نوکیا فون بنانے والی کمپنی نے کھلونے بنانے والی کمپنی کے ساتھ مل کر ’باربی ہینڈ سیٹ‘ لانچ کر دیا ہے، کیا آپ جانتے ہیں کہ اس میں کون سی اہم سہولت دستیاب نہیں ہے؟
بدھ کو نوکیا برانڈڈ فون بنانے والی فن لینڈ کی کمپنی ’ایچ ایم ڈی گلوبل‘ نے اپنی ویب سائٹ پر کہا ہے کہ اس نے کھلونا بنانے والی کمپنی میٹل کے ساتھ مل کر باربی برانڈڈ سیل فون لانچ کر دیا ہے۔
اس فون کی خوبی یہ ہے کہ اس میں انٹرنیٹ یا سوشل میڈیا ایپس کی سہولت بالکل دستیاب نہیں ہے، یہ ایک نہایت خوب صورت گلابی، کمپیکٹ فولڈ ایبل فون ہے، جس میں کلاسک ڈیزائن اور اسمارٹ فون کی چند خصوصیات شامل ہیں۔
اس فون پر صرف کالز اور ٹیکسٹ میسیجز ہی کیے جا سکتے ہیں، اور اس کی قیمت 99 پاؤنڈ، یا 131.24 ڈالر ہے۔ یہ فون باربی ڈول کی 65 ویں سال گرہ کے موقع پر لانچ کیا گیا ہے، گزشتہ سال باربی فلم کی زبردست کامیابی نے بھی اس ماڈل کے سامنے آنے میں اہم کردار ادا کیا ہے۔
ایک ریسرچ فرم ’سی سی ایس انسائٹس‘ کے اندازے کے مطابق باربی برانڈ کے اس فون کے برطانیہ میں 4 لاکھ سے زیادہ تعداد میں فروخت کا امکان ہے۔
