پشاور( 16 جولائی 2025): تحریکِ انصاف کے رہنما و مشیرِ اطلاعات کے پی بیرسٹر سیف کا پیٹرول مصنوعات کی قیمتوں میں مسلسل اضافے پر ردعمل آگیا ہے۔
تفصیلات کے مطابق پٹرولیم مصنوعات کی قیمتیں بڑھنے پرمشیر اطلاعات بیرسٹر ڈاکٹر سیف نے کہا کہ ڈیڑھ ماہ کے دوران پٹرولیم مصنوعات کی قیمتوں میں 30 روپے کا اضافہ کیاگیا۔
انہوں نے کہا کہ ہر پندرہ دن بعد عوام پر پیٹرول بم گرایا جا رہا ہے، پیٹرول کی قیمتوں میں مسلسل اضافے پر خاموشی بھی سوالیہ نشان ہے، عالمی مارکیٹ میں پیٹرول سستا جبکہ پاکستان میں مہنگا ہو رہا ہے۔
بیرسٹر ڈاکٹر سیف کا کہنا تھا کہ عوام پہلے ہی مہنگائی کی چکی میں پس رہے ہیں اب مزید مہنگائی کا طوفان آئیگا، پیٹرول مہنگا ہونے سے اشیائے خورد و نوش سمیت ہر چیز مہنگی ہوتی ہے۔
بیرسٹر سیف نے مزید کہا کہ پی ٹی آئی دور میں 150 روپے فی لیٹر پیٹرول پر شور مچانے والے آج کیوں خاموش ہیں؟ عوام کو ریلیف دینا اور سکھ کا سانس دلانا حکومت کی ترجیحات میں شامل نہیں ہے۔
خیبرپختونخواحکومت کے مشیر اطلاعات بیرسٹر سیف نے کہا ہے کہ پاکستان اپنے دفاع پر کوئی سمجھوتا نہیں کرے گا۔
تفصیلات کے مطابق خیبرپختونخواحکومت کے مشیر اطلاعات نے ایک بیان میں کہا کہ بھارت کے فالس فلیگ آپریشن کا بھانڈا خود اسکے اپنے جنرل نے پھوڑ دیا ہے۔
انہوں نے کہا کہ بھارتی جنرل کا بیان مودی سرکار کے فاشسٹ نظام کے منہ پر زوردار طمانچہ ہے، مودی فالس فلیگ آپریشن کا دفاع کرنے میں مکمل ناکام ہوچکا ہے۔
بیرسٹر سیف کا کہنا تھا کہ بھارت کےسول وملٹری افسران خودان فالس فلیگ آپریشنزکےگواہ بن رہے ہیں، مودی کا جنگی جنون پورے خطے کے امن کے لیے خطرہ بن چکا ہے۔
انہوں نے کہا کہ بھارت پاکستان میں ریاستی دہشت گردی میں ملوث ہے جس کے ثبوت بھی موجود ہیں، بھارت کو جارحیت سے باز رہنا چاہیے ورنہ سنگین نتائج بھگتنا ہوں گے، پاکستان اپنے دفاع پر کوئی سمجھوتا نہیں کرےگا۔
شاور: مشیراطلاعات خیبرپختونخوا بیرسٹر سیف نے کہا ہے کہ وزیراعظم شہباز شریف اور وزیر خزانہ ایک پیج پر نظر نہیں آتے ہیں۔
وفاقی وزیر خزانہ محمد اورنگزیب کے بیان پر ردعمل دیتے ہوئے بیرسٹر سیف کا کہنا تھا کہ وزیر خزانہ نے مہنگائی کے بے قابو ہونے اور ایف بی آر میں کرپشن کا اعتراف کیا ہے، محمد اورنگزیب کے اعترافی بیان نے حکومت کے دعوؤں کا پول کھول دیا۔
ان کا کہنا تھا کہ وزیر خزانہ نے حکومت کے جھوٹے دعوؤں کی حقیقت عوام کے سامنے رکھ دی جس سے لگتا ہے کہ وزیراعظم شہباز شریف اور وزیرخزانہ ایک پیج پر نظر نہیں آتے۔
