سانگھڑ: پاکستان پیپلزپارٹی کے چیئرمین بلاول بھٹو زرداری نے کہا ہے کہ مسلم لیگ ن نے 5 سال تک صوبے کو این ایف سی ایوارڈ نہیں دیا اور اب وہ 18ویں ترمیم پر حملے کرتے ہوئے اسے واپس لینے کی سازش کررہی ہے جسے پیپلزپارٹی ہرگز برداشت نہیں کرے گی۔
سانگھڑ میں پانی کی لائن کی افتتاحی تقریب سے خطاب کرتے ہوئے بلاول بھٹو کا کہنا تھا کہ آج میں نےیہاں اپنےگھرمیں 240کلومیٹرلمبی پانی کی لائن کاافتتاح کیا، عوام اپنی پیاس بجھانےکےلیےبارش کی دعامانگاکرتے تھے اور اسی سے اپنی پیاس بجھاتے تھے۔
پیپلزپارٹی کے چیئرمین کا کہنا تھا کہ خوشی ہےکہ آج کے بعد سےیہاں کےعوام پیاسےنہیں رہیں گے کیونکہ پیپلزپارٹی نے گذشتہ 10 سالوں میں صرف عوامی خدمت کی سیاست کی جبکہ ن لیگ اورپی ٹی آئی نے صرف ایک دوسرے پر الزامات لگائے۔
بلاول کا کہنا تھا کہ دونوں جماعتوں نےعوام کےلیےکچھ نہیں کیا اور نہ ہی ان کے مسائل کو حل کرنے پر توجہ دی، الزامات لگانے والوں کے پاس نہ کوئی منشور ہے اور نہ ہی عوامی خدمت کی صلاحیت ہے۔
اُن کا کہنا تھا کہ ہم نےعوام کےمسائل پرکام کیا،تعلیم کےشعبےمیں کام کیا، اسکول ،کالج اوریونیورسٹی کی سطح پرکام کیا،صحت کےشعبےمیں بھی کام ہوا جبکہ کراچی میں بےنظیربھٹوشہیدٹراماسینٹر اور عارضہ قلب کےلیےسندھ میں عالمی معیارکے5 اسپتال بنائے۔
مسلم لیگ ن پر تنقید کرتے ہوئے بلاول کا کہنا تھا کہ ’یہ لوگ جب بھی حکومت میں آتے ہیں تو امیر امیر تر اور غریب کی حالت بتدریج خراب ہوتی رہتی ہے، نوازشریف نے جب بھی اقتدار سنبھالا عوام کو پیاسا مارا، وزیراعلیٰ پنجاب لاہورمیں پھول لگا لیتے ہیں لیکن عوام کوپانی کو میسر نہیں ہے‘ ۔
چیئرمین پیپلزپارٹی کا کہنا تھا کہ وفاقی حکومت نے پیپلزپارٹی غریبوں کے لیے انکم سپورٹ پروگرام جیساانقلابی اقدام شروع کیا مگر ن لیگ کو غریبوں کی مدد کا پروگرام پسند نہیں کیونکہ یہ شہید محترمہ بے نظیر بھٹو کے نام سے منسوب ہے، حکومت نے بے نظیر کی تصویر تو ہٹا دی مگر دلوں سے بے نظیر کو نہیں نکالا جاسکتا۔
بلاول بھٹو کا مزید کہنا تھا کہ مسلم لیگ ن امیروں کے قرضے معاف کرنے کے لیے ایمنسٹی اسکیمیں متعارف کراتی ہے مگر اسے غریبوں کی مدد کرنا بالکل پسند نہیں، کیان لیگی حکومت نہیں جانتی کہ غریبوں کی مددکرنافرض ہے؟۔
اندرون سندھ میں اتنی ترقی ہوگی کہ کراچی سے لوگ یہاں رکنے آئیں گے، مراد علی شاہ
وزیراعلیٰ سندھ اور پیپلزپارٹی کے رہنماء مراد علی شاہ کا کہنا ہے کہ پی پی اندرونِ سندھ کے علاقوں کو اتنا ترقی یافتہ بنائے گی کہ کراچی سے لوگ رہنے کے لیے یہاں آیا کریں گے۔
سانگھڑ میں منعقدہ تقریب سے خطاب کرتے ہوئے وزیراعلیٰ سندھ کا کہنا تھا کہ سانگھڑکےلوگ اب یہ نہیں کہہ سکتےیہ پسماندہ علاقہ ہے، اللہ کاشکرہےعوام کے یلے میٹھا پانی میسرکیا اور آئندہ بھی پورے سندھ کے لیے کام کرتے رہیں گے۔
مراد علی شاہ نے دعویٰ کیا کہ پانی فراہم کرنے کی اسکیم کی پلاننگ 50 سال کے لیے کی گئی ہے، نئے منصوبے کی تکمیل 25 مئی سے قبل مکمل ہوجائے گی، سانگھڑ آنے والے لوگ یہ کہتے ہیں کہ ہمارے علاقوں میں ایسی سڑکیں بناکردیں۔
اُن کا کہنا تھا کہ سندھ حکومت اپنے فنڈز سے دہی علاقوں پر ترقیاتی کام کررہی ہے، سانگھڑترقی کرچکااب دیگر علاقوں میں عوام کو سہولیات فراہم کریں گے، جلد وہ وقت آئےگاجب لوگ کراچی چھوڑکرسانگھڑ آئیں گے۔
