لاہور : پاکستان کرکٹ بورڈ نے بنگلہ دیش کی موجودہ سیاسی صورتحال کے پیش نظر بنگلہ دیش کرکٹ ٹیم کو جلد پاکستان آنے کی پیشکش کی ہے۔
اے آر وائی نیوز کے نمائندے شہزاد ملک کے مطابق پی سی بی حکام کی جانب سے بنگلہ دیش کرکٹ بورڈ کو کہا گیا ہے کہ بنگلہ دیش میں صورتحال خراب ہے اپنی نیشنل ٹیسٹ ٹیم کو وقت سے پہلے پاکستان بھیج دیں تاکہ ٹیسٹ اسکواڈ پاکستان میں میچ سے قبل ٹریننگ اور پریکٹس کر سکے۔
نمائندہ اے آر وائی نیوز کے مطابق بنگلہ دیش بورڈ نے تاحال پی سی بی کی اس پیشکش کا کوئی واضح جواب نہیں دیا ہے۔
انہوں نے بتایا کہ بنگلہ دیش کی موجودہ سیاسی صورتحال کے سبب بنگلہ دیش کرکٹ ٹیم کا دو دن سے ٹریننگ سیشن نہیں ہوا، شیڈول کے مطابق بنگلادیش ٹیسٹ ٹیم نے 17 اگست کو پاکستان پہنچنا ہے۔
یاد رہے کہ پاکستان اور بنگلہ دیش کے درمیان پہلا ٹیسٹ راولپنڈی میں 21 اگست کو جبکہ دوسرا ٹیسٹ 30 ستمبر کو کراچی میں کھیلا جائے گا۔
واضح رہے کہ پاکستان اور بنگلہ دیش کی ٹیمیں 2001 سے اب تک ہوم گراؤنڈ پر 13 بار ٹیسٹ میچز میں ایک دوسرے کے مدمقابل آئی ہیں جس میں پاکستان ناقابلِ شکست ہے جبکہ ایک ٹیسٹ میچ ڈرا ہوا تھا۔
