ARYNews.tv | Urdu – Har Lamha Bakhabar

Tag: Black Panther

  • بلیک پینتھر کا سیکوئل: نیا بلیک پینتھر کون ہوگا؟

    بلیک پینتھر کا سیکوئل: نیا بلیک پینتھر کون ہوگا؟

    سنہ 2018 میں کامیابی کے ریکارڈ توڑنے والی فلم بلیک پینتھر کا سیکوئل جلد ریلیز کیا جائے گا اور مداح بے صبری سے جاننا چاہتے ہیں کہ نیا بلیک پینتھر کون ہوگا۔

    مارول اسٹوڈیوز کی نئی فلم واکانڈا فار ایور میں نئے بلیک پینتھر کے حوالے سے مداح تجسس میں ہیں اور جاننا چاہتے ہیں کہ اگلا بلیک پینتھر کون ہوگا، البتہ فلم کے نئے ٹیزر میں واضح اشارے دیے گئے ہیں کہ کونسا کردار اس ماسک کے پیچھے ہوگا۔

    سنہ 2018 میں ریلیز ہونے والی فلم بلیک پینتھر نے عوام اور ناقدین دونوں کو متاثر کیا تھا اور اس کے بعد ہی سیکوئل کی تیاری شروع ہوگئی تھی۔

    مگر بلیک پینتھر کا مرکزی کردار ادا کرنے والے چیڈوک بوسمین کے انتقال کے باعث فلم کی تیاری متاثر ہوئی اور اس وقت اسٹوڈیو نے کہا تھا کہ چیڈوک بوسمین کو ڈیجیٹل طریقے سے فلم کا حصہ نہیں بنایا جائے گا۔

    اب بلیک پینتھر کے دوسرے حصے کے لانگ لیو واکانڈا نامی ٹیزر کو جاری کیا گیا ہے جس میں نئے بلیک پینتھر کو ایکشن میں دکھایا گیا ہے، جو وہ ہتھیار استعمال کررہا ہوتا ہے جو پہلی فلم میں بلیک پینتھر کی بہن شوری (لیٹیا رائٹ) کے زیراستعمال دکھایا گیا تھا۔

    اس سے نئے ہیرو کی شناخت کی تصدیق نہیں ہوتی مگر اس بات کو تقویت ملتی ہے کہ ٹی چالا (چیڈوک بوسمین کے کردار کا نام) کی چھوٹی بہن ہی بلیک پینتھر بنے گی۔

    اس ٹریلر میں آئرن ہارٹ کے سوٹ کو بھی ایکشن میں دکھایا گیا ہے جو ممکنہ طور پر مارول یونیورس میں آئرن مین کی جگہ لینے والا کردار ثابت ہوگا۔

    فلم بلیک پینتھر واکانڈا فار ایور 11 نومبر کو دنیا بھر میں ریلیز ہوگی۔

  • ہالی ووڈ فلم "بلیک پینتھر” کے ہیرو چاڈ وِک بوس مین چل بسے

    ہالی ووڈ فلم "بلیک پینتھر” کے ہیرو چاڈ وِک بوس مین چل بسے

    لاس اینجلس : ہالی ووڈ کی مشہور فلم بلیک پینتھر کےاداکار چیڈوک بوسمین 43 سال کی عمر میں انتقال کرگئے، جس کی تصدیق ان کے اہل خانہ کی جانب سے کردی گئی۔

    سماجی رابطے کی ویب سائٹ ٹوئٹر پر جاری پیغام میں بتایا گیا ہے کہ بوس مین کا لاس اینجلس میں اپنے گھر پر انتقال ہوا جہاں ان کی اہلیہ اور دیگر خاندان والے ان کے ساتھ موجود تھے،

