کراچی : سیکیورٹی گارڈ نے دوران ڈیوٹی بینک کے لاکرز توڑ کر ان کا صفایا کردیا، ملزم 65 لاکھ سے زائد رقم لے کر ساتھیوں سمیت فرار ہوگیا، ڈیفنس پولیس نے مقدمہ درج کرلیا۔
تفصیلات کے مطابق گزشتہ چھ مہینے سے بینک میں مسلسل نائٹ ڈیوٹی کرنے والا سیکیورٹی گارڈ اسی بینک کا صفایا کرگیا۔ ڈیفنس کراچی میں نجی بینک پر ڈیوٹی دینے والا گارڈ لاکرز کاٹنے کیلئے کٹر ساتھ لایا تھا۔
بنک کی تجوری سے لاکھوں روپے اڑالیے،10لاکرز بھی خالی کردیئے، ذرائع کے مطابق ملزم نے 65لاکھ روپے سے زائد رقم پر ہاتھ صاف کیا جس میں ڈیڑھ لاکھ روپے مالیت کے امریکی ڈالرز بھی شامل ہیں۔
اس حوالے سے پولیس نے بتایا ہے کہ منظور نامی سیکورٹی گارڈ نے واردات سے پہلے الارم سسٹم بند کیا پھر سی سی ٹی وی کیمرے غیر فعال کیے، بینک میں وہ اکیلا تھا تاہم ممکنہ طور پر اس کے ہمراہ دو اور ساتھی بھی موجود تھے جو بینک کے باہرہی کھڑے رہے۔
پولیس اور دیگر تفتیشی ٹیموں نے بینک سے شواہد اکٹھے کرلیے ہیں اور ملزم کی گرفتاری کے لیے چھاپے مارے جارہے ہیں۔
واضح رہے کہ کراچی میں بینکوں کئے لاکرز ٹوٹنے کی یہ پہلی واردات نہیں ہے۔ اس سے قبل گزشتہ سال آٹھ جنوری کو بھی بینک کے گارڈ نے ستائیس لاکرز کا صفایا کردیا تھا۔