بیرسٹرسیف نے کہا کہ وزیر خزانہ کے اعترافی بیان کے بعد شہباز شریف کی آواز کو رنگ ٹون سے ہٹا دینا چاہیے، عوام نے شہبازشریف کی رنگ ٹون سن کر ایک دوسرےکو کال کرنا بھی چھوڑ دیا ہے، حکومت دعوؤں کے بجائے عوام کو حقیقی ریلیف فراہم کرے۔
یاد رہے کہ گزشتہ روز وزیر خزانہ محمد اورنگزیب نے مہنگائی میں کمی کے اثرات عوام تک نہ پہنچنے اور ایف بی آر میں کرپشن روکنے میں حکومت کی ناکامی کا اعتراف کیا تھا، ان کا کہنا تھا کہ چینی، مرغی اور دالوں کی قیمتوں پر نظر ہے، عالمی سطح پر قیمتیں کم ہو رہی ہیں اور یہاں اوپر جارہی ہیں، مڈل مین من مانی کر رہے ہیں۔
محمد اورنگزیب نے ایف بی آر میں کرپشن کا اعتراف کرتے ہوئے تاجروں سے اپیل کی کہ رشوت نہ دیں اور کہا کہ ایسے لوگوں کو فارغ کر رہے ہیں جو بدعنوانی میں ملوث ہیں، رشوت کی تالی دونوں ہاتھوں سے بجتی ہے، اگر ٹیکس نظام میں رشوت لینے والے موجود ہیں تو انہیں رشوت دینے والے بھی ہیں۔
لاہور : بانی پی ٹی آئی سے وزیراعلیٰ کے پی علی امین گنڈا پور نے اڈیالہ جیل میں اہم ملاقات کی جس میں موجودہ سیاسی حالات اور پارٹی کے اندرونی معاملات پر تفصیلی گفتگو ہوئی۔
اس حوالے سے اے آر وائی نیوز کی رپورٹ کے مطابق بانی پی ٹی آئی سے بیرسٹرسیف اورعلی امین گنڈاپور نےاڈیالہ جیل میں طویل ملاقات کی جس کا دورانیہ ڈھائی گھنٹے تک تھا۔
اس حوالے سے ذرائع کا دعویٰ ہے کہ مذکورہ ملاقات کا محوراسٹیبلشمنٹ سے مذاکرات تھا، ذرائع کا کہنا ہےکہ علی امین گنڈاپور اور بیرسٹر سیف اس سلسلے میں بانی کو قائل کرنے میں کامیاب رہے۔
،ذرائع کے مطابق بانی نے علی امین گنڈاپور کی پیشکش پر نیم رضامندی ظاہر کی علی امین گنڈا پور نے صوبائی معاملات پر بھی ان کو بریفنگ دی۔
ملاقات میں رہنماؤں کے درمیان قیادت پر سوشل میڈیا پر جاری تنقید بھی زیر بحث آئی، ملاقات میں اداروں سے ٹکراؤ کی پالیسی پر نظرثانی پر بات ہوئی۔
ذرائع کا کہنا ہے کہ بانی نے علی امین اور بیرسٹر سیف کو اسٹیبلشمنٹ سے مذاکرات کا ٹاسک دے دیا ہے تاہم ،اسٹیبلشمنٹ سے مذاکرات میں پیشرفت تک خفیہ رکھنے پر اتفاق کیا گیا۔ ذرائع نے مزید بتایا ہے کہ آنے والے چند دنوں میں علی امین گنڈا پور بانی سے ایک اور ملاقات کریں گے۔
اس کے علاوہ ملاقات میں پارٹی کے اندرونی معاملات اور حکومتی امور پر تفصیلی گفتگو ہوئی، اسپیکر کے پی اسمبلی بابر سلیم اور اعظم سواتی کے درمیان تنازع پر بھی گفتگو کی گئی۔
