بھوپال: بھارت میں انجینئرنگ کی بے حسی اور نااہلی کی انتہا سامنے آئی ہے، بھوپال میں اچانک 90 ڈگری پر مڑنے والاعجوبہ پل تیار کر لیا گیا ہے جس پر دنیا حیران رہ گئی ہے۔
مدھیہ پردیش کے دارالحکومت بھوپال میں حال ہی میں تعمیر ہونے والا عیش باغ اوور برج اپنی تکنیکی کامیابی کی بجائے اپنے عجیب و غریب موڑ کی وجہ سے خبروں کی زینت بن گیا ہے۔
یہ برج ایک سیدھی سڑک پر چلتے ہوئے اچانک 90 ڈگری کا موڑ مڑ جاتا ہے، وہ بھی بغیر کسی وارننگ سائن کے، موڑ پر دیوار سے گاڑیوں کے ٹکرانے کا خدشہ بھی ہوتا ہے، جس کی وجہ سے مقامی افراد نے پل کو ”کنفیوژن کا مجسمہ“ قرار دے دیا۔
بھارتی میڈیا رپورٹس کے مطابق بھوپال میں عیش باغ اسٹیڈیم کے قریب ریلوے اوور برج نے افتتاح سے پہلے ہی تنازعہ کھڑا کر دیا ہے، مقامی لوگوں نے اس پر حفاظتی خدشات اٹھائے ہیں، ماہرین کا بھی کہنا ہے کہ نوے ڈگری کا اس کا زاویہ مسافروں کے لیے خطرہ بن سکتا ہے، یہ موڑ گاڑیوں کے لیے مشکل ثابت ہوگا اور حادثات کا امکان بڑھ جائے گا۔
عجیب و غریب ڈیزائن والے اس پل کی تصاویر اور ویڈیو سوشل میڈیا پر وائرل ہو گئی ہیں، اور لوگ اس پر بحث کرنے لگے ہیں، جس کے بعد محکمہ تعمیرات عامہ کے وزیر راکیش سنگھ نے ایک بیان میں کہا کہ اس معاملے کی جانچ کی جائے گی۔
#WATCH | Madhya Pradesh | A newly-built bridge constructed in Bhopal’s Aishbagh features a 90-degree turn pic.twitter.com/M1xrJxR45e
— ANI (@ANI) June 12, 2025