    مارول اسٹوڈیو کی فلم ’بلیک پینتھر‘میں مرکزی کردار ادا کرنے والے 43سالہ اداکار چاڈ وک بوس مین بڑی آنت (کولون ) کے کینسر میں مبتلا تھے، میڈیا رپورٹ کے مطابق بوس مین نے کبھی بھی عوامی طور پر اپنی بیماری کے بارے میں بات نہیں کی تھی۔

    اہل خانہ کی جانب سے ٹوئٹر پر دیے جانے والے پیغام میں کہا گیا کہ بے حد دکھ کے ساتھ بتانا پڑ رہا ہے کہ چاڈ وک بوسمین اب اس دنیا میں نہیں رہے۔

    2016میں ان کے آنت کے کینسر کی تشخیص کی گئی تھی اور اس وقت وہ اس کے تیسرے مراحل میں تھے، تبھی سے ان کا علاج چل رہا تھا اس کے باوجود وہ کینسر کے چوتھے مراحل میں داخل ہو گئے۔‘‘انہوں نے پچھلے چار برسوں میں اپنی سرجری اور کیمیوتھراپی کے درمیان کئی فلموں کی شوٹنگ بھی کی۔

    الی ووڈ اداکار چیڈوک بوسمین کی شہرت کو دوام 2016 میں بلیک پینتھر میں اداکاری کے جوہر دکھانے پر حاصل ہوا۔ انہوں نے ایوینجرز انفینٹیٹی وار اور ایونجرز: اینڈگیم میں بھی اداکاری کے جوہر دکھائے، ان کی حال ہی میں بننے والی فلم ڈا 5 بلڈز تھی، جو رواں سال کے شروع میں نیٹ فلکس پر ریلیز ہوئی۔ٓ

    واضح رہے کہ چاڈوک بوس مین نے شرعات میں حقیقی کرداروں کی کہانیوں پر مبنی فلموں سے شہرت حاصل کی۔ انہوں نے 2013 کی فلم 42 میں بیس بال کے معروف کھلاڑی جیکی رابنسن کا کردار ادا کیا اور اس کے بعد 2014 کی فلم ‘گین آن اپ’ میں موسیقار جیمز براؤن کا کردار نبھایا۔ لیکن ان کی فلموں میں سب سے یادگار فلم بلیک پینتھر تھی جو 2018 میں ریلیز ہوئی تھی۔

    بی بی سی اردو کے مطابق یہ پہلی سپر ہیرو فلم تھی جسے بہترین فلم کے آسکر اعزاز کے لیے نامزد کیا گیا تھا اور اسی تقریب میں اسے چھ اور اعزازت کے لیے بھی نامزد کیا گیا تھا۔

  • کینیا میں سیاہ تیندوا منظر عام پر

    کینیا میں سیاہ تیندوا منظر عام پر

    آپ نے ہالی ووڈ کی ریکارڈ ساز سپر ہیرو فلم بلیک پینتھر تو ضرور دیکھی ہوگی، افریقی ملک کینیا میں بھی بلیک پینتھر کا نظارہ دیکھا گیا لیکن یہ بلیک پینتھر ہالی ووڈ کی فلم سے کہیں زیادہ شاندار اور قابل دید تھا۔

    افریقہ کے جنگلات میں عکس بند کیا جانے والا یہ سیاہ تیندوا، تیندوے کی نایاب ترین نسل ہے۔

    اس سے تقریباً 100 سال قبل ایک سیاہ تیندوا دیکھا گیا تھا اور اس کی موجودگی کے بارے میں صرف اندازے قائم تھے، تاہم اب اس خوبصورت جانور کی صاف تصاویر نے ماہرین کو خوشگوار حیرت میں مبتلا کردیا ہے۔

    اس کی تصاویر کھینچنے والے وائلڈ لائف فوٹو گرافر ول لوکس کا کہنا ہے کہ انہوں نے اس علاقے میں اس خوبصورت جانور کی موجودگی کے بارے میں سنا تھا، تاہم انہیں یقین نہیں تھا کہ وہ اسے دیکھنے میں کامیاب ہوسکیں گے۔