ذرائع کا کہنا ہے کہ بابر سلیم کی اسپیکر شپ ختم ہونے کا خطرہ ٹل گیا، بانی نے علی امین کو بابر سلیم اور اعظم سواتی کا تنازع حل کرنے کی ہدایت کی۔ ذرائع کے مطابق علی امین گنڈا پور نے ان کو تمام سیاسی اور پارٹی معاملات سے آگاہ کرکے اعتماد میں لیا۔
بانی پی ٹی آئی نے دہشت گردی کے خلاف وزیراعلیٰ کی پالیسی اور ان کے مؤقف کی تائید کی بانی پی ٹی آئی نے کے پی حکومت سے متعلق علی امین کو تمام اختیارات دے دیئے، بانی پی ٹی آئی نے تمام سیاسی جماعتوں کے ساتھ مل کر حکمت عملی بنانے کی بھی ہدایت کی۔
قبل ازیں وزیر اعلیٰ خیبرپختونخوا علی امین گنڈا پور نے گزشتہ روز ایک بیان میں کہا تھا کہ بانی کی باعزت رہائی کے لیے ہر حد تک جائیں گے۔
ڈی آئی خان میں غیر رسمی گفتگو کرتے ہوئے انہوں نے کہا کہ بانی 600 دنوں سے زائد غیرقانونی پابند سلاسل ہیں، ان کی جرأت اور بہادری سے یہ لوگ حواس باختہ ہیں۔
پشاور: ترجمان خیبر پختونخوا حکومت بیرسٹر محمد علی سیف نے چینی کی قیمتوں کے معاملے پر وفاقی حکومت پر سخت تنقید کی ہے۔
مشیر اطلاعات کے پی بیرسٹر سیف نے اپنے بیان میں کہا کہ چینی کی قیمت اور حکومتی وزرا کی تنخواہیں بڑھ رہی ہیں، اور اس اضافے کی وجہ یہ ہے کہ کارخانوں اور حکومت کے مالکان ایک ہیں۔
بیرسٹر سیف نے کہا ’’خام چینی درآمد کا حکومتی فیصلہ دراصل حکمران چینی مافیا کو فائدہ پہنچانے کی کوشش ہے، شوگر مافیا نے ناجائز منافع سے اپنی عید تو میٹھی کر لی لیکن عوام کی عید پھیکی کر دی ہے۔
کے پی ترجمان نے کہا ’’عرفان صدیقی سے اپیل ہے کہ وزیر اعظم سے کہیں تنخواہ لے لیں لیکن چینی کی قیمت کم کرا دیں۔‘‘
بیرسٹر سیف نے کہا سرکولیشن سمری سے وزرا کی تنخواہوں میں 188 فی صد اضافے کی منظوری لی گئی ہے، اس سے 20 مارچ کے وفاقی کابینہ کا رضا کارانہ کام کرنے کا اعلان جھوٹ ثابت ہو گیا ہے۔
مشیر اطلاعات نے پاک افغان مسئلے پر کہا کہ ہم پہلے دن سے کہہ رہے ہیں کہ معاملات کا حل مذاکرات ہیں، وفاق کو افغانستان کے ساتھ باضابطہ رابطہ کرنا چاہیے، اس سلسلے میں نمائندہ خصوصی محمد صادق کا دورہ افغانستان اچھی پیش رفت ہے۔
بیرسٹر سیف نے اے آر وائی نیوز کے پروگرام ’’اعتراض ہے‘‘ میں گفتگو کرتے ہوئے کہا کہ افغان سرحدی علاقے کو کوئی کنٹرول نہیں کر سکتا، یہ دنیا کی مشکل ترین سرحدوں میں سے ایک ہے، وفاق اگر ہمیں ہمارے پیسے دے دے تو دہشت گردی کی جنگ میں وفاق کی ضرورت ہی نہ پڑے۔
پشاور: خیبر پختونخوا حکومت کے ترجمان بیرسٹر سیف نے کہا ہے کہ اطلاعات ہیں کہ میاں نواز شریف نے اپنی ٹیم کو حکومت پی ٹی آئی مذاکرات ناکام بنانے کا مشن سونپ دیا ہے۔
