ARYNews.tv | Urdu – Har Lamha Bakhabar

Tag: blasphemy

  • گستاخانہ بیان دینے والا بی جے پی رکن اسمبلی پھر گرفتار

    گستاخانہ بیان دینے والا بی جے پی رکن اسمبلی پھر گرفتار

    نئی دہلی: گستاخانہ بیان دینے والا شاتم رسولﷺ بی جے پی رکن اسمبلی ٹی راجا سنگھ کو پھر گرفتار کر لیا گیا۔

    تفصیلات کے مطابق بھارتی حکمراں جماعت بی جے پی کے رکنِ اسمبلی ٹی راجا سنگھ کو پولیس نے پھر گرفتار کر لیا، راجا سنگھ منگل کو گرفتار ہونے کے کچھ دیر بعد ہی ضمانت پر رہا ہو گیا تھا۔

    توہین رسالت کے مرتکب، گستاخانہ بیان دینے پر ٹی راجا سنگھ کے خلاف تلنگانہ اور حیدرآباد سمیت دیگر شہروں میں مسلمانوں کا احتجاج جاری ہے۔

    مسلمانوں کے احتجاج پر راجا سنگھ کے کچھ روز قبل کو منگل کے روز پولیس نے گرفتار کر لیا تھا لیکن تھوڑی دیر بعد ہی مقامی عدالت نے ضمانت منظور کرتے ہوئے رہا کر دیا تھا۔

    ٹی راجا سنگھ کے خلاف حیدر آباد کے دبیر پورہ پولیس تھانے میں تعزیرات ہند کی دفعہ 295 اے اور 153 اے سمیت کئی دفعات میں کیس درج کیا گیا ہے۔

    بی جے پی رکن ٹی راجا سنگھ کی گستاخانہ ویڈیو سوشل میڈیا پر وائرل ہوئی تھی، بی جے پی نے بھی راجا سنگھ کی رکنیت معطل کردی ہے۔ بھارتی میڈیا کے مطابق گستاخانہ بیان کے بعد سے حیدرآباد میں کشیدگی برقرار ہے اور شہر میں پولیس کی بھاری نفری تعینات کر دی گئی ہے۔

    واضح رہے کہ پاکستان کی جانب سے بھی راجا سنگھ کے بیان کی سخت الفاظ میں مذمت کی گئی ہے۔ دفتر خارجہ نے ایک بیان میں کہا کہ تین ماہ میں دوسری مرتبہ ایک سینیئر بی جے پی رہنما نے پیغمبر اسلام سے متعلق توہین آمیز بیان دیا ہے، جس سے دنیا بھر کے مسلمانوں کے جذبات مجروح ہوئے ہیں۔

    دفتر خارجہ نے بھارت سے مطالبہ کیا ہے کہ ان رہنماؤں کے خلاف کارروائی کی جائے جو بار بار اسلام پر حملہ کرتے ہیں اور پیغمبر اسلام کے خلاف توہین آمیز بیان دیتے ہیں۔

  • نبی کریم کی شان میں گستاخی : بھارتی مسلمانوں میں غم وغصہ برقرار

    نبی کریم کی شان میں گستاخی : بھارتی مسلمانوں میں غم وغصہ برقرار

    احمد آباد کے شاہ عالم درگاہ کے خادم صوبہ خان پٹھان نے کہا ہے کہ نوپور شرما کی جانب سے نبی کریم کی شان میں جو گستاخی کی گئی ہے وہ انتہائی قابل مذمت ہے۔

    اس حوالے سے شاہ عالم درگاہ کے خادم صوبہ خان پٹھان نے میڈیا سے گفتگو کرتے ہوئے کہا کہ گستاخ رسول کو سزا تو اللہ تعالیٰ ہی دے گا، ہم بحیثیت مسلمان اس بیان کی مخالفت اوراحتجاج جاری رکھیں گے۔

    انہوں نے کہا کہ احتجاج کرنے کے سبب حکومت ہمیں جیلوں میں ڈال سکتی ہے، ایسے حال میں ہم دعا ہی کرسکتے ہیں اللہ تعالی گستاخ رسول کو عبرتناک سزا دے تاکہ مستقبل میں کوئی دوبارہ شان رسالت مآب کی شان میں گستاخی نہ کرسکے۔

