چمن: تاج روڈ پر دھماکہ زوردار دھماکہ متعدد افراد زخمی، تفصیلات کے مطابق بلوچستان کے شہر چمن میں تاج روڈ پر گاڑی میں نصب بم پھٹ گیا۔
دھماکے نتیجے میں ایک شخص جاں بحق اور آٹھ افراد زخمی ہوگئے، دھماکہ اتنا شدید تھا کہ آس پاس کی عمارتوں کے شیشے بھی ٹوٹ گئے، دھماکہ پارکنگ میں کھڑی گاڑی میں ریموٹ کے ذریعے کیا گیا۔
سیکیورٹی فورسز نے علاقے کو گھیرے میں لے لیا، جبکہ زخمیوں کو طبی امداد کیلئے سول اسپتال منتقل کیا گیا ہے،مذکورہ مقام پر بازار ہونے کے باعث لوگوں کا کافی رش رہتا ہے۔
کراچی: متحدہ قومی موومنٹ کے قائد الطاف حسین نے اسلام آباد کری روڈ پر واقع امام بارگاہ پرنمازمغرب کے دوران دہشت گردوں کے حملے کی شدید الفاظ میں مذمت کی ہے اورکئی افرادکے جاں بحق اورزخمی ہونے پردلی افسوس کااظہارکیاہے۔
اپنے بیان میں الطاف حسین نے دہشت گردوں کے حملے کے نتیجے میں جاں بحق ہونے والے افرادکیلئے دعائے مغفرت کی اوران کے لواحقین سے دلی تعزیت کااظہارکیا۔
انہوں نے دھماکے اورفائرنگ کے نتیجے میں شدید زخمی ہونے والے نمازیوں کی صحت یابی کیلئے دعا کی کہ اللہ تعالیٰ زخمیوں کو صحت کاملہ عطا فرمائے ۔
الطاف حسین نے حکومت سے مطالبہ کیا کہ اسلام آباداورراولپنڈی سمیت تمام شہروں میں قائم مساجداور امام بارگاہوں سمیت تمام مذہبی عبادت گاہوں پر حفاظتی اقدامات کو مزید موٴثر کیاجائے اور عوام بھی اپنی مدد آپ کے تحت عبادت گاہوں میں چوکیداری سسٹم نافذ کریں۔
اسلام آباد: شکریال روڈ پر واقع امام بارگاہ امام بارگاہ قصر سکینہ میں دھماکہ اور فائرنگ ہوئی جس کے نتیجے میں 2 افراد جان بحق جبکہ 8 زخمی ہوگئے۔
تفصیلات کے مطابق اسلام ااباد کے شکریال روڈ پر واقع امام بارگاہ امام بارگاہ قصر سکینہ میں دھماکے کے بعد فائرنگ کی اطلاعات موصول ہونے کے بعد پولیس اور ریسکیو ٹیمیں روانہ کر دی گئی گئی ہیں۔
ایدھی زرائع کے مطابق دھماکے کے نتیجے میں 2 افراد جان کی بازی ہار گئے ہیں، جبکہ زخمیوں کو اسلام آباد کے پمز اسپتال میں منتقل کیا جارہا ہے۔
ابتدائی اطلاعات کے مطابق امام بارگاہ میں دھماکے کے بعد علاقے کی بجی بند ہوگئی ہے جس ریسکیو ٹیموں کا کام کر نے مشکلات کا سامنا ہے، دھماکے کی آواز دور دور تک سنی گئی جس سے قریبی عمارتوں کےشیشے بھی ٹوٹ گئے۔
پولیس ذرائع کا کہنا ہے کہ دہشتگردوں کی تعداد 6 سے زائد ہے، انہوں نے مزید بتایا کہ کچھ دہشتگرد قریبی علاقے میں چھپ گئے ہیں ،جن کی گرفتاریوں کے لئے پولیس نے علاقے میں سرچ آپریشن شروع کردیا ہے۔
ترجمان پمز اسپتال کے مطابق جاں بحق ہونے والے دو افراد کی شناخت غلام حسین اور عبدالشکور کے نام سے ہوئی جبکہ دیگر زخمیوں کی حالت بھی تشویشناک ہے جن میں ایم الطاف حسین، سید سخاوت اور ساجد علی شاہ شامل ہیں۔
ذرائع کے مطابق حملہ آور کی امام بارگاہ پر تعینات سیکیورٹی گارڈ سے مزاحمت بھی ہوئی جس کے بعد حملہ آور نے گارڈ کو گولی مار کے اندر گھسا تھا۔
واقعے کے بعد فوج ،رینجرز اور پولیس نے جائے وقوعہ کو گھیرے میں لے لیا ،جاں بحق ہونے والوں میں اے آروائی نیوز کے کیمرہ مین خرم شہزاد قریشی کےو الدغلام حسین قریشی بھی شامل ہیں لاشوں اورزخمیوں کو پمز اسپتال منتقل کیا گیا جہاں دو زخمیوں کی حالت تشویشناک ہے۔
عینی شاہد کے مطابق دھماکہ نماز مغرب کے دوران ہوا، شکریال روڈ پر واقع امام بارگاہ میں فائرنگ کے بعد دھماکے کی آواز سنی گئی ہے۔
عینی شاہدین کے مطابق امام بارگاہ کے گارڈ نے جان کی قربانی دے کر مزید قیمتی جانوں کے ضیاع کو بچا لیا اور خودکش حملہ آور ٹارگٹ تک پہنچنے میں ناکام رہا۔