تفصیلات کے مطابق ترجمان کے پی حکومت بیرسٹر سیف نے ایک بیان میں کہا ہے کہ گزشتہ دنوں ہونے والی ملاقات کے بعد نواز شریف کیمپ میں کھلبلی مچ گئی ہے، اور انھوں نے مذاکرات کی ناکامی کے لیے اپنی ٹیم کو مشن سونپا ہے۔
انھوں نے دعویٰ کیا کہ حکومتی مذاکراتی کمیٹی کو غیر مؤثر بنانے کا کام شروع ہو چکا ہے، ایسے عناصر سرگرم ہو چکے ہیں جو نہیں چاہتے کہ سیاسی استحکام کی راہیں کھلیں، جب کہ پی ٹی آئی ملک میں امن کے لیے مذاکرات کی راہ پر چل رہی ہے۔
بیرسٹر سیف کا کہنا تھا کہ غیر منتخب ٹولہ ناجائز اقتدار کو بچانے کے لیے مذاکرات ناکام بنانے کے مشن پر ہے، حکومتی وزرا حلف کا پاس رکھتے ہوئے ملاقات کے معاملے پرسیاست نہ کریں۔
دوسری طرف حکومت سے مذاکرات کے حوالے سے چیئرمین پی ٹی آئی نے کہا ہے کہ بانی نے کہا ہے کہ ان کے خلاف عدالتی فیصلے کے باوجود مذاکرات جاری رہیں گے، لیکن اگر 7 دن میں کیمشن پر پیش رفت نہیں ہوئی تو مذاکرات نہیں ہوں گے۔
واضح رہے کہ 190 ملین پاؤنڈ ریفرنس میں بانی پی ٹی آئی کو 14 سال قید، 10 لاکھ روپے جرمانے کی سزا سنا دی گئی ہے، جب کہ بشریٰ بی بی کو 7 سال قید، اور 5 لاکھ روپے جرمانہ کیا گیا ہے، سزا سنائے جانے کے بعد بشریٰ بی بی کو کمرہ عدالت سے گرفتارکیا گیا۔
احتساب عدالت نے تحریری فیصلے میں کہا بانی پی ٹی آئی کرپشن میں ملوث پائے گئے، بشریٰ بی بی نے جرم میں معاونت کی، احتساب عدالت نے القادر یونیورسٹی کو سرکاری تحویل میں لینے کا بھی حکم دے دیا ہے۔ یہ فیصلہ جج ناصر جاوید رانا نے اڈیالہ جیل میں سنایا۔
پشاور: حکومت خیبر پختونخوا کے مشیر اطلاعات بیرسٹر سیف نے کہا ہے کہ کرم تنازع کے حل کیلئے دونوں فریقین کے درمیان عمومی طور پر اتفاقِ رائے ہو چکا ہے۔
تفصیلات کے مطابق حکومت خیبر پختونخوا کے مشیر اطلاعات بیرسٹر سیف نے ایک بیان میں کہا ہے کہ کوہاٹ میں کرم تنازعے کے حل کے لیے جرگہ رات گئے تک جاری رہا جس میں دونوں فریقین کے درمیان عمومی طور پر اتفاقِ رائے ہو چکا تاہم صرف چند نکات پر مشاورت کے لیے ایک فریق نے 2 دن کا وقفہ مانگا ہے۔
بیرسٹر سیف نے کہا کہ اہلسنت نے اپنے عمائدین اور عوام سے مشاورت کے لیے دو دن کا وقت مانگا ہے، جرگے نے باہمی مشاورت کے بعد دو دن کا وقت دے دیا ہے، دو دن کے وقفے کے بعد جرگہ منگل کو دوبارہ شروع ہوگا۔
بیرسٹر سیف کا کہنا تھا کہ جرگے میں تمام بڑے نکات پر اتفاقِ رائے ہو چکا ہے، مشاورت مکمل ہونے کے بعد معاہدے پر دستخط کیے جائیں گے۔