    شاہ عالم درگاہ کے شاہی امام صدیقی احمد اشرفی نے کہا کہ کسی بھی مذہب کے پیشوا کے متعلق گستاخی کرنا انسانیت کے خلاف ہے، انہوں نے کہا کہ نوپور شرما کی جانب سے کی گئی گستاخی سے مسلمانوں کے جذبات مجروح ہوئے ہیں۔

    مقامی باشندہ ساجد شیخ نے کہا کہ ہندوستان میں مختلف مذاہب کے لوگ رہتے ہیں،انہیں یہ سمجھنا چاہیے کہ ایسا کوئی بھی کام نہ کرے جس سے کسی بھی مذہبی جذبات مجروح ہوں۔

    انہوں نے کہا کہ جس طرح وسیم رضوی نہ ہندو رہا نہ مسلمان رہا اس کی حالت خراب ہے اور نوپور شرما کی بھی حالت بدتر ہونے والی ہے۔

    واضح رہے کہ گزشتہ ماہ بی جے پی کی سابق قومی ترجمان نوپور شرما نے ایک ٹی وی مباحثہ کے دوران شان رسالت میں گستا خانہ جملہ کہا تھا جس کے خلاف ملک کے متعدد ریاستوں کے مختلف علاقوں میں نوپور شرما اور اور بی جے پی کے دہلی کے سابق میڈیا انچارج نوین جندال کے خلاف احتجاج کیا گیا اور ان کے خلاف مقدمات درج کئے گئے تھے۔

    اس کے علاوہ دنیا بھر کے مسلم ممالک کی جانب سے جب نوپور شرما کے گستاخانہ جملہ کے خلاف آواز بلند کی گئی اور ان ممالک میں تعینات بھارتی سفیروں کو طلب کرکے احتجاج درج کرایا گیا۔

  • توہین رسالت کرنے پر نوپور شرما کو گرفتار کیا جائے، اسدالدین اویسی

    توہین رسالت کرنے پر نوپور شرما کو گرفتار کیا جائے، اسدالدین اویسی

    حیدرآباد : نبی کریم ﷺکے بارے میں نامناسب تبصرے کے معاملے میں بی جے پی نے اپنی ترجمان نوپور شرما کو پارٹی سے معطل کر دیا ہے لیکن یہ معاملہ ابھی ٹھنڈا نہیں ہو رہا ہے۔

    اس حوالے سے بھارتی مسلمان رہنما اسدالدین اویسی نے مطالبہ کیا ہے کہ نوپور شرما کو ان کی اس گھٹیا حرکت پر فوری گرفتار کیا جانا چاہیے۔

    انہوں نے کہا کہ جب ملک کے مسلمانوں کی بات آتی ہے تو وزیر اعظم مودی ان کی بات نہیں سنتے لیکن باہر کے مسلمانوں کی بات سن لیتے ہیں، انہوں نے بی جے پی پر ملک کے مسلمانوں کی تذلیل کا الزام لگایا ہے۔

    تفصیلات کے مطابق بھارت میں رکن پارلیمنٹ حیدرآباد اور صدر کل ہند مجلس اتحادالمسلمین بیرسٹر اسدالدین اویسی نے نبی کریم کی شان میں گستاخی کرنے والی بی جے پی کی ترجمان نوپور شرما کی گرفتاری کا مطالبہ کیا ہے،

    بھارتی میڈیا کے مطابق انہوں نے گزشتہ روز پارٹی ہیڈ کوارٹر دارالسلام میں میڈیا سے بات کرتے ہوئے مودی حکومت کی خارجہ پالیسی پر شدید نکتہ چینی کی۔ انہوں نے کہا کہ بیشتر اسلامی ممالک نے ہندوستانی سفیروں کو طلب کرتے ہوئے احتجاج درج کروایا ہے۔

    انہوں نے کہا کہ ہندوستان دنیا میں بے عزت ہوگیا ہے، ملک کی خارجہ پالیسی برباد ہوگئی ہے، نوپور شرما کی معطلی کافی نہیں ہے بلکہ ان کو گرفتار کیا جانا چاہئے۔

    انہوں نے کہا کہ نوپور شرما کو پارٹی کی اعلیٰ قیادت کی حمایت حاصل ہے، بی جے پی جان بوجھ کر اپنے ترجمانوں کو ٹی وی مباحث میں بھیجتی ہے تاکہ وہ اشتعال انگیز بیانات دیں۔

