Tag: bilal akbar

کراچی : ڈی جی رینجرز میجر جنرل بلال اکبر نے کہا ہے کہ کراچی کو دو سو پچاس حصوں میں تقسیم نہیں ہونے دیں گے، محرم کے بعد مذہبی جماعتوں کے غیرقانونی دفاتر بھی گرائیں گے۔

India will not be spared if it enters our border by arynews
یہ بات انہوں نے اپنے ایک بیان میں کہی، میجر جنرل بلال اکبر نے کہا کہ پاکستان کی مسلح افواج دفاع کے لیے بھرپورتیار ہے، دشمن نے ہماری سرحد میں گھسنے کی کوشش کی تو اس کو بھرپور جواب دیاجائے گا۔ انشاءاللہ پاکستان محفوظ رہے گا۔

ان کا کہنا تھا کہ کراچی میں القاعدہ اور کالعدم جماعتوں کے خلاف آپریشن ہوئے، کراچی آپریشن کو نئے فیز میں داخل کر رہے ہیں، مذہبی لبادے میں ایک ٹیم نے بھی سیکٹراور یونٹ آفس بنالیے ہیں، ماہ محرم الحرام کے بعد دیگر جماعتوں کے غیر قانونی دفاتر بھی گرا دیئے جائیں گے۔

ہم لیاری گینگ وارکے دفاتر گرارہے ہیں کوئی سیاسی دفاتر نہیں گرا رہے، ایک کو سزا دیں گے تو دس لوگ باز آجائیں گے۔ چھیالیس دفاتر مالکان کو واپس کیے گئے ہیں۔ جس کو بنانے ہیں سیاسی دفاتربنائے، ہمیں کچھ دوستوں نے انٹربورڈ سے متعلق معلومات دیں ہیں، دہشت گردی سے متعلق ہمیں مزید معلومات فراہم کریں۔

انہوں نے کہا کہ بیرون ملک بھاگے ہوئے لوگ واپس آ جائیں، واپس آنےوالوں کے ساتھ کوئی زیادتی نہیں ہو گی، ان کو ان کے جرائم بتائے جائیں گے کہ عدالتوں کاسامنا کریں، یہ وہ کھڑکی ہے جس سے مفرورافراد مزید جرائم سے بچ سکیں گے۔

ان کا کہنا تھا کہ کراچی میں جرائم کی بنیاد پیسہ ہے، دہشت گردی کیلیے جو پیسہ جمع کیا جارہا ہے اسے روکیں گے، پاک بھارت کشیدگی کے حوالے سے ان کا کہنا تھا کہ سرحد کی خلاف ورزی کے باوجود اسٹاک ایکسچینج نیچےنہیں آیا، امن و امان کی صورتحال دیکھ کر بھارت کے پیٹ میں درد شروع ہوگیا۔

ڈی جی رینجرز نے کہا کہ پاکستان کی مسلح افواج دفاع کے لیے بھرپور تیار ہے، دشمن نے سرحد پر گھسنے کی کوشش کی تو بھرپور جواب دیا جائے گا، چین سمیت پاکستان کے دوست اکھٹے ہوئے ہیں، ایران نے کہا ہے کہ وہ بھی سی پیک کا حصہ بننا چاہتا ہے۔

ڈی جی رینجرز نے کہا کہ کراچی پولیس میں بتدریج بہتری آرہی ہے، امن وامان کتنا بہتر ہوا یہ آپ سب نے دیکھا ہے، پاکستان کے دشمنوں نے کہنا شروع کردیا تھا 2012 پاکستان کا آخری سال ہے۔

جن لوگوں کے پیارے ما رے گئے ہیں انہیں ایک فورم پر لائیں گے اورمتاثرین کے مقدمے بھی لڑیں گے۔ میجر جنرل بلال اکبر نے اس عزم کا اظہار کیا کہ قوم کے بیٹے ملک کی خاطر قربانیاں دیتے رہیں گے۔