انہوں نے کہا کہ اپیکس کمیٹی کے فیصلے کے مطابق بنکرز اور اسلحہ کا خاتمہ یقینی بنایا جائے گا، کےپی حکومت تنازع کے مستقل اور پائیدار حل کیلئے پُرعزم ہے، وزیراعلیٰ اور گرینڈ جرگے کی کوششوں سے تنازع حل ہونے کے قریب ہے۔
بیرسٹر سیف کا مزید کہنا تھا کہ کمشنر کوہاٹ سمیت پوری انتظامیہ تنازع کے خاتمے، مستقل امن کیلئے کوششیں کر رہی ہے، وزیر اعلیٰ نے امدادی کارروائیوں کیلئے اپنا ہیلی کاپٹر وقف کر دیا ہے، ادویات پہنچانے سمیت عوام کو فضائی سروس بھی فراہم کی جا رہی ہیں۔
پشاور: ترجمان کے پی حکومت بیرسٹر سیف کا کہنا ہے کہ کرم کے معاملے پر رواں ہفتے اہم پیش رفت متوقع ہے، دو دن کے وقفے کے بعد جرگہ دوبارہ شروع ہوگا۔
اے آر وائی نیوز کے مطابق ترجمان کے پی حکومت بیرسٹر سیف نے بتایا کہ جرگہ کرم تنازع کے پائیدار امن کیلئے معاہدہ کرے گا، فریقین اور کرم کے عوام امن دشمن عناصرکی سازشوں سے خبردار رہیں۔
اُنہوں نے کہا کہ سوشل میڈیا پر امن دشمن عناصر کے پروپیگنڈے پر کان نہ دھریں، راستے کھولنے کے حوالے سے بھی جلد خوشخبری ملے گی۔
ترجمان کے پی حکومت کا کہنا تھا کہ ادویات پہنچانے اور مریضوں کو نکالنے کیلئے وزیراعلیٰ کا ہیلی کاپٹر موجود ہے، ہیلی کاپٹر کے ذریعے 180 سے زائد افراد پہنچائے گئے ہیں۔
اُنہوں نے کہا کہ صوبائی ڈیزاسٹرمینجمنٹ اتھارٹی کی ہیلپ لائن 1700 مکمل فعال ہے۔
واضح رہے کہ گزشتہ روز صوبائی حکومت کے ہیلی کاپٹر نے پشاور سے کرم کے لیے 2 پروازیں کیں، ہیلی کاپٹر کے ذریعے پارا چنار سے 14 مریضوں سمیت 53 افراد کو پشاور منتقل کیا گیا۔
ہیلی کاپٹر کی پہلی پرواز سے جرگہ ممبران اور سرکاری عملے پر مشتمل 16 افراد کو پارا چنار لایا گیا، آج دوسری پرواز کے ذریعے پاراچنار سے 27 لوگوں کو ٹل منتقل کیا گیا، ہیلی کاپٹر کے ذریعے تیسری پرواز سے ٹل میں پھنسے افراد کو پارا چنار لایا جائے گا۔
آج ہیلی کاپٹر کے ذریعے مجموعی طور پر 100 سے زائد افراد کو منتقل کیا جائے گا، دواؤں کی فراہمی کے لیے ہیلی کاپٹر کی کل 7 پروازیں کرم گئیں، 6 کروڑ روپے مالیت سے زائد کی دوائیں ہیلی کاپٹر کے ذریعے کرم پہنچائی گئیں۔
خیبر پختونخوا کے وزیر اعلیٰ نے کہا موجودہ صورت حال میں کرم کے عوام کی مشکلات کا بخوبی احساس ہے، صوبائی حکومت کرم کے عوام کے لیے تمام دستیاب وسائل بروئے کار لا رہی ہے، علی امین گنڈاپور نے کہا امن اور کرم کے معاملے کے مستقل حل کے لیے سنجیدہ اقدامات کیے جا رہے ہیں۔
کوہاٹ: مشیر اطلاعات خیبر پختونخوا بیرسٹر محمد علی سیف نے کہا ہے کہ ضلع کرم کو بھاری ہتھیاروں سے پاک کرنا ناگزیر ہے۔
