اسلام آباد : پاکستان تحریک انصاف کے رہنما سینیٹر اعظم سواتی نے کہا ہے کہ نام نہاد جمہوری دور میں ایک سینیٹر کو ماورائے آئین و قانون تشدد کا نشانہ بنایا گیا۔
بنی گالا میں چیئرمین پی ٹی آئی عمران خان کے ہمراہ صحافیوں سے گفتگو کرتے ہوئے اعظم سواتی نے کہا کہ اللہ تعالیٰ نے پاکستان کو ایسا لیڈردیا ہے جس کی وجہ پاکستانی قوم درحقیقت ایک قوم بن چکی ہے۔
انہوں نے کہا کہ نام نہاد جمہوری دور میں سینیٹر کو ماورائے آئین و قانون تشدد کا نشانہ بنایا گیا، کسٹوڈین ٹارچر پر اعلیٰ عدلیہ کو سوموٹو لینا چاہیے۔
سینیٹر اعظم سواتی کا کہنا تھا کہ موجودہ دور حکومت میں میڈیا نمائندگان پر بھی بدترین تشدد کیا گیا، ایوان بالا کے نمائندے کو حراست میں لے کر برہنہ کیا گیا اورتشدد کیا گیا۔
انہوں نے کہا کہ وہ لوگ کون تھے جنہوں نے عمران خان کے اس سپاہی کو گرانے کی کوشش کی، اللہ نے پاکستان کو ایسا لیڈر دیا ہے جس کی وجہ سے قوم ایک قوم بن چکی ہے۔
پی ٹی آئی رہنما کا کہنا تھا کہ نام نہاد جمہوری دور میں سینیٹر کو ماورائے آئین وقانون تشدد کا نشانہ بنایا گیا جو میرے ساتھ سلوک کیا گیا انصاف کے ہر فورم پرجاؤں گا۔
اعظم سواتی نے کہا کہ انصاف کے تقاضے پورے کرنے کیلئے ہر فورم کا دروازہ کھٹکھٹاؤں گا، صحافیوں نے کیا جرم کیا ہے جس کی پاداش پر ایسی سزائیں دی جارہی ہیں۔
تحریک انصاف کے سینیٹر نے کہا کہ جمہوریت اور اقتدار اس طریقے سے نہیں چل سکتے، سینئر پارلیمنٹیرینز کو انصاف نہیں مل سکتا تو عدل کا نظام ختم ہوچکا ہے۔
اس موقع پر چیئرمین پی ٹی آئی عمران خان نے کہا کہ اہلکار رات کی تاریکی میں اعظم سواتی کے گھر میں وارنٹ کے بغیر دیواریں پھلانگ کرگئے، چھوٹے بچوں کے سامنےاعظم سواتی پر تشدد کیا گیا۔
اعظم سواتی کا جرم یہ تھا کہ انہوں نے کسی بڑے آدمی پر تنقید کردی تھی، پہلے تو پوچھا جائے کہ اعظم سواتی کو کس کے حوالے کیا گیا تھا؟ وہ کون تھے جنہوں نے برہنہ کرکے اعظم سواتی پر تشدد کیا ایسے ہی شہبازگل اور صحافی جمیل فاروقی کے ساتھ بھی سلوک کیا گیا۔
