کراچی: سندھ ہائیکورٹ میں متحدہ قومی موومنٹ کی جانب سے پیپلز پارٹی کے چیئرمین بلاول بھٹو کے انتخابات میں حصہ لینے سے روکنے کے لیے درخواست دائر کردی گئی۔
تفصیلات کے مطابق پیپلز پارٹی کے چیئرمین بلاول بھٹو کے خلاف درخواست سندھ ہائیکورٹ میں ایم کیو ایم کے محفوظ یار خان کی جانب سے دائر کی گئی۔
درخواست میں کہا گیا ہے کہ بلاول بھٹو نے اپنے حلف نامے میں غلط بیانی کی ہے۔انہوں نے اپنے اثاثوں کی منی ٹریل نہیں دی۔
درخواست گزار کا کہنا ہے کہ بلاول بھٹو صادق و امین نہیں ہیں لہٰذا انہیں عام انتخابات میں حصہ لینے سے روکا جائے۔
درخواست میں الیکشن کمیشن و دیگر کو فریق بنایا گیا ہے۔
سندھ ہائیکورٹ کے جج محمد علی مظہر نے دریافت کیا کہ ریٹرننگ افسر یا اپیلیٹ ٹریبونل سے کیوں رجوع نہیں کیا گیا؟ جس پر درخواست گزار نے کہا کہ مجھے بلاول کے اثاثوں کی اطلاع تاخیر سے ملی۔
عدالت نے بلاول بھٹو کے حلف نامے کی نقل 2 جولائی تک پیش کرنے کی ہدایت کردی۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
لاہور: پاکستان پیپلز پارٹی کے چیئرمین بلاول بھٹو زرداری نے کہا ہے کہ وہ جمہوری پاکستان کے لیے والدہ بے نظیر بھٹو کے مشن پر قائم ہیں۔
ان خیالات کا اظہار انھوں نے میڈیا سے گفتگو کرتے ہوئے کیا، ان کا کہنا تھا کہ والدہ کا مشن خوش حال، مضبوط اور جمہوری پاکستان کا قیام تھا اور میں اس مشن پر قائم ہوں۔
بلاول بھٹو زرداری نے مضبوط جمہوری پاکستان کے مشن کو جاری رکھنے کا عزم کرتے ہوئے کہا کہ بے نظیر بھٹو نے ہمیشہ قوم کے بچوں کو اپنی اولاد کی طرح سمجھا۔
انھوں نے کہا کہ بے نظیر بھٹو نے بچوں کے مستقبل کے لیے اپنی جان کا نذرانہ بھی پیش کیا، یہ وہی تھیں جنھوں نے خواتین کو اُن کا جائز حق دلانے کی جدوجہد شروع کی۔
بلاول نے اپنی والدہ اور سابق وزیر اعظم شہید بے نظیر بھٹو کے استحکام پاکستان کے لیے جدوجہد کا ذکر کرتے ہوئے کہا کہ انھوں نے ملکی دفاع ناقابل تسخیر بنانے کے لیے میزائل پروگرام شروع کیا۔
انھوں نے کہا کہ 2010 میں آئین کی مکمل بحالی سے بے نظیر بھٹو کے خواب کو تعبیر ملی، خیال رہے کہ ان کا اشارہ اٹھارویں ترمیم کی طرف تھا جس کے ذریعے پی پی نے وزیر اعظم اور پارلیمنٹ کو تمام اختیارات لوٹا دیے تھے۔
پیپلز پارٹی کے رہنما بلاول بھٹو کا کہنا تھا کہ عوام 2018 کے انتخابات میں پی پی کو ہی دوبارہ اقتدار میں لائیں گے، کہا عوام کا ووٹ پی پی کے لیے ہے۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
اسلام آباد : الیکشن 2018 کے لیے امیدواروں کے کاغذات نامزدگی جانچ پڑتال کا آخری دن ہے اور امیدواروں کے نامزدگی فارم منظور یا مسترد کیے جا رہے ہیں۔
