بھٹ شاہ: معروف صوفی بزرگ شاہ عبدالطیف بھٹائی کے مزار کے قریب گلوکارہ عابدہ پروین کی گاڑی میں مشتبہ شخص کی موجودگی کے بعد اُسے پولیس نے گرفتار کرکے تفتیش کے لیے نامعلوم مقام پر منتقل کردیا۔
تفصیلات کے مطابق گلوکارہ عابدہ پروین شاہ عبدالطیف بھٹائی کے عرس کے دوسرے روز کلام پیش کر کے گاڑی کی طرف واپس لوٹیں تو اُن کی گاڑی میں مشتبہ شخص موجود تھا، جس پر وہ گاڑی سے باہر نکل گئیں اور پولیس سے مدد طلب کی۔
گلوکارہ کی جانب سے مدد طلب کرنے کے بعد سیکیورٹی اداروں نے اُن کی گاڑی میں موجود شخص کو گرفتار کر کے تفتیش کے لیے نامعلوم مقام پر منتقل کردیا ہے۔ نمائندہ کے مطابق عرس کے موقع پر سیکیورٹی کے خاطر خواہ اقدامات نہیں کیے گئے۔
سانحہ شاہ نورانی کے بعد آئی جی سندھ کے احکامات کے بعد صوفی بزرگ کے عرس پر انتہائی سخت سیکیورٹی کے اقدامات کیے گئے تھے تاہم مشتبہ شخص اُن کی گاڑی تک پہنچنے میں نہ صرف کامیاب ہوا بلکہ اندر بھی بیٹھ گیا۔
فنکاروں کو ملنے والی قتل کی دھمکیوں کے باوجود حکومت کی جانب سے فنکاروں کو کوئی مناسب سیکورٹی فراہم نہیں کی جاتی جو کہ ایک سوالیہ نشان ہے۔
واضح رہے کہ اس سے قبل بھی کراچی کے علاقے لیاقت آباد میں معروف قوال امجد صابری کو نامعلوم افراد نے فائرنگ کرکے قتل کردیا گیا تھا ۔۔
