نوڈیرو : پیپلز پارٹی کے چیئرمین بلاول بھٹو زرداری نے کہا ہے کہ ن لیگ کی عوام دشمن پالیسی پرپارلیمنٹ میں آوازاٹھائیں گے، پارلیمنٹ میں آواز نہ سنی گئی تو ملک میں دمادم مست قلندرہوگا۔
ان خیالات کا اظہار انہوں نے نوڈیرو میں بے نظیر شہید کی آٹھویں برسی کے موقع پر اپنے خطاب میں کیا، برسی کے موقع پر ہونے والے مرکزی جلسے سے دیگر رہنماؤں نے بھی خطاب کیا، جن میں وزیر اعلیٰ سندھ سید قائم علی شاہ، اعتزازاحسن، سابق وزیر رحمٰن ملک، سابق وزیراعظم راجا پرویزاشرف، اور دیگر شامل ہیں۔
بلاول بھٹو زرداری نے کہا کہ صوبوں کو کمزورکرنے کی ساز ش ہورہی ہے، قومی ایکشن پلان نہیں ن لیگ پلان پرعمل درآمد ہورہاہے، وزیراعظم ماں کا زیورسمجھ کراسٹیل مل اورپی آئی اے کی بولی لگارہے ہیں ایک شخص اسلام آباد میں بیٹھ کر داعش سے پیسےلےرہا ہے۔
انہوں نے کہا کہ اگر اداروں کی نجکاری کی گئی تو اس کی بھر پور مزاحمت کرینگے۔ بلاول بھٹو زرداری نے کہا کہ گڑھی خدا بخش کے مزارات گواہ ہیں کہ پیپلز پارٹی ہی دہشت گردوں کے خلاف لڑی۔ حکمران بادشاہوں کی طرح حکم چلا رہے ہیں۔ ملک کے اہم فیصلے بند کمروں میں کئے جارہے ہیں۔
انہوں نے کہا کہ آج میں شہیدوں کے مزاروں پر کھڑا ہو کر وعدہ کرتا ہوں کہ آئین اور قوم کی سربلندی کیلئے شہیدوں کا مشن مکمل کرونگا۔
بینظیر بھٹو شہید کی برسی کے جلسے میں پی پی رہنما رینجرز اختیارات کے معاملے پر وفاقی حکومت کے خلاف یک زبان ہو گئے۔
وزیر اعلیٰ سید قائم علی شاہ کا خطاب
سندھ کے سائیں قائم علی شاہ نے بھی پنجاب کے چوہدری پربرھمی کا اظہار کرتے ہوئے کہا کہ وفاقی وزیرداخلہ چوہدری نثارسندھ پر قبضہ کرنا چاہتے ہیں ،پتہ نہیں وہ اپنے آپ کوکیا سمجھتےہیں،انہوں نے کہا کہ جمہوریت میں ایک شخص کو فیصلے سنانے کاحق نہیں ہوتا،
اعتزاز احسن کا خطاب
اعتزازاحسن نے کہا کہ ڈاکٹرعاصم دہشت گرد نہیں، وہ رینجرز کے اختیارمیں نہیں آتے۔ اعتزازاحسن کا کہنا تھا کہ ڈاکٹرعاصم نے کرپشن کی تو سزا میں رکاوٹ نہیں بنیں گے، رینجرزنےایل ڈی اے ریکارڈاٹھایا توشہبازشریف کوپتہ چلےگا۔
راجہ پرویز اشرف کا خطاب
سابق وزیراعظم راجا پرویزاشرف نے کہا کہ وفاقی حکومت سندھ کے وزیراعلٰی کی شکایت کا فوری ازالہ کرے۔ انہوں نے کہا کہ پیپلزپارٹی کو کمزور سمجھنے والے احمقوں کی جنت میں رہتے ہیں ،بے نظیر کی شہادت پاکستان کا بہت بڑا نقصان ہے ۔
رحمٰن ملک کا خطاب
سابق وزیرداخلہ رحمان ملک نے کہا کہ ماضی میں ہمارے ساتھ بہت زیادتیاں ہوئیں،اب نہیں ہونےدیں گے۔ رحمان ملک نے مزید کہا کہ قسم کھا کرکہتا ہوں کہ بےنظیربھٹو شہید نےکوئی این آراوسائن نہیں کیا۔
انہوں نے بتایا کہ محترمہ سےکہا گیا تھا کہ تمام کیس ختم کردیں گے،آپ الیکشن کے بعد آئیں،رحمان ملک نے کہا کہ بےنظیربھٹوکی قبرسے آواز آرہی ہے کہ مجھے انصاف کیوں نہیں ملا۔
