Tag: Bilawal Bhutto Zardari

کراچی: پاکستان پیپلزپارٹی پارلیمنٹریننز کے صدر آصف علی زرداری نے بھارتی مقبوضہ کشمیر میں معصوم کشمیریوں کے قتل اورمتعدد کشمیری رہنمائوں کی گرفتاریوں کی شدید مذمت کی ہے اور کہا ہے کہ عالمی برادری بھارتی مظالم کانوٹس لے۔

اپنے جاری ایک بیان میں آصف علی زرداری کا کہنا تھا کہ اپنے حق کیلئے احتجاج کرنے والے معصوم شہریوں پربھارتی فورسز کی فائرنگ ایک المیہ ہے، انھیں اس سے شدید دھچکہ لگا۔

سابق صدرپاکستان نے کہا کہ مقبوضہ کشمیر میں احتجاج اس بات کاآئینہ دار ہے کہ بھارت نے کشمیریوں کے حقوق غصب کررکھے ہیں، بھارت کواس بات کاادراک ہونا چاہے کہ کشمیری ان کیخلاف کیوں برسرپیکارہیں۔

آصف زرداری کا کہنا تھا کہ کشمیرکے مسئلے کاحل کشمیری عوام کی خواہش کے مطابق ہونا چاہے، عالمی برادری مقبوضہ کشمیر میں انسانی حقوق کی پامالی کانوٹس لے۔

واضح رہے کہ حریت رہنما برہان وانی کے قتل کے خلاف مظاہروں پر قابض بھارتی افواج کی جانب سے فائرنگ کے نتیجے میں درجنوں مظاہرین شہید جبکہ سینکڑوں زخمی ہیں اور بین الاقوامی ذرائع ابلاغ کے مطابق کرفیو کے نفاذ کے بعد گزشتہ 30 گھنٹوں کے دوران بھارتی افواج کی جانب سے بلا اشتعال فائرنگ سے 23بے گناہ مظاہرین قتل جبکہ 300 سے زائد زخمی ہیں۔

کراچی: آصف علی زرداری کا کہنا ہے، مذہب کے نام پر خواتین کو دبایا جا رہا ہے، جاہلوں کی جانب سے مذہب کے نام پر خواتین پر تشدد کی مذمت کرتے ہیں۔

شہید بے نظیر کی سالگرہ کے موقع پر سابق صدر آصف زرداری نے کہا ہے کہ کچھ لوگ خواتین کے خلاف تشدد کی ترغیب دے رہے ہیں، پیپلز پارٹی اسکی مذمت کر تی ہے، خواتین کے خلاف اس ذہنیت سے لڑنے کیلئے تیار ہے۔

آصف زرداری کا کہنا تھا جاہلوں کی جانب سے مذہب کے نام پر خواتین پر تشدد کا قطعی طور پر مسترد کرتے ہیں، پارٹی عہد کرتی ہےکہ اس قسم کی ذہنیت سے آ خری وقت تک لڑتی رہے گی، شہید محترمہ کے نقش قدم پر چلتے ہوئے عوام شدت پسندوں کے خلاف کھڑے ہو جائیں، عوام طاقت کے بل بوتے پر اپنے نظریات مسلط کرنے کی اجازت نہ دیں۔

دوسری جانب شہید محترمہ بینظیر بھٹو کی 63ویں سالگرہ پاکستان پیپلزپارٹی کے چیئرمین بلاول بھٹو زرداری پارٹی کے دوسرے رہنماوٴں کے ساتھ آزاد کشمیر کے شہر بھمبر میں کشمیریوں کے ساتھ منائیں گے۔

کیک کاٹنے کی تقریب بھمبر کے نزد برنالا ہائی اسکول گراوٴنڈ میں ہوگی،اس موقع پر چیئرمین بلاول بھٹو زرداری، پیپلزپارٹی خواتین ونگ کی صدر ایم این اے فریال تالپر، آزاد کشمیر کے صدر سردار یعقوب خان ، آزاد کشمیر کے وزیراعظم چودھری عبدالمجیداور دیگر مرکزی رہنما خطاب کریں گے۔

اس موقع پر آزاد کشمیر کے وزیر ہاوٴسنگ و فزیکل پلاننگ چودھری پرویز اشرف کی جانب سے چیئرمین بلاول بھٹو زرداری کے اعزاز میں افطار ڈنر کا اہتمام بھی کیا گیا ہے۔

اسلام آباد: آصف زرداری نے کہا ہے کہ پانامہ لیلکس پر حکومت سے کوئی سمجھوتہ نہیں ہوگا، سابق صدر نے مولانا فضل الرحمان سے ملاقات کی بھی تردید کردی۔

تفصیلات کے مطابق سابق آصف علی زرداری کا پانامہ لیکس کے معاملے پر مفاہمت کرنے سے انکار کردیا، ایک بیان میں سابق صدر آصف علی زرداری کا کہنا تھا کہ پانامہ لیکس کے معاملے پر حکومت سے کوئی سمجھوتہ نہیں کریں گے۔

سابق صدر آصف علی زرداری نے اپنے ایک بیان میں بتایا کہ ان کی لندن میں جمعیت علمائے اسلام(ف) کے سربراہ مولانا فضل الرحمن کوئی ملاقات نہیں ہوئی، میڈیا کے کچھ حلقوں میں یہ تاثر دینے کی کوشش کی گئی ہے کہ پاناما لیکس کے معاملے پر میری جانب سے کسی قسم کا سمجھوتا ہو گیا ہے۔

انہوں نے کہا کہ یہ بیان اور ایسی خبریں قطعی غلط، بے بنیاد اور منگھڑت ہیں،ان کا کہنا تھا کہ میڈیا میں بتایا گیا کہ میری مفاہمتی پالیسی کے تحت وزیراعظم نواز شریف کے ساتھ کسی سمجھوتے پر پہنچ گیا ہوں۔

سابق صدر نے نہ صرف ان خبروں کی تردید کی ہے بلکہ یہ بھی کہا ہے کہ پارٹی نے یہ فیصلہ کر لیا ہے کہ پاناما لیکس کے مسئلے کو ہر فورم پر اٹھایا جائے گا اور اسے اس کے منطقی انجام تک پہنچایا جائے گا۔

انہوں نے کہا کہ اس سلسلے میں ایک پارلیمانی کمیٹی پہلے ہی قائم کر دی گئی ہے جو پاناما لیکس کی تحقیقات اور اس کے ٹرم آف ریفرنسز بنارہی ہے اور اس بات کا سوال ہی پیدا نہیں ہوتا کہ پاناما لیکس کی تحقیقات کو نظرانداز کیا جائے۔

سابق صدر نے کہا کہ پاکستان پیپلزپارٹی نے اس مسئلے پر نہایت سوچ و بچار کے بعد فیصلہ کیا ہے کہ نہ صرف یہ کہ پارٹی کے اندر اس پر مشاورت ہوئی ہے بلکہ دیگر سیاسی پارٹیوں سے بھی مشاورت کے عمل کے بعد پارٹی نے پاناما لیکس پر اپنا موقف اختیار کیا ہے۔ اس بارے میں جو میڈیا رپورٹس آئی ہیں ان میں یہ تاثر دینے کی کوشش کی گئی ہے کہ پاناما لیکس کے معاملے پر آصف علی زرداری کا موقف پارٹی سے جدا ہے جبکہ یہ بات انتہائی غلط، بے بنیاد اور منگھڑت ہے اور کنفیوژن پھیلانے کے لئے ہے۔