کراچی میں ایک بار پھر خونی ڈمپر لوگوں کی جانوں سے کھیلنے لگے، ملیر ہالٹ کے قریب تیز رفتار ڈمپر نے تین موٹر سائیکل سواروں کو کچل دیا، ایک اور حادثے میں نوجوان موت کے منہ میں چلا گیا مجموعی طور پر بچے سمیت تین افراد جان کی بازی ہار گئے۔
اے آر وائی نیوز کی رپورٹ کے مطابق ملیر حادثے میں13سالہ بچے سمیت 2 افراد جاں بحق اور ایک خاتون زخمی ہوگئی، ریسکیو حکام کا کہنا ہے کہ زخمیوں کو فوری طور پر اسپتال منتقل کیا گیا تاہم زخموں کی بات نہ لاتے ہوئے بچہ اور ایک شخص موت کی وادی میں چلے گئے۔
ریسکیو حکام کے مطابق خونی ڈمپر کی ٹکر سے جاں بحق افراد کی شناخت 50سالہ سلیم اور 13سالہ عفان کے نام سے ہوئی ہے جبکہ زخمی ہونے والی خاتون کا نام روبینہ ہے۔
حادثے کے بعد خونی ڈمپر کا ڈرائیور موقع سے فرار ہوگیا، تاہم جب تک پولیس جائے وقوعہ موقع پر پہنچتی بہت دیر ہو گئی۔
علاوہ ازیں کراچی کے علاقے گلشن معمار حسن شاہ مزار کے قریب تیز رفتار گاڑی نے موٹر سائیکل کو ٹکر ماردی، حادثے میں موٹر سائیکل سوار نوجوان جاں بحق جبکہ اس کے 3 بہن بھائی زخمی ہوگئے۔
ریسکیو حکام کا کہنا ہے کہ جاں بحق ہونے والے نوجوان کی شناخت 20 سالہ اسماعیل کے نام سے ہوئی، زخمیوں میں 4 سالہ دعا، 5 سالہ ریحان اور 6 سالہ انس شامل ہیں۔
مزید پڑھیں : کراچی میں ایک گھنٹے کے دوران 4 شہری جاں بحق
اس سے قبل آج ہی کے دن دوپہر کے وقت کراچی میں ایک گھنٹے کے دوران 2 مختلف حادثات میں 4 شہری جاں بحق اور 6 افراد زخمی ہوگئے تھے۔
ریسکیو حکام کے مطابق جاں بحق ہونے والوں میں 2 خواتین، ایک مرد اور ایک بچی شامل ہے، گلستان جوہر میں 2 اور ملیر کھوکراپار میں ایک حادثہ پیش آیا۔
گلستان جوہر میں بھی تیز رفتار ڈمپر نے موٹر سائیکل سوار کو ٹکر ماری جس کے نتیجے میں ایک مرد اور خاتون جاں بحق اور 2 افراد زخمی ہوگئے جنہیں اسپتال منتقل کر دیا گیا۔
