Tag: bilawal bhutto

اسلام آباد: پاکستان پیپلزپارٹی کے چیئرمین بلاول بھٹو زرداری نے کہا ہے کہ پاکستان کے نوجوانوں کو باشعور بنانا ہے، انسانی حقوق پر کوئی سمجھوتہ نہیں کرسکتے۔

تفصیلات کے مطابق چیئرمین پیپلزپارٹی بلاول بھٹو نے انسانی حقوق کے عالمی دن پر سیمینار سے خطاب کرتے ہوئے کہا کہ کسی بھی ریاست میں پریس کا کام طاقتور کا احتساب کرنا ہے، آزادی اظہار رائے کی طرح دیگر حقوق پر بھی بات کرنی چاہئے۔

بلاول بھٹو نے کہا کہ آئین میں اظہار رائے کی آزادی ہے لیکن ہم یقینی نہیں بناسکتے، پارلیمان میں سوائے مغلظات کے کوئی بات نہیں ہورہی ہوتی ہے، ریاست پاکستان کی ذمہ داری ہے اپنے شہریوں کا تحفظ کرے، لوگوں کو محنت کا صلہ دینا اور ان کا معاشی تحفظ کرنا ہوگا۔

انہوں نے کہا کہ آج بھی ملک میں شفاف الیکشن نہیں ہوسکے، الیکشن میں عوام کے ووٹوں پر ڈاکا ڈالا جاتا ہے جسے روکنا ہوگا، عوامی نمائندے منتخب ہوتے ہیں تو مسائل حل ہوتے ہیں۔

مزید پڑھیں: زرداری بغیر کسی جرم کے جیل میں اور نواز شریف مجرم ہوکر بھی باہر ہیں، بلاول بھٹو

چیئرمین پیپلزپارٹی نے کہا کہ سندھ حکومت آج بھی انسانی حقوق دینے میں فرنٹ پر ہے، 18ویں ترمیم میں رائٹ آف ایجوکیشن دلوایا ہے، پیپلزپارٹی ہمیشہ انسانی اور جمہوری حقوق کے لیے فرنٹ پر رہی ہے۔

بلاول بھٹو نے کہا کہ جس طرح جمہوریت چل رہی ہے ہم عوام کے سامنے اور دیواریں لگارہے ہیں، عوامی امنگوں پر مشتمل قانون سازی کے لیے حقیقی نمائندوں کو لانا ہوگا۔

انہوں نے کہا کہ کشمیری رائے شماری کے مطالبے سے پیچھے ہٹنے کو تیار نہیں ہیں، کشمیریوں کا حق ہے وہ اپنا فیصلہ رائے شماری کے تحت کریں۔

مظفر آباد: پی پی چیئرمین بلاول بھٹو زرداری نے کہا ہے کہ پاکستان پیپلز پارٹی ہمیشہ کشمیر کی محافظ رہی ہے۔

تفصیلات کے مطابق آج پیپلز پارٹی کا 52 واں یوم تاسیس منایا جا رہا ہے، اس سلسلے میں مظفرآباد میں جلسے سے خطاب کرتے ہوئے بلاول بھٹو نے کہا کہ مقبوضہ کشمیر میں 118 دن سے کرفیو ہے، دوائیں تک میسر نہیں، پہلے دن سے کہہ رہے ہیں مودی کو سمجھو، اسے پہچانو۔

پی پی چیئرمین نے کہا کہ مودی کا چہرہ بے نقاب کر چکے ہیں، اس سے بات نہیں ہوگی، 72 سال میں جو نہیں کیا گیا تھا وہ حملہ اب مقبوضہ کشمیر پر کیا گیا ہے، شروع سے ہی مقبوضہ کشمیر پر بھارت قبضے کی کوشش کر رہا ہے، میں نے کہا تھا مودی کے یار کو ایک دھکا اور دو، مجھے کہا گیا میں امن نہیں چاہتا، پیپلز پارٹی امن چاہتی ہے مگر کشمیر کی قیمت پر نہیں، وزیر اعظم کہتے تھے مودی جیتے گا تو کشمیر کا مسئلہ حل ہوگا، آج وہ کہتے ہیں مودی آر ایس ایس کا کارندہ ہے۔

بلاول بھٹو نے کہا کہ نریندر مودی خطے سمیت پوری دنیا کے لیے خطرہ ہے، خود بھارت کے وجود کے لیے بھی خطرہ ہے، مودی کی جہالت دیکھو بھارت میں کئی نسلیں کاٹی گئیں، شہید محترمہ نے کہا تھا جہاں کشمیریوں کا پسینہ گرے گا وہاں ہمارا خون گرے گا۔

پی پی چیئرمین نے کہا کہ میں یقین دلاتا ہوں کشمیر کا مقدمہ ہم، آپ اور پیپلز پارٹی لڑے گی، دنیا کو بتانا چاہتے ہیں کہ کشمیر پر سودا ہمیں منظور نہیں، ہمارا نعرہ سب پے بھاری رائے شماری رائے شماری۔

انھوں نے کہا کہ 27 دسمبر کو بی بی شہید کی برسی اسی مقام پر منائی جائے گی جہاں انھوں نے شہادت قبول کی تھی، لیاقت باغ راولپنڈی میں 12 سال پہلے گرنے والا علم پھر سے اٹھائیں گے، اسی شہر کے لیاقت باغ میں کھڑے ہو کر ملک دشمنوں کو پیغام دیں گے کہ طاقت کا سرچشمہ عوام ہیں۔