کھجور ایسا بابرکت ، لذیز اور شیریں پھل ہے، جس کا قرآن کریم میں کئی بار ذکر آیا، حضور اکرم صلی اللہ علیہ وسلم نے کھجور کے پھل کو بے حد پسند فرمایا جب کہ یہ انبیاء اور صالحین کی پسندیدہ غذا رہی ہے۔
کھجور زیادہ تر خلیج فارس کے علاقوں میں پائی جاتی ہے، دنیا کی سب سے عمدہ اور مفید کھجور مدینہ المنورہ کی عجوہ کھجور ہے، عجوہ کھجور میں ہر بیماری کی شفاء ہے۔ اس کو حضوراکرم صلی اللہ علیہ وسلم نے بویا تھا۔ یہ خصوصیت صرف مدینہ کی عجوہ کھجور کو حاصل ہے۔
جدید سائنس نے بھی ثابت کر دیا ہے کہ کھجور ایک ایسا پھل ہے، جس میں انسانی جسم کو درکار تمام ضروری غذائی اجزاء کی بھاری مقدار پائی جاتی ہے، جدید تحقیق سے ثابت ہوا ہے کہ کھجور گلوکوز اور فرکٹوز کی شکل میں قدرتی شکر پیدا کرتی ہے، جو فوراََ جزو بدن بن جاتی ہے۔
افطاری کے وقت کھجور کا استعمال سنت مبارکہ بھی ہے اور طبی حوالے سے بھی بہت مفید ہے۔
کھجور کی غذائیت اور فوائد
شدید گرمی میں جسم کی قوت اور توانائی دوبارہ بحال کرنے کیلئے کھجور بہترین پھل ہے۔
رمضان المبارک میں افطار کے وقت کھجور کا استعمال اس کی افادیت کا منہ بولتا ثبوت ہے کیونکہ دن بھر فاقہ کے بعد توانائی کم ہوجاتی ہے اس لیے افطاری ایسی مکمل اور زود ہضم غذا سے کرنے کی ضرورت ہوتی ہے، جو زیادہ سے زیادہ طاقت و توانائی فراہم کرسکے اور کھجور یہ تمام مقاصد فوراً پورا کردینے کی اہلیت رکھتی ہے۔
کھجور میں پائے جانے والے نمکیات اور معدنیات معدہ کی بڑھتی ہوئی تیزابیت کو اعتدال پر لاتے ہیں۔ اس کے علاوہ ان کی وجہ سے معدہ اور آنتوں پر سکون دینے والے اثرات مرتب ہوتے ہیں۔ خاص طور پر وہ افراد جو معدہ کے السر کے مریض ہوں، ان کے لئے کھجور بے حد مفید ہے۔
کھجور وٹامن اے کا بہترین ذریعہ ہے، جو جسم کی جلد کو چمک دار ، صاف اور صحت مند رکھنے کے علاوہ آنکھوں کی صحت خصوصاً بینائی پر مثبت اثرات مرتب کرتا ہے اور اندرونی اعضاء کی اندرونی تہوں اور جھلیوں کو صحت مند رکھنے کے لئے انتہائی اہمیت کا حامل ہے۔ تحقیقات سے ثابت ہوا ہے کہ وٹامن اے منہ ، خوراک کی نالی اور پھیپھڑوں کے سرطان سے بچانے میں اہم رول ادا کرتا ہے۔
کھجور تازہ خون پیدا کر کے قوت اور توانائی میں اضافہ کرتی ہے اور اعصابی کمزوری، کام کی زیادتی سے پیدا شدہ تھکاوٹ، کمر درد، پٹھوں کا درد، پٹھوں کا کھچاؤ، ہاتھ پاؤں سن ہونے اور دیگر بلغمی امراض کیلئے مفید غذا ہے۔
کھجور کو تھوڑے سے پانی میں بھگوکر پانی کے ساتھ استعمال کیا جائے تو دل کو تقویت ملتی ہے، نزلہ اور زکام، گلے کی خرابی اور چھینکوں کے بہت فائدہ مند ہے۔ جسم سے زہریلے مادوں کو فوراّ خارج کرتی ہے اور بلڈ پریشرکو کنٹرول کرتی ہے۔
کھجورمیں پوٹاشیم کی اچھی خاصی مقدار موجود ہوتی ہے، پوٹاشیم جسم کے خلیات اور محلولات کا اہم ترین جُز ہے، یہ رفتارِ قلب اور بلڈ پریشر کو قابو میں رکھنے میں اپنا اہم کردار ادا کرتا ہے اور دل کو خون سپلائی کرنے والی شریانوں کی بیماریوں سے بچانے میں معاون ثابت ہوتا ہے۔
کھجور دانتوں اور ہڈیوں کو مضبوط کرتی ہے اور کینسر کے خطرات کم کرتی ہے۔
