اسلام آباد: بلتستان سے تعلق رکھنے والی لڑکی کئی دن گزرنے کے بعد بھی بازیاب نہیں کرائی جا سکی۔
تفصیلات کے مطابق اسلام آباد کے علاقے علی پور سے آٹھ دن قبل لا پتا ہونے والی 14 سالہ بچی قرۃ العین تاحال بازیاب نہیں کرائی جا سکی۔
رپورٹس کے مطابق سوشل میڈیا پر ایک سی سی ٹی وی فوٹیج بھی زیر گردش ہے، جس میں مبینہ طور پر قیس نامی ایک لڑکا قرۃ العین کا تعاقب کر رہا ہے۔
سی سی ٹی وی فوٹیج میں دکھائی دینے والے لڑکے کو پولیس نے گرفتار کر کے اسکردو سے تعلق رکھنے والی بچی کے اغوا کا مقدمہ بھی درج کر دیا ہے، تاہم شہزاد ٹاؤن پولیس تاحال بچی کو ڈھونڈھنے میں ناکام رہی ہے۔
بچی کے اغوا پر بلتستان کے عوام سراپا احتجاج بن گئے ہیں، سوشل میڈیا پر بھی قرۃ العین کو بازیاب کرو کا ٹرینڈ چل رہا ہے، وزیر اعلیٰ گلگت بلتستان نے بھی واقعے کا نوٹس لیتے ہوئے متعلقہ حکام سے رابطہ کر کے لڑکی کی فوری بازیابی کی ہدایت کر دی ہے۔
مظاہرین کا کہنا ہے کہ اگر لڑکی کو بازیاب نہ کرایا گیا تو وہ اسلام آباد میں دھرنا دیں گے۔
