Tag: Black Widow

معروف ہالی ووڈ اداکارہ اسکارلٹ جوہانسن نے اپنی فلم بلیک وڈو کے سینما گھروں میں ریلیز نہ کیے جانے پر عدالت میں مقدمہ دائر کردیا، فلم کی ریلیز نہ کرنے سے اداکارہ کو خاصا مالی نقصان پہنچا ہے۔

بین الاقوامی ویب سائٹ کے مطابق امریکی اداکارہ اسکارلٹ جوہانسن اپنی فلم بلیک وڈو کی سینما گھروں میں خصوصی ریلیز نہ ہونے پر کافی نالاں ہیں۔

فلم بلیک وڈو کی سینما گھروں میں نمائش کے ساتھ ہی فلم کی اسٹریمنگ سروس ڈزنی پلس پر بھی ریلیز کرنے پر مایوس ہونے والی اداکارہ اسکارلٹ جوہانسن نے ڈزنی کمپنی کے خلاف عدالت جانے کا فیصلہ کیا ہے۔

اداکارہ اسکارلٹ جوہانسن کی جانب سے دائر مقدمے میں کہا گیا ہے کہ مس جوہانسن نے ڈزنی اور مارول کو ہر موقع فراہم کیا کہ وہ اپنی اس غلطی کو درست کریں اور مارول اسٹوڈیوز اپنے کیے گئے وعدے پر عمل کرے۔

مقدمے میں مزید کہا گیا ہے کہ ڈزنی نے جان بوجھ کر بغیر کسی جواز کے مارول سے کیے گئے معاہدے کی خلاف ورزی کی تا کہ مس جوہانسن کو مارول کے ساتھ اس ڈیل کا پورا فائدہ اٹھانے سے روکا جا سکے۔

فلم بلیک وڈو میں اداکاری کے علاوہ، اسکارلٹ جوہانسن اپنے ایوینجرز کے کردار کی پہلی سولو فلم کی ایگزیکٹو پروڈیوسر بھی ہیں۔ اداکارہ نے لاس اینجلس کاؤنٹی سپیریئر کورٹ میں جمع کروائی گئی شکایت میں معاشی نقصانات کو پورا کرنے کا بھی مطالبہ کیا ہے۔

اداکارہ کی جانب سے دائر مقدمہ کے مطابق مارول اسٹوڈیوز اور اسکارلیٹ جوہانسن کے مابین اس بات پر اتفاق کیا گیا ہے کہ وہ قانونی چارہ جوئی کے مطابق فلم بلیک وڈو کے لیے معاوضہ وصول کریں گی۔

اداکارہ نے اپنے مالی مفادات کی حفاظت کے لیے مارول اسٹوڈیوز سے یہ معاہدہ کیا تھا کہ فلم خصوصی طور پر سینما گھروں میں ریلیز کی جائے گی۔

اداکارہ کے وکیلوں کا کہنا ہے کہ مارول اسٹوڈیوز کے معاہدے سے بخوبی واقف ہونے کے باوجود بھی کمپنی والٹ ڈزنی نے اسٹریمنگ سروس ڈزنی پلس پر فلم کو ریلیز کیا ہے۔ شکایت میں یہ بھی کہا گیا ہے کہ کمپنی ناظرین کو اس کی اسٹریمنگ سروس کی طرف راغب کرنا چاہتی ہے جہاں سے آمدنی صرف اس کمپنی کو ہی ملے گی۔