    ان کا کہنا تھا کہ کویت، قطر اور سعودی عرب جیسے ممالک نے شرما کے ان خیالات پر شدید ناراضگی کا اظہار کرتے ہوئے سخت بیانات جاری کئے ہیں۔ قطر اور کویت نے ہندوستانی سفرا کو طلب کرتے ہوئے احتجاجی نوٹ انہیں حوالے کئے ہیں۔

    صدر مجلس نے گزشتہ روز اس مسئلہ پر ٹویٹ کرتے ہوئے کہا تھا کہ یہ ہمارے ملک کی ایک سفارتی ناکامی ہے۔ اس کے لئے مودی حکومت کے عناصر ذمہ دار ہیں۔

    بیرسٹر اویسی نے ایک اور ٹویٹ میں واضح کیا تھا کہ بی جے پی کا کہنا ہے کہ گستاخی کرنے والے حاشیہ بردار اور گڑبڑ کرنے والے عناصر ہیں جبکہ ان کا تعلق راست پارٹی سے ہے اور وہ پارٹی کے ترجمان ہیں۔

  • توہین مذہب کی آڑ میں بینک مینجر کو قتل کرنے والا مجرم انجام کو پہنچا

    توہین مذہب کی آڑ میں بینک مینجر کو قتل کرنے والا مجرم انجام کو پہنچا

    خوشاب: صوبہ پنجاب کی مقامی عدالت نے توہین مذہب کے نام پر کئے گئے قتل کا فیصلہ سنادیا ہے۔

    تفصیلات کے مطابق خوشاب کی انسداددہشتگردی کی عدالت نے توہین مذہب کا الزام لگا کربینک منیجر کو قتل کرنے والے سیکیورٹی گارڈ کو دو بار سزائے موت اور بارہ سال قید کی سزا سنادی ہے۔

    انسداددہشتگردی عدالت کے جج نے اپنے فیصلے میں کہا کہ جرم ثابت ہونے پر ملزم کو ساڑھے11لاکھ روپے جرمانے عائد کیا جاتا ہے، جرمانے کی عدم ادائیگی پر مزید دو سال جیل میں گزارنا ہونگے۔واضح رہے واقعہ گذشتہ سال نومبر میں پیش آیا تھا، پولیس کے مطابق خوشاب کی تحصیل قائد آباد میں واقع نیشنل بینک آف پاکستان کی برانچ کے منیجر ملک عمران حنیف کو سیکیورٹی گارڈ نے رائفل سے فائرنگ کرکے زخمی کردیا تھا۔

    زخمی مینجر کو فوری طور پر مقامی ہسپتال منتقل کیا گیا،زخمی بینک منیجر کو تشویش ناک حالت میں لاہور منتقل کیا گیا جہاں وہ سروسز ہسپتال میں زخموں کی تاب نہ لاتے ہوئے دم توڑ گئے۔

    واقعے کے بعد گرفتار سیکیورٹی گارڈ کا کہنا تھا کہ اس نے ملک عمران حنیف کو توہین رسالت پر قتل کیا ہے۔

     

  • ناروے میں قرآن پاک کی توہین، پاکستان کا یورپی یونین میں معاملہ اٹھانے کا اعلان

    ناروے میں قرآن پاک کی توہین، پاکستان کا یورپی یونین میں معاملہ اٹھانے کا اعلان

    اسلام آباد : معاون خصوصی اطلاعات فردوس عاشق اعوان نے کہا ہے کہ اوآئی سی اور یورپی یونین میں توہین قرآن کا معاملہ اٹھائیں گے، اسلامو فوبیا کابیانیہ عالمی امن کیلئے خطرہ ہے۔

    ان خیالات کا اظہار انہوں نے اسلام آباد میں پریس کانفرنس سے خطاب کرتے ہوئے کیا، انہوں نے کہا کہ وزیر اعظم عمران خان کی زیرصدارت پی ٹی آئی کور کمیٹی کا اجلاس ہوا، جس میں گزشتہ روز ناروے میں ہونے والے افسوسناک واقعے کی شدید مذمت کی گئی۔