تفصیلات کے مطابق لاہور کے حلقہ این اے 132 سے مسلم لیگ ن کے صدر شہبازشریف اور ان کے صاحبزادے حمزہ شہباز کے کاغذات نامزدگی منظور کرلیے گئے۔
ملتان کے حلقہ این اے 155 سے جاوید ہاشمی کے کاغذات نامزدگی منظور کرلیے گئے، لاہور کی صوبائی اسمبلی پی پی 173 سے مریم نواز اور قصور کے حلقہ پی پی 176 سے ن لیگ کے رہنما ملک محمد احمد خان کے کاغذات نامزدگی بھی منظور کرلیے گئے۔
جمعیت علمائے اسلام ف کے سربراہ مولانا فضل الرحمان کے ڈیرہ اسماعیل خان کے حلقہ این اے 38 سے کاغذات نامزدگی منظور کیے گئے۔
کراچی کے حلقہ این اے 246 سے چیئرمین پیپلزپارٹی بلاول بھٹو زرداری کے کاغذات نامزدگی منظورکرلیے گئے جبکہ این اے 254 اور 255 سے پاک سرزمین پارٹی کے رہنما ارشد ووہرا کے کاغذات نامزدگی منظور کیے گئے۔
ایم کیو ایم پاکستان کے رہنما محمد حسین خان کے این اے 245 سے کاغذات نامزدگی منظور کیے گئے۔
کاغذات نامزدگی مسترد
متحدہ قومی موومنٹ پاکستان کے رہنما ڈاکٹرفاروق ستار کے این اے 245 سے کاغذات نامزدگی مسترد کردیے گئے۔
ریٹرننگ افسر کے مطابق ایم کیوایم رہنما فاروق ستار نے 2 مقدمات میں مفرور ہیں اور انہوں نے یہ مقدمات چھپائے جس پر ان کے کاغذات کو مسترد کیے گئے۔
آل پاکستان مسلم لیگ کے سربراہ پرویز مشرف کے این اے 1 چترال سے کاغذات نامزدگی مسترد کردیے گئے۔
واضح رہے کہ انتخابی امیدواروں کے کاغذات نامزدگی کی جانچ پڑتال کا آج آخری روز ہے۔ الیکشن کمیشن کے ترمیم شدہ انتخابی شیڈول کے مطابق آراوز کے فیصلوں کے خلاف اپیلیں 22 جون تک دائرہوسکیں گی۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
نواب شاہ : پیپلز پارٹی کے کو چیئرمین اور سابق صدر آصف علی زرداری نے کہا ہے کہ الیکشن کے بعد سندھ میں ہماری مکمل اور پنجاب میں مخلوط حکومت ہوگی، بلاول بھٹو نے قوم کو عید الفطر کی مبارکباد دی ہے۔
پیپلز پارٹی کی جانب سے کراچی میں کارکنان کے اعزاز میں دیئے گئے افطار ڈنر سے خطاب کرتے ہوئے آصف علی زرداری نے کہا کہ مجھے پتہ ہے کہ دو سال سے صوبے میں ترقیاتی کام نہیں ہوئے ہیں، کارکنان الیکشن کی بھرپور تیاری کریں، میں نواب شاہ سے الیکشن لڑ رہا ہوں، اگلے پانچ سال بھی سندھ میں ہماری حکومت ہوگی۔
پنجاب میں پیپلز پارٹی کے حکومت سے متعلق اظہار خیال کرتے ہوئے ان کا کہنا تھا کہ پنجاب میں ہماری حکومت ہوگی، اکثریتی نہیں تو مخلوط ہوگی۔
علاوہ ازیں عیدالفطر کی آمد کے موقع پر بلاول بھٹو زرداری نے قوم کے نام اپنے پیغام میں کہا ہے کہ دنیا بھرمیں آباد امت مسلمہ کو عید کی مبارکباد دیتا ہوں، عید پر محتاج اور نادار لوگوں کو بھی اپنی خوشیوں میں شامل رکھیں۔
