ARYNews.tv | Urdu – Har Lamha Bakhabar

Tag: Bilawal Bhatti

  • فاسٹ بولر سر پر گیند لگنے سے زخمی

    فاسٹ بولر سر پر گیند لگنے سے زخمی

    کراچی: قائد اعظم ٹرافی کے دوسرے مرحلے کے میچ میں فاسٹ بولر بلاول بھٹی سر پر گیند لگنے سے زخمی ہوگئے۔

    تفصیلات کے مطابق قائد اعظم ٹرافی میں سدرن پنجاب کی نمائندگی کرنے والے فاسٹ بولر بلاول بھٹی بلوچستان کے خلاف میچ کے دوران بولر خرم شہزاد کی گیند سر پر لگنے سے زخمی ہوگئے۔

    بلاول بھٹی کو سر پر گیند لگنے کے باعث ڈاکٹر کے معائنے کے بعد انہیں میدان سے باہر لے جانے کا فیصلہ کیا گیا۔
    ذرائع کے مطابق بلاول بھٹی کچھ دیر بعد دوبارہ بیٹنگ کے لیے تو میدان میں اترے تو انہیں چکر آنے لگے جس پر انہیں اسپتال منتقل کردیا گیا۔

    پاکستان کرکٹ بورڈ (پی سی بی) کا کہنا ہے کہ فاسٹ بولر کا سی ٹی اسکین کرایا جائے گا جس کے بعد ہی معاملہ مزید واضح ہوسکے گا۔

    سدرن پنجاب کی ٹیم میں بلاول بھٹی کی جگہ فاسٹ بولر محمد عباس کو شامل کرلیا گیا ہے، بلوچستان کے خلاف میچ میں محمد عباس بلاول بھٹی کی جگہ سدرن پنجاب کی نمائندگی کریں گے۔

    واضح رہے کہ بلاول بھٹی نے پاکستان کی نمائنددگی کرتے ہوئے 2 ٹیسٹ، 10 ون ڈے انٹرنیشنل اور 9 ٹی ٹوینٹی میچ کھیلے ہیں، انہوں نے تینوں فارمیٹ میں 17 وکٹیں حاصل کیں۔

    فاسٹ بولر نے پاکستان کے لیے آخری میچ مئی 2015 میں زمبابوے کے خلاف ٹی ٹوینٹی کھیلا تھا۔

  • بینظیربھٹوشہید کے صاحبزادے بلاول نے خون کاعطیہ دیا

    بینظیربھٹوشہید کے صاحبزادے بلاول نے خون کاعطیہ دیا

    لاڑکانہ : بے نظیر بھٹو کی برسی کے موقع پر بلاول بھٹو سمیت پارٹی کارکنوں نے خون کا عطیہ دیا ۔

    تفصیلات کے مطابق بےنظیر بھٹو کی آٹھویں برسی کے موقع پر بلاول بھٹو زرداری نے محبت کے اظہار کا انوکھا طریقہ اپنایا۔ اپنی والدہ بے نظیر بھٹو کی آٹھویں برسی پر بلاول بھٹو نے خون کا عطیہ دے دیا ۔

    چندجیالوں نے بھی خون کا عطیہ دے کر بینظیربھٹو سے عقیدت کا اظہار کیا ۔برسی سے پہلے بلاول بھٹو کی ہدایت پر محکمہ صحت نے خون عطیہ کرنے کا کیمپ لگایا تھا۔

    بلاول نے نوڈیر ہاؤس پہنچ کر خون کا عطیہ دیا۔ پارٹی چیئرمین کی اپیل پر چند کارکنان نے عطیہ تو دیا لیکن ان کی اتنی تعداد نہیں تھی ۔کارکنوں کا کہنا تھا کہ پہلے قائدین اور رہنما آگے آئیں اور خون کا عطیہ دیں اس کے بعد وہ عطیہ دیں گے۔

  • بلاول بھٹی بد ترین بولنگ ریکارڈ ہولڈر بن گئے

    بلاول بھٹی بد ترین بولنگ ریکارڈ ہولڈر بن گئے

    نیپئر:  نیوزی لینڈ کے خلاف دوسرے ون ڈے میں بھی پاکستان کی بولنگ لائن کا شیرازہ بکھر گیا۔ پاکستانی بولرز بری طرح ناکام۔ رہے۔کپتان مصباح الحق نے سب کو آزمایا لیکن کوئی بھی ٹیم کے کام نہ آیا،رہی سہی کسربلاول بھٹی نے پوری کردی۔

    تفصیلات کے مطابق نیوزی لینڈ کے خلاف دوسرا ون ڈے بلاول بھٹی کے لئے ڈراؤنا خواب بن گیا۔ بلاول بھٹی پاکستان کی جانب سے ایک روزہ میچ میں سب سے زیادہ رنز دینے والے بولر بن گئے۔

    کرکٹ میں بیٹسمین تو ہوتے ہیں نروس نائنٹیز کا شکار لیکن اب تو بولرز بھی نائنٹیز کی فیگرز میں آگئے ہیں۔ نیوزی لینڈ کے خلاف دوسرے ون ڈے میں بلاول بھٹی حریفوں کو تو بھٹی میں نہ جھونک سکے لیکن خود رنز کی بھٹی میں جل گئے۔

    بلاول بھٹی نے پاکستان کی جانب سے ون ڈے میں بغیر کوئی وکٹ لئے سب سے زیادہ ترانوے رنز دے کر بدترین بولنگ کا ریکارڈ اپنے نام کرلیا۔

    کیوی بیٹسمینوں نے نیپئیر میں بلاول بھٹی کو دن میں تارے دکھادیئے۔ بلاول بھٹی سے قبل پاکستان کے وہاب ریاض نے بھی جنوبی افریقہ کے خلاف ترانوے رنز دیئے تھے۔