    معاون خصوصی نے کہا کہ توہین مذہب سے انتہا پسندی کی سوچ پروان چڑھتی ہے، ناروے میں توہین قرآن کے دلخراش واقعے سے دنیا بھر میں مسلمانوں کی دل آزاری ہوئی ہے، اسلامو فوبیا کابیانیہ عالمی امن کیلئے خطرہ ہے، یہ معاملہ اوآئی سی، یورپی یونین میں اٹھائیں گے۔

    انہوں نے کہا کہ کور کمیٹی کے اجلاس میں اسلامو فوبیا کے خلاف قرارداد پاس کی گئی ہے ، یہ قرار داد او آئی سی اور یورپی پارلیمنٹ میں پہنچائی جائیگی تاکہ مسلمانوں کے جذبا ت سے کھیلنے کے اس عمل کی حوصلہ شکنی ہوسکے، کور کمیٹی نے شرانگیز ی پرمشتمل بیانیہ اور اس کے ساتھ جڑے عناصر کی شدید مذمت کی ہے۔

    پریس کانفرنس سے خطاب میں معاون خصوصی نے بتایا کہ معیشت میں پہلی باربجٹ خسارے میں قابو پالیا گیا، وزیر اعظم نے معاشی اعشاریوں میں بہتری پر معاشی ٹیم کی کارکردگی کو سراہا، معیشت کے ثمرات عوام تک منتقل کرنے کیلئےواضع حکمت عملی کی ہدایت کی گئی ہے، کور کمیٹی نے بھی معاشی ٹیم کی کاوشوں کو سراہا۔
    فردوس عاشق اعوان نے کہا کہ نڈھال اور دلبرداشتہ اپوزیشن میڈیا میں آنے اور عوام کو گمراہ کرنے کیلئے جھوٹا پروپیگنڈا کررہی ہے، جعلی خبروں کاخاتمہ ہوناچاہئے، اجلاس میں الیکشن کمیشن سے متعلق اپوزیشن کے بیانیے پرتحفظات کا اظہار کیا گیا۔

    انہوں نے کہا کہ پی ٹی آئی فارن فنڈنگ کی اصطلاح کی مذمت کرتی ہے، لیگل ٹیم اپنا مؤقف الیکشن کمیشن کے سامنےرکھے گی، تحریک انصاف کادامن صاف ہے، فارن فنڈنگ کیس میں تمام سیاسی جماعتوں کو آڈٹ کیا جائے، کسی ایک جماعت کوٹارگٹ نہ کیاجائے، یہ تاثر دیا جارہا ہے کہ پی ٹی آئی حقائق چھپارہی ہے، پی ٹی آئی فارن فنڈنگ کیس کے تمام ثبوت جمع کراچکی ہے۔

  • یورپی عدالت کا توہینِ رسالت پر خاتون کی سزا برقرار رکھنے کا فیصلہ

    یورپی عدالت کا توہینِ رسالت پر خاتون کی سزا برقرار رکھنے کا فیصلہ

    برلن: انسانی حقوق کی یورپی عدالت نے توہینِ رسالت کے جرم میں آسٹرین خاتون کی سزا برقرار رکھنے کا فیصلہ سنا دیا۔ یورپی عدالت نے توہینِ رسالت کے معاملے کو آزادیٔ اظہار ماننے سے انکار کر دیا۔

    تفصیلات کے مطابق انسانی حقوق کی یورپی عدالت نے توہینِ رسالت کے جرم میں آسٹرین خاتون کی سزا برقرار رکھنے کا فیصلہ جاری کرتے ہوئے کہا کہ توہینِ رسالت آزادیٔ اظہارِ رائے کے زمرے میں نہیں آتی۔

    [bs-quote quote=”توہینِ رسالت سے مذہبی آزادی متاثر ہوتی ہے، یہ اظہارِ رائے کی حدود سے تجاوز ہے: عدالت” style=”style-7″ align=”left” color=”#dd3333″][/bs-quote]

    یورپی عدالت برائے انسانی حقوق نے کیس کی سماعت کرتے ہوئے واضح طور پر کہا کہ پیغمبرِ اسلام کی توہین مذہبی انتشار اور فساد کا باعث بھی بن سکتی ہے۔