تفصیلات کے مطابق مشیراطلاعات کے پی بیرسٹر سیف نے ضلع کرم کے گرینڈ جرگے سے خطاب میں کہا کہ ہمیں نفرتوں کو مٹانا ہوگا، جنگ خود بخود ختم ہو جائے گی، کرم کی مرکزی شاہراہ جلد آمد و رفت کیلئےکھول دی جائیں گی۔
بیرسٹر سیف نے کہا کہ مرکزی شاہراہ پر قائم بنکرز کو عوامی تعاون سے جلد ختم کیا جائے گا، ضلع کرم کو بھاری ہتھیاروں سے پاک کرنا ناگزیر ہے، دونوں فریقین امن چاہتےکچھ عناصر کے مفادات جنگ سے وابستہ ہیں۔
انہوں نے کہا کہ ان عناصر کی نشاندہی عوام کے تعاون کے بغیر ممکن نہیں، ان عناصر کیخلاف حکومت سخت ترین کارروائی کرے گی اور مجھے امید ہے جنگ بندی کا یہ عمل مستقل طور پر جاری رہے گا۔
خیبر پختونخوا کے مشیر اطلاعات کا کہنا تھا کہ گرینڈ جرگے کو اس بار اس مسئلے کا مستقل حل نکالنا ہوگا، صوبائی حکومت آپ کیساتھ ہے امن کے قیام کیلئے ہر قدم اٹھائیگی، وزیراعلیٰ کےپی نے صوبائی سطح پر ایک سپروائزری کمیٹی قائم کی ہے، اس کمیٹی میں سول انتظامی، سیکیورٹی اداروں کے اعلیٰ افسران شامل ہیں۔
خیبر پختونخوا کے مشیر اطلاعات بیرسٹر سیف نے مزید کہا کہ صوبائی حکومت ہیلی کاپٹرکے ذریعے ادویات کی فراہمی جاری رکھے گی، فضائی آمدورفت کی بحالی زیر غور ہے اور چند دنوں میں فیصلہ ہوگا۔
پشاور: مشیراطلاعات خیبرپختونخوا بیرسٹرسیف نے کہا ہے کہ حکومت نے اسلام آباد کو سیل کر کے احتجاج کی کامیابی پر مہر تصدیق ثبت کردی۔
تفصیلات کے مطابق مشیر اطلاعات خیبر پختونخوا بیرسٹر سیف نے بیان میں کہا کہ اسلام آباد کا ملک کے دیگر شہروں سے رابطہ منقطع کردیا گیا، حکومت عوام کی زندگی اجیرن کرنےکی بجائے ان کا حق واپس کرے۔
انہوں نے کہا کہ ہتھکنڈوں کی بجائے جمہوری انداز اپنائیں ورنہ ناکامی آپ کا مقدر بنے گی، موٹروے اور پنجاب کی شاہراہوں کو بند کرنا احتجاج کی کامیابی کا مظہر ہے۔
بیر سٹرسیف نے کہا کہ ہوٹل، تعلیمی ادارے، ہاسٹلز اور لاری اڈے تک بند کرنے پڑے، حکومت نے اپنی سلطنت بچانے کے لئے پورے پاکستان کو بند کردیا۔
انہوں نے مزید کہا کہ کہاں ہیں وہ وزرا جو کہتے تھے 50 لوگ بھی نہیں نکلیں گے، 50 لوگوں کے ڈر سے پورا پاکستان بند کردیا گیا ہے، حکومت کچھ بھی کرلے ان کا خاتمہ یقینی ہے۔
واضح رہے کہ پاکستان تحریک انصاف کے 24 نومبر کے احتجاج اور لانگ مارچ کے اعلان کے پیش نظر وفاقی و پنجاب حکومت نے اقدامات اٹھانے شروع کر دیے ہیں۔
ادھر پنجاب حکومت نے صوبے بھر میں 23 نومبر سے 25 نومبر تک دفعہ 144 کا نفاذ کر دیا ہے جس کے تحت ہر قسم کے احتجاج، جلسے، جلوس، ریلیوں، دھرنوں اور ایسی سرگرمیوں پر پابندی عائد ہو گی۔
