کراچی : فیس بک پر لڑکیوں کو بلیک میل کرنے والا ملزم پکڑا گیا، ایف آئی اے سائبر کرائم سیل نے شہری کی شکایت پر ملزم کو گرفتار کرلیا۔
ترجمان ایف آئی اے کے مطابق ملزم عاصم ایک شہری کی بیٹی کو سوشل میڈیا کے ذریعے بلیک میل کرتا تھا۔ ملزم نے درخواست گذار کی بیٹی کی تصویریں سوشل میڈیا پر جاری کردی تھیں جس کے بعد مدعی کی شکایت پر ایف آئی اے سائبر کرائم سیل نے کیس رجسٹر کرکے کارروائی کا آغاز کردیا تھا۔
FIA arrests man blackmailing on Facebook by arynews
بعد ازاں ایف آئی اے نے ملزم عاصم کو کراچی سے گرفتار کرلیا۔ ترجمان ایف آئی اے کے مطابق گرفتار ملزم کے خلاف سائبر کرائم ایکٹ کے تحت مقدمہ درج کرلیا گیا ہے جبکہ ملزم سے مذید تفتیش بھی جاری ہے۔
یاد رہے کہ انٹرنیٹ کے غلط استعمال اور اس کے ذریعے ہونے والے جرائم کی روک تھام کے لیے وفاقی وزیر برائے ٹیکنالوجی کی جانب سے پیش کیا گیا سائبر کرائم بل برائے 2016 سینیٹ میں تحفظات کی یقین دہانی کے بعد منظور کیا گیا تھا۔