    سزا برقرار رکھنے کا فیصلہ برلن کی عدالت میں 7 ججز پر مشتمل پینل نے سنایا، عدالت کا کہنا تھا کہ توہینِ رسالت سے مذہبی آزادی متاثر ہوتی ہے، یہ اظہارِ رائے کی حدود سے تجاوز ہے۔

    انسانی حقوق کی عدالت نے  آسٹریا کی عدالت کا فیصلہ درست قرار دیتے ہوئے کہا کہ اس نے محتاط ہو کر آزادئ اظہار کا دوسروں کے مذہبی احساسات کے تحفظ کے حق کے ساتھ موازنہ کیا تھا۔

    یہ بھی پڑھیں:  پاکستان کا نیدرلینڈز کے رکن پارلیمنٹ کے گستاخانہ ٹویٹ پر شدید احتجاج

    واضح رہے کہ آسٹریا کی خاتون نے 2008 اور 2009 میں اسلام کے موضوع پر سیمینار کا ایک سلسلہ شروع کیا تھا، آسٹریا کی عدالت نے 2011 میں خاتون کو توہینِ رسالت کا مرتکب قرار دیا۔

    چالیس سالہ خاتون نے عدالتی فیصلے کے خلاف آسٹریا کی اپیلز کورٹ میں بھی اپیل کی تھی لیکن فیصلہ برقرار رکھا گیا تھا۔

    واضح رہے کہ آج پاکستان نے نیدرلینڈز کے رکن پارلیمنٹ کے گستاخانہ ٹویٹ پر شدید احتجاج کرتے ہوئے نیدرلینڈز کے پاکستان میں تعینات سفیر کو دفترِ خارجہ طلب کر کے تحفظات سے آگاہ کیا۔ سیکریٹری خارجہ تہمینہ جنجوعہ نے کہا کہ آزادیٔ اظہار کے نام پر ایسے اقدامات کی اجازت نہیں دی جاسکتی۔

  • شاہ محمود قریشی کا ہالینڈ کے وزیر خارجہ سے رابطہ

    شاہ محمود قریشی کا ہالینڈ کے وزیر خارجہ سے رابطہ

    اسلام آباد : ہالینڈ کے وزیر خارجہ نے پاکستانی ہم منصب شاہ محمود قریشی سے رابطے کے دوران اسلام فوبیا اور تعصبات سے بچنے کے لئے ملکر کام کرنے کی ضرورت پر زور بھی دیا۔

    تفصیلات کے مطابق پاکستانی وزیر خارجہ شاہ محمود قریشی نے وزارت داخلہ کا حلف اٹھانے کے بعد سے دوسری مرتبہ ہالینڈ کے وزیر خارجہ سے رابطہ کرکے توہین آمیز خاکوں کے خلاف اقدامات کی تعریف کی ہے۔

    وفاقی وزیر خارجہ شاہ محمود قریشی نے ہالینڈ کے وزیر خارجہ سے گفتگو کے دوران کہا کہ دونوں حکومتوں کی مشترکہ کاوشوں سے بر وقت نتائج حاصل ہوئے۔

    ترجمان دفتر خارجہ کا کہنا تھا کہ ہالینڈ کے وزیر خارجہ نے پاکستانی ہم منصب سے بات کرتے ہوئے کہا اپنی حکومت کو خاکوں کے معاملے سے الگ قرار دیا اور اسلام فوبیا اور تعصبات سے بچنے کے لئے ملکر کام کرنے کی ضرورت پر زور بھی دیا۔

    ترجمان دفتر خارجہ کا کہنا ہے کہ شاہ محمود قریشی نے ایک ہفتے کے دوران ڈچ وزیر خارجہ سے ایک ہفتے میں دوسری بار بات ہوئی۔

    خیال رہے کہ دفتر خارجہ نے دس روز قبل ہالینڈ میں گستاخانہ خاکوں کے مقابلے کے معاملے پر دفتر خارجہ نے نیدر لینڈز کے قائم مقام سفیر کو طلب کرکے اسلام مخالف مہم پر شدید تشویش کا اظہار کیا ہے۔

    دفتر خارجہ نے ہالینڈ میں گستاخانہ خاکوں کے مقابلے اسلام کو بدنام کرنے کی دانستہ کوشش قرار دیا، اس حوالے سے ترجمان دفتر خارجہ نے کہا کہ نیدر لینڈز کے سفیر کو وفاقی کابینہ کے احتجاج اور فیصلے سے بھی آگاہ کیا گیا ہے۔