  • جنید خان ورلڈ کپ اسکواڈ سے باہر

    جنید خان ورلڈ کپ اسکواڈ سے باہر

    لاہور: فاسٹ بولرجنید خان فٹنس ٹیسٹ میں ناکام، ورلڈ کپ سے باہر،تفصیلات کے مطابق انجرڈ فاسٹ بولر جنید خان لاہورمیں ہونے والے  دو روزہ فٹنس ٹیسٹ میں ناکام  ہوگئے۔

    جس باعث فاسٹ بالرجنید خان کی ورلڈ کپ اسکواڈ میں شمولیت کا کوئی امکان نہین رہا۔ جنید خان عالمی کپ کی تیاریوں کیلئے لگائے گئے تریبتی کیمپ میں زخمی ہوئے تھے۔

    جس کے بعد انھیں نیوزی لینڈ کیخلاف دو ون ڈے کی سیریز کیلئے ٹیم کے ہمراہ نہیں بھیجا گیا تھا۔ پی سی بی ذرائع کا کہنا ہے کہ جنید خان ابھی تک صحت یاب نہیں ہوسکے ہیں اور انھیں چلنے پھرنے میں دشواری ہورہی ہے۔

    ذرائع کا کہنا ہے کہ ٹیم انتظامیہ نے آل رائونڈر بلاول بھٹی کو جنید خان کی جگہ ورلڈ کپ اسکواڈ میں شامل کرنے کا فیصلہ کرلیا ہے۔

    واضح رہے کہ اے آروائی نیوز نے گزشتہ روز ہی مذکورہ خبر سے اپنے ناظرین کو آگاہ کر دیا تھا۔اس حوالے سے جنید خان نے اپنے ٹوئیٹر پیغام میں کہا ہے کہ مجھے افسوس ہے کہ میں فٹنس ٹیسٹ پاس نہ کر سکا اور یہ ہی اللہ کو منظور تھا۔

    ان کا کہنا تھا کہ میری تمام نیک خواہشات اوردعائیں پاکستانی ٹیم کے ساتھ ہوں۔

  • فاسٹ بائولر جنید خان کی ورلڈ کپ سکواڈ میں شمولیت مشکوک

    فاسٹ بائولر جنید خان کی ورلڈ کپ سکواڈ میں شمولیت مشکوک

    ویلنگٹن: قومی کرکٹ ٹیم کے فاسٹ بائولر جنید خان کے ورلڈ کپ سکواڈ سے آوٹ ہونے کا امکان ہے۔

    پی سی بی ذرائع کے مطابق تربیتی کیمپ کے دوران بائولنگ کراتے ہوئے گر کر ان فٹ ہونے والے فاسٹ بائولر جنید خان کی انجری تاحال ٹھیک نہیں ہو سکی۔ جبکہ انہیں چلنے پھرنے میں بھی دشواری کا سامنا ہے۔

     پی سی بی کا میڈیکل بورڈ کل ان کا حتمی فٹنس ٹیسٹ لینے کے بعد ان کے ورلڈ کپ سکواڈ میں شامل ہونے یا نہ ہونے کا فیصلہ کرے گا۔

     ذرائع کا کہنا ہے کہ ٹیم انتظامیہ نے نیوزی لینڈ سیریز کے لئے ٹیم میں شامل کئیے گئے آل رائونڈر بلاول بھٹی کو وہیں روکنے کا فیصلہ کیا ہے اور انہیں جنید خان کی جگہ ورلڈ کپ سکواڈ میں شامل کر لیا جائے گا۔

  • فاسٹ باؤلرجنید خان آؤٹ، بلاول بھٹی ٹیم میں شامل

    فاسٹ باؤلرجنید خان آؤٹ، بلاول بھٹی ٹیم میں شامل

    لاہور: ورلڈ کپ کیلئے روانگی سے قبل پاکستان کرکٹ ٹیم کو بڑا دھچکا لگ گیا۔ جنید خان انجری کے باعث نیوزی لینڈ کے خلاف سیریز سے باہرہوگئے۔

    تفصیلات کے مطابق پاکستانی فاسٹ بولرجنید خان جو پریکٹس کے دوران انجری کا شکا ر ہوگئے تھے،جس کے باعث سلیکٹرز نے ان کی جگہ بلاول بھٹی کو ٹیم میں شامل کرلیا ہے۔

    ورلڈ کپ کے لئے تیاریاں مکمل تھیں، اسکواڈ بھی منتخب کیا جا چکا تھا، لیکن عین وقت پر لیفٹ آرم فاسٹ بولر جنید خان کی بدقمستی ان کے آڑے آگئی۔

    تربیتی کیمپ کے دوران ہمیسٹرنگ انجری کا شکار ہونے والے جنید خان مکمل فٹ نہ ہوسکے۔ سلیکٹرز نے اسکواڈ مکمل کرنے کے لئے بلاول بھٹی کا انتخاب کرلیا ۔

    نیوزی لینڈ کے خلاف دو ون ڈے کی سیریز کے لئے جنید خان کی جگہ بلاول بھٹی کو ٹیم میں شامل کرنے کا فیصلہ کیا گیا ہے۔ ورلڈ کپ اسکواڈ میں بلاول بھٹی کو شامل کرنے کی منظوری آئی سی سی کی ٹیکنیکل کمیٹی دے گی۔

    جنید خان نے آخری ون ڈے گزشتہ سال اگست میں سری لنکا کے خلاف تھا جس کے بعد وہ گھٹنے کی انجری کا شکار ہوگئے تھے۔