آج کے دن انہیں یاد کریں جنہوں نے ملک کے لئے جانیں قربان کیں، دعا ہے کہ ماہ رمضان کی رحمتیں اور برکتیں پورا سال ہمارے ساتھ رہیں، ماہ رمضان مسلمانوں کو شیطانی قوتوں سے نبرد آزما ہونے کا حکم دیتا ہے۔
انہوں نے کہا کہ رمضان رواداری اورعاجزی کی اعلیٰ اقدار کو دل نشیں کراتا ہے، عزم کریں کہ پورا سال ہم ان اعلیٰ اقدار پر عمل پیراہوں گے، عدم برداشت، تعصب اور انتہا پسندی ہمارے دور کا شیطان ہے، بلاول بھٹو زرداری کا مزید کہنا تھا کہ ہم سب کو مل کر انتہاپسندی کے خلاف لڑنا ہوگا۔
خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
کراچی : پیپلز پارٹی کے چیئرمین بلاول بھٹو زرداری نے اسلام آباد ، لاہور اور بلوچستان ہائی کورٹ کے فیصلوں اور ان کی ٹائمنگ پرتشویش کا اظہار کیا ہے۔
تفصیلات کے مطابق چیئرمین پیپلزپارٹی بلاول بھٹوزرداری نے سماجی رابطے کی ویب سائٹ ٹویٹرپر اپنے پیغام میں اسلام آباد، بلوچستان اور لاہور ہائی کورٹ کے فیصلوں اور ان کی ٹائمنگ پرتشویش کا اظہار کرتے ہوئے کہا کہ وہ اصولی طور پرانتخابات کے التوا کے خلاف ہیں۔
بلاول بھٹو زرداری نے وزیراعلیٰ خیبرپختونخواہ پرویز خٹک کے الیکشن کمیشن کو لکھے گئے خط اور الیکشن ملتوی کرنے کے لیے بلوچستان اسمبلی کی قرارداد پربھی تشویش کا اظہار کیا۔
بلاول بھٹو زرداری نے وزیراعلیٰ خیبر پختونخوا پرویز خٹک کے الیکشن کمیشن کو لکھے گئے خط اور الیکشن ملتوی کرنے کے لیے بلوچستان اسمبلی کی قرارداد پر بھی تشویش کا اظہار کیا۔
خیال رہے کہ گزشتہ روز پیپلزپارٹی کے سینئر رہنما اعتراز احسن کا کہنا تھا کہ ایسا لگتا ہے، کوئی سسٹم انتخابات کو التوا میں ڈال رہا ہے تاہم ان کی پارٹی کا موقف ہے کہ الیکشن وقت پرہوں۔
یاد رہے کہ گزشتہ روز بلوچستان ہائی کورٹ نے کوئٹہ میں صوبائی اسمبلی کے 8 حلقوں کی حلقہ بندیوں کو کالعدم جبکہ اسلام آباد ہائی کورٹ نے ایبٹ آباد کے 2 حلقوں کی حلقہ بندیا کالعدم قرار دے دیں۔
اسلام آباد ہائی کورٹ اس سے پہلے بھی 10 اضلاع کی حلقہ بندیاں کالعدم قرار دے چکی ہے۔
کراچی: پاکستان پیپلزپارٹی کے چیئرمین بلاول بھٹو زرداری نے کہا ہے کہ پیپلزپارٹی ہمیشہ غریبوں کی بات کرتی ہے اور ان کے لئے کام کرتی ہے.
پیپلزپارٹی کے چیئرمین کا کہنا تھا کہ سندھ میں امن وامان کی صورتحال کافی بہترہوگئی ہے، ہم آگے کی سمت جارہے ہیں.
انھوں نے مزید کہا کہ سندھ میں صحت اورتعلیم شعبوں میں کافی بہتری آئی ہے، بے نظیرانکم سپورٹ پروگرام کے ذریعےغریبوں کی مدد کی گئی. پیپلزپارٹی نےغریبوں کوبلاسودقرضےفراہم کیے. غریب خواتین کو بلاسود قرضے فراہم کرنے کا پروگرام شروع کیا.
