مقبوضہ کشمیر میں ظلم و بربریت کسی سے ڈھکی چھپی نہیں، نہ ہی یہ امر کہ مودی کی بھارتیہ جنتا پارٹی (بی جے پی) خطے میں خصوصاً کشمیر پر اپنا قبضہ جمانا چاہتی ہے۔
تاہم بی جے پی مقبوضہ کشمیر میں انتخابی شکست سے خوف زدہ ہے، کیوں کہ مقبوضہ کشمیر کی سیاست میں بی جے پی کبھی قابل ذکر جماعت نہیں رہی، خصوصاً تب جب مودی سرکار نے آرٹیکل 370 کو منسوخ کر کے کشمیر کی خصوصی حیثیت ختم کر دی۔
مقبوضہ کشمیر کے حوالے سے بی جے پی کے جھوٹے مؤقف کی وجہ سے وادی کشمیر میں بی جے پی کی حمایت نہ ہونے کے برابر ہے، آرٹیکل 370 کی منسوخی کے بعد مودی سرکار کا مکروہ چہرہ ساری دنیا پر عیاں ہو چکا ہے۔
بھارتی تجزیہ کار رویش کمار کے مطابق ’’جو بی جے پی آرٹیکل 370 کو منسوخ کر کے کشمیر کی خصوصی حیثیت ختم کر چکی ہے وہ کشمیر میں الیکشن پر منہ چھپائے بیٹھی ہے۔‘‘ انھوں نے لکھا کہ 2019 میں بی جے پی جھوٹ کا سہارا لے کر انتخابات جیتی تھی اور آج بھی یہی کر رہی ہے۔
بھارتی تجزیہ کار کے مطابق بی جے پی بارہ مولہ، سری نگر اور اننت ناگ راجوڑی میں اپنی اتحادی جماعت پیپلز کانفرنس اور جموں و کشمیر اپنی پارٹی کو سپورٹ کر رہی ہے، بی جے پی نے کشمیر میں کوئی امیدوار کھڑا نہیں کیا کیوں کہ مودی سرکار کشمیر سے بھاگ رہی ہے، رویش کمار نے لکھا کہ جو جماعتیں بی جے پی کے ساتھ اتحادی ہیں وہ بی جے پی کو عوامی طور پر قبول کرنے پر تیار نہیں ہیں۔
نیشنل کانفرنس کے چیف ترجمان تنویر صادق نے بھارتی جریدے کو بتایا کہ مقبوضہ جموں و کشمیر میں بی جے پی کے پچھلے 6 سالوں میں لوگ شدید غم و غصے کا شکار ہیں۔ پی ڈی پی کی صدر محبوبہ مفتی نے بھی بی جے پی پر کڑی تنقید کی، انھوں نے کہا بی جے پی نے جموں و کشمیر کو ٹکڑے ٹکڑے کر دیا ہے اور یہاں کے لوگوں کو بے اختیار کیا ہے، مودی سرکار مقبوضہ کشمیر میں اپنی پراکسیز کے ذریعے کچھ چہرے بچانے کی کوشش کر رہی ہے لیکن وہ بری طرح ناکام ہو گئی ہے۔
بھارتی تجزیہ کار کے مطابق انتخابی شکست کے خوف سے مودی سرکار مظلوم کشمیریوں کا سامنا کرنے بھاگ رہی ہے، بھارتی میڈیا کہ مطابق بی جے پی کے کشمیر میں کوئی امیدوار نہ کھڑا کرنے پر پارٹی کے اندر پھوٹ پڑ چکی ہے، پارٹی لیڈران پارٹی ہائی کمان کے کشمیر میں الیکشن نہ لڑنے والے فیصلے پر حیران اور بدگمان ہیں۔
واضح رہے کہ بھارت کی جبر اور دھوکا دہی کی پالیسیاں کشمیر میں طویل عرصے سے ناکام ہی رہی ہیں، مودی سرکارکی جبری پالیسیوں نے کشمیریوں میں موجود مزاحمت کے جذبے کو مزید مضبوط کیا ہے اور وہ آخری دم تک اپنی آزادی کی جدوجہد جاری رکھیں گے۔