    یاد رہے کہ 27 اگست کو ہالینڈ میں توہین آمیز خاکوں کے متنازع مقابلوں کے خلاف سینیٹ میں ڈپٹی چیئرمین سینیٹ سلیم مانڈوی والا کی زیر صدارت سینیٹ کا اجلاس منعقد ہوا تھا، جس میں پاکستان تحریک انصاف کے سینیٹر شبلی فراز کی جانب سے قرار داد پیش کی گئی۔

    قرارداد میں موقف اختیار کیا گیاکہ مسلمان اپنے پیغمبر کی شان میں گستاخی برداشت نہیں کرسکتے، توہین آمیز خاکوں کا مقابلہ ناقابل برداشت عمل ہے۔

  • گستاخانہ خاکے : نیدر لینڈ کے سفیر کی دفتر خارجہ طلبی، پاکستان کا شدید احتجاج

    گستاخانہ خاکے : نیدر لینڈ کے سفیر کی دفتر خارجہ طلبی، پاکستان کا شدید احتجاج

    اسلام آباد : متنازع اور گستاخانہ خاکوں کے معاملہ پر نیدر لینڈز کے قائم مقام سفیر کو دفتر خارجہ طلب کرلیا گیا، ترجمان نے سفیر کو اسلام مخالف مہم پر گہری تشویش سے آگاہ کیا۔

    تفصیلات کے مطابق ہالینڈ میں گستاخانہ خاکوں کے مقابلے کے معاملے پر دفتر خارجہ نے نیدر لینڈز کے قائم مقام سفیر کو طلب کرکے اسلام مخالف مہم پر شدید تشویش کا اظہار کیا ہے۔

    دفتر خارجہ نے ہالینڈ میں گستاخانہ خاکوں کے مقابلے اسلام کو بدنام کرنے کی دانستہ کوشش قرار دیا، اس حوالے سے ترجمان دفتر خارجہ نے کہا کہ نیدر لینڈز کے سفیر کو وفاقی کابینہ کے احتجاج اور فیصلے سے بھی آگاہ کیا گیا ہے۔

    اس کے علاوہ پاکستانی سفیر کو نیدرلینڈز حکومت اور اوآئی سی میں یہ معاملہ اٹھانے کی ہدایت کی گئی ہے، اقوام متحدہ میں مستقل مندوبین کو بھی معاملہ اٹھانے کا کہا گیا ہے۔

    ترجمان دفترخارجہ نے بتایا ہے کہ وزیرخارجہ شاہ محمود قریشی نے سیکریٹری جنرل او آئی سی کو اس حوالے سے خط لکھا ہے، اس معاملے کو یواین سربراہ اور او آئی سی وزرائے خارجہ اجلاس میں بھی اٹھایا جائے گا۔

    وزیرخارجہ شاہ محمود قریشی وفد کی قیادت کریں گے، ترجمان دفتر خارجہ کا مزید کہنا ہے کہ وفاقی کابینہ کے آج کے اجلاس میں اس حوالے سے شدید مذمت کی گئی ہے، پاکستان اس مسئلے کو دیگر عالمی فورمز پر اجاگر کرتا رہے گا۔

    واضح رہے کہ امیر جماعت اسلامی پاکستان سراج الحق بھی یہ مطالبہ کرچکے ہیں کہ ملک میں نئی بننے والی تحریکِ انصاف کی حکومت ہالینڈ میں توہین آمیز خاکوں کی اشاعت کا نوٹس لے اور اس حوالے سے وزیرِ اعظم عمران خان مشترکہ لائحہ عمل کے لیے اسلامی ممالک سے رابطہ کریں۔

    مزید پڑھیں: گستاخانہ خاکے کی نمائش پر فائرنگ کرنے والا ’نادر صوفی‘ کون تھا ؟

    خیال رہے کہ دو دن قبل قومی اسمبلی میں بھی ہالینڈ میں پیغمبر اسلام کے توہین آمیز خاکوں کے مقابلے کے خلاف قرارداد مذمت متفقہ طور پر منظور کی گئی تھی اور انبیاء کی شان میں گستاخی کو سب سے بڑی دہشت گردی قرار دیا تھا۔