بلاول بھٹو نے کہا کہ سندھ میں پینے کے پانی کے لئے ایک ہزارسے زائد آر او پلانٹس لگائے ہیں، سندھ کا صاف پانی پراجیکٹ پنجاب سے بہت بہتر ہے۔
کیا آپ نے اسد درانی کی کتاب پڑھی ہے؟
اس دوران اسد درانی کی متنازع کتاب کی بازگشت بھی سنائی دی۔ اس بارے میں بلاول بھٹو نے کہا کہ میں نے کتاب نہیں پڑھی ہے۔
ان کا کہنا تھا کہ ہماری اپنی جماعت کا نظریہ ہے ایک سوچ ہے، میں ایشوز پر تنقید کرتا ہوں۔ ان کا کہنا تھا کہ آئندہ انتخابات میں پیپلزپارٹی کی حکومت بنے گی، پیپلزپارٹی کی عوام کی تقدیر بدل سکتی ہے۔
اسلام آباد: چیئرمین پیپلزپارٹی بلاول بھٹو زرداری نے کہا ہے کہ کارکن ہی محترمہ بے نظیر بھٹو شہید کی طاقت تھے اور اب یہ میری طاقت ہیں.
ان خیالات کا اظہار بلاول بھٹو نے اسلام آباد میں جنوبی پنجاب کےمختلف وفود سے ملاقات کے موقع پر کیا. انھوں نے کہا کہ کارکن ہی پارٹی کی اصل قوت ہیں.
تفصیلات کے مطابق پیپلزپارٹی نے جنوبی پنجاب میں سیاسی سرگرمیاں تیز کر دی ہیں، اس ضمن میں بلاول بھٹو زرداری نے جنوبی پنجاب کے سیاسی وفود سے ملاقات کی اور سیاسی صورتحال اورانتخابات کے لئے تبادلہ خیال کیا گیا.
اس موقع پر انھوں نے مخالفین کو آڑے ہاتھوں لیتے ہوئے کہا کہ کھوکھلے نعروں اورجھوٹے دعوؤں سے تبدیلی نہیں آسکتی.
بلاول بھٹو کا کہنا تھا کہ مزدور کسان معاشی طور پر مستحکم ہوں گے، تو ملک ترقی کرے گا، اس کے بنا ترقی خواب ہے۔
ان ملاقاتوں میں میں سینیٹرفرحت اللہ بابر، نیئربخاری، قمرزمان کائرہ بھی موجود تھے. اس موقع پر بلاول بھٹو نے کہا کہ سیاسی عمل میں پارٹی کے دیرینہ کارکنوں کو ساتھ رکھیں، یہی ہماری طاقت ہیں.
یاد رہے کہ اس وقت جنوبی پنجاب سیاسی سرگرمیوں کا گڑھ بن چکا ہے، ن لیگ سے الگ ہو کر بننے والا جنوبی پنجاب صوبہ محاذ اب پی ٹی آئی میں ضم ہوچکا ہے.
لاڑکانہ: چیئرمین پاکستان پیپلزپارٹی بلاول بھٹو زرداری نے کہا ہے کہ لوڈشیڈنگ جاتی امرا میں ختم ہوگئی، لاڑکانہ میں تو 10،10 گھنٹے بجلی نہیں ہوتی.
تفصیلات کے مطابق بلاول بھٹو نے ن لیگ کے قائد پر کڑی تنقید کرتے ہوئے کہا کہ میاں صاحب اپنی ذات سے زیادہ کچھ نہیں سوچتے، میاں صاحب کو جھوٹ بولنےاور دھوکا دینے پر نکالا گیا، مگر آج بھی وہی کام کررہے ہیں، جو پہلے کرتے تھے.
بلاول بھٹو نے کہا کہ نظریاتی ہونا بھی میاں صاحب کا جھوٹ ہے، سب دھوکا ہے، عمران خان کو عوام کے مسائل کا علم نہیں، ان کے حل کے لئے بھی وہ کچھ نہیں کرسکتے۔
ان کا کہنا تھا کہ عمران خان کی نظر صرف کرسی اور اقتدار پر ہے، ان کے علاوہ بھی کچھ لوگ اور گروہ ہیں، جو ہمیشہ ہمارے مخالف رہے، کچھ ایسے لوگ بھی مخالفین ہیں، جو پہلے ہمارے ساتھ تھے.
