرے روز بھی معطل رہی، گیس کی فراہمی نہ ہونے کے باعث شہری شدید سردی میں ٹھٹھر کر رہ گئے ہیں، گیس عدم فراہمی کے باعث سی این جی اسٹیشنز کو بھی گیس کی سپلائی بند ہے۔
سوئی سدرن گیس سپلائی کمپنی کے مطابق متاثرہ پائپ لائن کی مرمت کا کام منگل تک مکمل ہونے کا امکان ہے۔