  • حکومت ہالینڈ میں توہین آمیز خاکوں کی اشاعت کا نوٹس لے، سراج الحق

    حکومت ہالینڈ میں توہین آمیز خاکوں کی اشاعت کا نوٹس لے، سراج الحق

    اسلام آباد: امیر جماعت اسلامی پاکستان سراج الحق نے ملک میں نئی بننے والی تحریکِ انصاف کی حکومت سے مطالبہ کیا ہے کہ وہ ہالینڈ میں توہین آمیز خاکوں کی اشاعت کا نوٹس لے۔

    تفصیلات کے مطابق سراج الحق نے مطالبہ کیا ہے کہ حکومت ہالینڈ میں توہین آمیز خاکوں کی اشاعت کا نوٹس لے، وزیرِ اعظم مشترکہ لائحہ عمل کے لیے اسلامی ممالک سے رابطہ کریں۔

    امیر جماعت اسلامی کا کہنا تھا کہ مسلمانوں کے عقیدے و محبت کے مرکز پر حملے کیے جا رہے ہیں، وزیرِ اعظم کو اس صورت حال کا نوٹس لے کر ایک مشترکہ لائحہ عمل ترتیب دینا چاہیے۔

    خیال رہے کہ دو دن قبل قومی اسمبلی نے بھی ہالینڈ میں پیغمبر اسلامﷺ کے توہین آمیز خاکوں کے مقابلے کے خلاف قرارداد مذمت متفقہ طور پر منظور کی تھی اور انبیا کی شان میں گستاخی کو سب سے بڑی دہشت گردی قرار دیا تھا۔

    یہ بھی پڑھیں:  عمران خان کو مبارکباد دیتا ہوں، ان کا اصل امتحان اب شروع ہوا ہے، سراج الحق

    واضح رہے کہ نیدر لینڈز (پرانا نام ہالینڈ) کے اسلام مخالف سیاست دان گیرٹ ولڈرز کی فریڈم پارٹی نے توہین آمیز خاکوں کے مقابلے کا اعلان کیا ہے۔

    توہین آمیز خاکوں کے مقابلے کے اعلان کے بعد ملک بھر میں احتجاجی جلسوں کا آغاز ہو گیا ہے، ہالینڈ میں بھی اس کے خلاف احتجاج کیا جا رہا ہے۔

  • چارسدہ : طالب علم نے پرنسپل کو گولی مارکر قتل کردیا

    چارسدہ : طالب علم نے پرنسپل کو گولی مارکر قتل کردیا

    چارسدہ : شبقدر میں سیکنڈ ائیر کے طالب علم نے توہین رسالت کے مبینہ الزام میں پرنسپل کو قتل کردیا، پولیس اہلکاروں نے ملزم کو آلہ قتل سمیت گرفتارکر کے مقدمہ درج کرلیا۔

    تفصیلات کے مطابق چارسدہ کی تحصیل شبقدر میں مٹہ روڈ پر واقع نیو اسلامیہ کالج کے سیکنڈ ایئر کے طالب علم فہیم اشرف نے پیر کی صبح پرنسپل سریراحمد پر توہین کا الزام عائد کرکے ان پر اندھا دھند فائرنگ کردی۔

    گولیاں لگنے سے سریر احمد شدید زخمی ہوگئے، جنہیں فوری طور پر مقامی اسپتال منتقل کیا گیا تاہم وہ زخموں کی تاب نہ لاتے ہوئے دوران علاج جاں بحق ہوگئے، مقتول کو سر اور سینے میں گولیاں ماری گئیں۔

     پرنسپل کے قتل کے خلاف مشتعل طلبہ اور عوام سڑکوں پر نکل آئے اور شدید نعرے بازی کی، مظاہرے کے دوران اہم شاہراہ پر ٹریفک جام ہوگیا۔

    اس حوالے سے ذرائع کا کہنا ہے کہ ملزم فہیم اشرف تحریک لبیک یارسول اللہ کے اسلام آباد دھرنے میں شرکت کیلئے کلاس سے غیرحاضر رہا تھا، جس پر پرنسپل نے اس کی سرزنش کی جس پر وہ مشتعل ہوگیا، شبقدر تھانے کی پولیس نے ملزم کو جائے وقوعہ سے گرفتار کرکے آلہ قتل برآمد کرکے ایف آئی آر درج کرلی گئی ہے۔