[bs-quote quote=” میاں صاحب اپنی ذات سے زیادہ کچھ نہیں سوچتے، میاں صاحب کو جھوٹ بولنےاور دھوکا دینے پر نکالا گیا، مگر آج بھی وہی کام کررہے ہیں، جو پہلے کرتے تھے” style=”style-14″ align=”right” author_name=”بلاول بھٹو زرداری” author_avatar=”https://arynewsudweb.wpengine.com/wp-content/uploads/2018/03/Bilawal60x60-1.jpg”][/bs-quote]
انھوں نے کہا کہ میں نے این اے200 سے الیکشن لڑنے کا اعلان کیا ہے، اس سیٹ سے شہید ذوالفقار بھٹو، بیگم نصرت بھٹو نے الیکشن جیتا تھا، اس سیٹ سے شہید بے نظیربھٹو نے کبھی الیکشن نہیں ہارا۔
بلاول بھٹو کا مزید کہنا تھا کہ صرف لاڑکانہ اور سندھ نہیں، پاکستان کا ہرعلاقہ میرا ہے، اقتدار میں ہوں یا اپوزیشن میں، ہمیشہ عوام کے لیے کام کیا.
ان کا کہنا تھا کہ عظیم دریائے سندھ اداس ہے، وہاں پانی نہیں، ریت ہی ریت ہے، پانی کی غیر منصفانہ تقسیم ہورہی ہے، ارسا کیا کررہی ہے، جنوبی پنجاب کو 15 اپریل، سندھ کو5 مئی کو پانی ملنا تھا، مگر اب تک نہ ملا.
انھوں نے الزام لگایا کہ حکومت میں ملک کو ون یونٹ کی طرح چلایا، بجلی دے نہیں رہے، مگر ڈبل ڈبل بل بھیج رہے ہیں، سندھ کے عوام مسائل کے حل کے لیے رو رہے ہیں.
کراچی: پی ٹی آئی کے چیئرمین بلاول بھٹو زرداری نے کہا ہے کہ پی ٹی آئی دوسری ایم کیوایم ہے، پچھلے دنوں ہمیں اس کا ثبوت بھی مل گیا.
ان خیالات کا اظہار انھوں نے مزار قائد پر پیپلزپارٹی کے جلسے سے خطاب کرتے ہوئے کیا. ان کا کہنا تھا کہ میں کارکنوں کا شکرگزار ہوں کہ دو تین دن کے مختصر عرصے میں جلسے کی تیاری کرلی، ہمیں کوئی بھی اپنے شہیدوں کو خراج عقیدت پیش کرنے سے نہیں روک سکتا.
انھوں نے کہا کہ پی ٹی آئی والے عمران خان کی صورت میں نیا بانی متحدہ تلاش کریں، پی ٹی آئی والوں نے گذشتہ دنوں اپنے کیمپ سے ہم پر پتھراؤ کیا، کیمپ جلایا، حکیم سعید گراؤنڈ میں ہماری تیاری چل رہی تھی، اچانک پی ٹی آئی نے حکیم سعید گراؤنڈ میں اپناکیمپ لگایا.
انھوں نے کہا کہ پی ٹی آئی کےشرمناک عمل کے باوجود کراچی کے امن کو ترجیح دی، ہم نے پی ٹی آئی کو حکیم سعید گراؤنڈ میں جلسے کی دعوت دی، کراچی ہمارا ہے، ہم تو کہیں بھی جلسہ کرسکتے تھے.