    یہ تیندوا اتنا انوکھا کیوں ہے؟

    اس بارے میں ماہر جنگلی حیات نکولس پلفولڈ کا کہنا ہے کہ یہ تیندوا ایک نایاب جینیاتی مرض میلینزم کا شکار ہے۔

    ہم دیکھتے ہیں کہ انسانوں میں البانزم (یا برص) کا مرض موجود ہوتا ہے۔ یہ مرض انسانوں کے ساتھ ساتھ جانوروں کو بھی لاحق ہوجاتا ہے۔

    اس مرض میں جسم کو رنگ دینے والے عناصر جنہیں پگمنٹس کہا جاتا ہے کم ہوجاتے ہیں، جس کے بعد جسم کا قدرتی رنگ بہت ہلکا ہوجاتا ہے۔

    اس مرض کا شکار انسان یا جانور سفید رنگت کے حامل ہوتے ہیں۔

    مزید پڑھیں: البانزم کا شکار سفید بارہ سنگھا

    اس کے برعکس میلینزم میں رنگ دینے والے پگمنٹس نہایت فعال ہوتے ہیں جس کے باعث یا تو جسم پر گہرے یا سیاہ رنگ کے دھبے پڑجاتے ہیں، یا پھر پورا جسم سیاہ ہوجاتا ہے۔

    البانزم کی نسبت میلینزم نایاب ترین مرض ہے اور اس کی شرح نہ ہونے کے برابر ہے۔

    ماہرین کا کہنا ہے کہ یہ ضروری نہیں کہ اس تیندوے کے والدین میں بھی یہ مرض موجود ہو، البتہ ان کی جینیات میں اس کا امکان ضرور ہوسکتا ہے جو ان کی آنے والی نسل میں ظاہر ہوتا ہے۔

  • معصوم سے پنک پینتھر کے بعد سپر ہیرو بلیک پینتھر

    معصوم سے پنک پینتھر کے بعد سپر ہیرو بلیک پینتھر

    آپ نے اپنے بچپن میں معصوم اور سادہ لوح سے پنک پینتھر کی کارٹون سیریز ضرور دیکھی ہوگی اور کچھ بچوں کا تو یہ اتنا پسندیدہ ہوگا کہ وہ اس کا اسٹف ٹوائے بھی اپنے ساتھ لے کر سوتے ہوں گے۔

    تاہم اب اس پنک پینتھر کے بعد بلیک پینتھر بھی منظر عام پر آگیا ہے جو کوئی کارٹون سیریز نہیں بلکہ مارول کامک کی نئی پیشکش ایک سپر ہیرو ہے جس کی انفرادیت یہ ہے کہ یہ سیاہ فام ہے۔

    بلیک پینتھر نامی سپر ہیرو کا ناول امریکا میں سنہ 60 سے 70 کی دہائی میں خاصا مقبول تھا اور اب مارول اسٹوڈیوز کے تحت بننے والی اس فلم کی کہانی بھی اسی ناول سے ماخوذ ہے۔

    سپر ہیروز کی دنیا میں اس سے قبل تمام سپر ہیروز کو سفید فام دکھایا جا چکا ہے تاہم امید ہے کہ اس سیاہ فام سپر ہیرو کو بھی بے حد پسند کیا جائے گا جس کا ثبوت فلم کا ٹریلر ہے جسے ریلیز ہوتے ہی چند گھنٹوں کے اندر لاکھوں افراد نے دیکھ لیا۔

    فلم میں موجود تمام ہی کردار افریقی ہیں جو جدید ٹیکنالوجی اور شاندار سینماٹو گرافی کے ساتھ پیش کیے جارہے ہیں۔

    ٹریلر میں اس سپر ہیرو کو طاقتور دشمنوں کے خلاف معرکہ آرا دیکھا جاسکتا ہے۔ فلم بلیک پینتھر کو فروری 2018 میں ریلیز کے لیے پیش کردیا جائے گا۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