دنیا بھر میں مقبول انسٹنٹ میسیجنگ ایپلی کیشن واٹس ایپ کی انتظامیہ نے ایک نئے اور دلچسپ فیچر کی آزمائش شروع کردی ہے، جس کے تحت گروپ ایڈمنز کو مزید اختیار تفویض کیے جائیں گے۔
اب گروپ ایڈمنز یہ فیصلہ کر سکیں گے کہ گروپ انوائٹ لنک اور اس سے منسلک کیو آر کوڈ صرف ایڈمنز تک محدود رہے گا یا تمام ممبران کے لیے بھی قابلِ رسائی ہو۔
واٹس ایپ کی اپڈیٹس پر نظر رکھنے والی ویب سائٹ ویبٹا انفوکے مطابق واٹس ایپ پر گروپ انوائٹ لنک تک رسائی کے نئے فیچر کی آزمائش شروع کردی گئی ہے۔
پہلے صرف گروپ ایڈمنز ہی انوائٹ لنک دیکھ اور شیئر کر سکتے تھے، لیکن اب بیٹا ٹیسٹرز کو یہ سہولت مل رہی ہے کہ اگر ایڈمن چاہیں تو گروپ کے تمام ممبران بھی لنک تک رسائی حاصل کر سکیں گے۔
اس فیچر سے بڑے گروپس یا کمیونٹی چیٹس میں ہر بار ایڈمن سے لنک مانگنے کی ضرورت نہیں پڑے گی، جس سے وقت بچے گا اور ایڈمنز پر اضافی بوجھ بھی کم ہوگا۔
یہ فیچر خاص طور پر ان گروپس کے لیے کارآمد ہوگا جو عوامی مقاصد کے لیے بنائے جاتے ہیں، مثلاً اسٹڈی گروپس، رضاکارانہ سرگرمیاں یا فین کمیونٹیز۔
مثال کے طور پر اگر ایک استاد اپنے طلبہ کے لیے گروپ بناتا ہے تو وہ یہ اختیار دے سکتا ہے کہ طلبہ خود ہی اپنے ہم جماعتوں کو مدعو کرسکیں، بجائے اس کے کہ بار بار استاد سے لنک مانگا جائے۔
دلچسپ بات یہ ہے کہ نئے فیچر کے تحت بھی ڈیفالٹ طور پر مذکورہ فیچر بند رہے گا، جس سے گروپ کی رازداری برقرار رہے گی۔
ابھی مذکورہ فیچر تک محدود صارفین کو رسائی دی گئی ہے اور خیال ظاہر کیا جا رہا ہے کہ جلد ہی اس فیچر کو گروپ سیٹنگز کے ایڈمن ٹولز میں جلد شامل کرکے مزید صارفین کو بھی اس تک رسائی دے دی جائے گی۔