بارہ مئی 2007 کا ذمے دار کون؟
بلاول بھٹو زرداری نے کہا کہ 12 مئی کومشرف کے حواریوں نے ہمارے نہتے کارکنان کو شہید کیا، ڈکٹیٹر ہنس رہا تھا اور کراچی میں لاشیں گررہی تھیں، پی پی جیالے اس وقت کے چیف جسٹس کے استقبال کو جارہے تھے، ڈرگ روڈ فلائی اوور پر پی پی قیادت پر چاروں طرف سے گولیاں برسائی گئیں، ہمارے چھ جیالے جاں بحق ہوئے تھے، اس دن 58 لوگ شہید ہوئے۔
انھوں نے کہا کہ 12 مئی کے وقت براہ راست امن کے ذمے دارموجودہ میئرکراچی تھے، ان سے سوال ہونا چاہیے، ہم اداروں کے وقار اور آزاد عدلیہ کے لئے نکلے تھے، جن کے لئے 58 افراد نے جانیں دیں، انھوں نے شہدا کے گھروں پر آنے کی بھی زحمت نہ کی۔ بلاول بھٹو نے سانحے کے متاثرین کو انصاف دینے کا مطالبہ کیا۔
ایم کیو ایم نے صرف لسانیت کی سیاست کی
بلاول بھٹو نے کہا کہ ایم کیوایم والے لسانیت کے نام پر حکومت کرتے آرہے ہیں، ایم کیوایم نے 30 سال عوام سے جھوٹ بولا، کراچی والوں کے پاس اب کھونے کےلئے کچھ بچا نہیں، کراچی کو ٹارگٹ کلنگ، لاشیں گولی، دہشت اور ہڑتالیں ملیں، بیوائیں ایم کیوایم سے سوال کرتی ہیں، بتاؤ ہمارا قصور کیا تھا،
انھوں نے کہا کہ دھوکا کس کو دیا جا رہا ہے، پہلے فاروق ستار کہتے ہیں کہ میئر کراچی اربوں کا حساب نہیں دے رہا، اب ان کا موقف بدل گیا۔ سندھ حکومت نے اربوں روپے میئر کراچی کو کھل کر کام کے لئے دیے، ایم کیوایم والے صرف ان پیسوں کی بندربانٹ کے لیے ایک ہوئے ہیں، اربوں روپے ہونے کے باوجود میئر کراچی اختیارات کا رونا رو رہا ہے۔
انھوں نے کہا کہ ایم کیوایم والے نہ تو خود کام کرتے ہیں، نہ کسی اور کو کرنے دیتے ہیں، یہ ٹنکی بھر لیڈر کہہ رہے ہیں کہ ہم لاڑکانہ سے کراچی تک حکومت کرنے نہیں دیں گے، بلاول ہاؤس کراچی میں ہے، نانا اور میری ماں بھی کراچی میں رہتے تھے، لاڑکانہ اور کراچی دونوں ہی ہمارے شہر ہیں، ایم کیوایم والے کراچی کو دو ڈسٹرکٹ تک محدود رکھنا چاہتے ہیں، کراچی کی خدمت کرتے رہیں گے اور دلوں کو جوڑیں گے۔
ان کا کہنا تھا کہ اگر مجھے خبر ہوتی کہ میرے جلسے سے لیاقت آباد میں ایم کیوایم دھڑےایک ہوجائیں، تو پہلے کر لیتا، میں نےصرف ٹنکی گراؤنڈ پر جلسہ کیا، باقی ستیاناس انھوں نے خود کیا۔
ن لیگ یا ناکام لیگ؟
انھوں نے ن لیگ پر تنقید کرتے ہوئے کہا کہ ناکام لیگ کیا جانے کہ وفاقی پارٹی کیا ہوتی ہے، وفاق کی صحیح ترجمانی اب تک صرف پیپلزپارٹی نے کی ہے، عوام کی اصل نمائندگی صرف پیپلزپارٹی کرسکتی ہے اور ہم ہی کریں گے، یہ موسمی پرندے ہیں۔
عمران خان پہلے نیا پاکستان کا منجن بیچتے رہے
بلاول بھٹو نے کہا کہ عمران خان نے پہلے بھی عوام کو ورغلانے کی کوشش کی، اب بھی کررہے ہیں، عمران خان پہلے نیا پاکستان کا منجن بیچتے رہے، اب دونہیں ایک کا راگ الاپ رہے ہیں۔ ان کے خیبرپختونخواہ میں تعلیم، صحت، نوکریوں کا دہرا معیار ہے، کراچی والوں کسی کے دھوکے میں مت آنا، روشن مستقبل کے لیے کھڑے ہوجاؤ، یہ وقت ہے حق مانگنے کا، کراچی والوں کے پاس آج منزل بھی ہے اوررہنما بھی، کراچی کے بیٹو، میرا ساتھ دو، میری طاقت بنو۔
