Tag: Bharatiya Janata Party

نئی دہلی : بھارتی فلم اسٹار شاہ رخ خان اورعامر خان کو دھمکیاں دینے والے بی جے پی کے رہنما یوگی ادتیا ناتھ کو بی جے پی نے وزیراعلیٰ یوپی نامزد کردیا۔ بھارتی میڈیا نے بھی ان کی نامزدگی پرسوالات اٹھا دیئے۔

تفصیلات کے مطابق مسلمانوں کے خلاف زہر اگلنے والے کٹرانتہا پسند ہندو یوگی ادیتا ناتھ کوبھارتیہ جنتا پارٹی کی جانب سے بھارت کی سب سے بڑی ریاست کا وزیراعلٰی نامزد کردیا گیا، یوگی ادیتا ناتھ شاہ رخ اورعامرخان کے سخت مخالف ہیں، وہ عامرخان اور شاہ رخ خان کو بھارت چھوڑنے کا مشورہ بھی دے چکے ہیں۔

اس کے علاوہ نامزد وزیراعلیٰ مزار پر جلاؤ گھیراؤ کے الزام میں جیل بھی جاچکے ہیں۔ بھارتی میڈیا کے مطابق یوگی ادتیا ناتھ کو انتہا پسند اور متنازع سمجھا جاتا ہے تاہم اس کے باوجود انہیں وزیراعلیٰ یو پی کے لیے نامزد کردیا گیا ہے جس پر بھارتی عوام میں بھی تشویش کی لہر دوڑ گئی ہے۔

بی جے پی رہنما یوگی ادتیا ناتھ نے ایک موقع پر شاہ رُخ خان کو کہا تھا کہ اگر انہوں نے فلموں کا بائیکاٹ کیا تو وہ سڑک پر آجائیں گے۔ بہتر ہے پاکستان چلے جائیں ۔ یوگی ادتیا ناتھ نے عامرخان کےخلاف بھی زہر اگلتے ہوئے کہا تھا کہ عامر خان جانا چاہتے ہیں تو جائیں، اچھا ہے آبادی کم ہوجائے گی۔

اس کے علاوہ سال دو ہزار سات میں یوگی ادتیا ناتھ مسلمانوں کے خلاف اشتعال انگیزی اور مزار کے گرد جلاؤ گھیراؤ کرنے کے الزام میں جیل بھی جاچکے ہیں۔ شاید انہی سب کارناموں کی وجہ سے مودی سرکار نے یوگی ادتیا ناتھ کو بھارت کی سب سے بڑی ریاست سونپنے کا ارادہ کیا ہے۔