خودکش حملہ آور نے امام بارگاہ میں گھسنے کی کوشش کی تاہم وہاں موجود گارڈ نے جان پر کھیلتے ہوئے حملہ آور کو گیٹ پر ہی روک لیا جس پر خودکش حملہ آور نے وہیں خود کو دھماکے سے اڑا لیا جس کے نتیجے میں2 افراد شہید ہوئے۔
عینی شاہدین کا کہنا ہے کہ امام بارگاہ میں مغرب کی نماز ادا کی جا رہی تھی اور اگر خودکش حملہ آور اندر گھسنے میں کامیاب ہو جاتا تو شہادتوں کی تعداد کئی گنا زیادہ ہو سکتی تھی۔
جیکب آباد: ریلوے لائن کو دھماکےسے تباہ کردیا گیا جس کے نتیجےمیں خوشحال خان ایکسپریس کی تین بوگیاں پٹری سے اترگئیں اور بارہ افراد زخمی ہوگئے۔
تفصیلات کے مطابق جیکب آباد کے دل مراد ریلوے اسٹیشن کے نزدیک جمعرات کی صبح اس وقت دھماکہ ہوا جب خوشحال خان خٹک ایکسپریس وہاں سے گزر رہی تھی۔
دھماکے کے نتیجے میں ٹرین کی تین بوگیاں پٹری سے اترگئیں جس کے نتیجے میں 12 افراد زخمی ہوگئے ہیں جن میں سے ایک خاتون کی حالت تشویش ناک ہے، زخمیوں کو سول اسپتال جیکب آباد منتقل کردیا گیا ہے۔
دھماکے کی جگہ پرپانچ فٹ گہرا گڑھا پڑگیا ہے جبکہ پچاس فٹ سے زائد ریلوے ٹریک متاثر ہوا ہے۔
پولیس اورقانون نافذ کرنے والے ادارے جائے وقوعہ پر پہنچ گئے ہیں اورعلاقے کوگھیرے میں لے کر تفتیشی کاروائی شروع کردی ہے۔
دوسری جانب ریلوے کا عملہ بھی جائے وقوعہ پرپہنچ کرٹریک کی بحالی میں مشغول ہے، ٹریک کی مرمت تک مرکزی ریلوے ٹریک پر ٹرینوں کی آمد و رفت معطل رہے گی۔
کوئٹہ: سبی میں بجلی ترسیل کرنے والے ٹاوروں کو دھماکے سے اڑادیاگیا، کوئٹہ سمیت بلوچستان کے گیارہ اضلاع تاریکی میں ڈوب گئے۔
تفصیلات کے مطابق گڈو سبی میں ٹرانسمیشن لائن چھتر کے قریب نامعلوم افراد نے ٹاور نمبر چارسو ایک تا چارسو پندرہ کے درمیان دو ٹاوروں کو دھماکہ خیز مواد سے اڑادیا جس کے باعث کوئٹہ سمیت بلوچستان کے سترہ اضلاع تاریکی میں ڈوب گئے ہیں۔
واپڈا حکام نے اے آر وائی نیوز کو بتایا کہ متاثرہ ٹاورکی مرمت کا کام آج شروع کیا جائے گا تاہم جزوی طور پرکچھ پاور پلانٹس سے سبی سمیت کوئٹہ کو بجلی فراہم کی جائے گی۔
بلوچستان میں اس قسم کی کاروائیاں پہلے بھی ہوتی رہیں ہیں جن میں شرپسند عناصر گیس پائپ لائنوں اور ٹرین کی پٹریوں کو نقصان پہنچاتے رہتے ہیں۔
کراچی: متحدہ قومی موومنٹ کے قائد الطاف حسین نے راولپنڈی کے علاقے چٹیاں ہٹیاں میں واقع امام بارگاہ میں بم دھماکے کی شدید الفاظ میں مذمت کی ہے اور بم دھماکے میں متعددافراد کے شہید وزخمی ہونے پرگہرے دکھ اور افسوس کااظہار کیا ہے ۔
الطاف حسین نے کہاکہ محفل میلادالنبی کے دوران امام بارگاہ میں بم دھماکہ کرنے والے خوارج ہیں جو مذہب کا نام لیکر قتل وغارتگری کرکے اللہ تعالیٰ اور نبی کریم کی تعلیمات کی صریحاً نفی کررہے ہیں۔
الطاف حسین نے کہاکہ مذہبی انتہاء پسند دہشت گرد عناصر بم دھماکے اور قتل وغارتگری کرکے شمالی وزیرستان سمیت ملک بھر میں انتہاء پسند دہشت گردوں کے خلاف مسلح افواج کے جاری آپریشن کو ناکام بنانے کی سازش کررہے ہیں لہٰذا وقت کا تقاضہ ہے کہ ایسے سفاک عناصر اور انکی سازشوں کو سختی سے کچل دیا جائے ۔
الطاف حسین نے وزیراعظم میاں نوازشریف اوروفاقی وزیرداخلہ چوہدری نثارعلی خان سے مطالبہ کیا کہ راولپنڈی میں واقع امام بارگاہ میں بم دھماکے کا فوری نوٹس لیا جائے اور بم دھماکے میں ملوث عناصر اور ان کے سرپرستوں کو گرفتارکرکے قرارواقعی سزا دی جائے۔
راولپنڈی: چٹیاں ہٹیاں میں دھماکہ کے نتیجے میں چھ افراد جاں بحق جبکہ متعدد افراد زخمی ہوگئے۔
راولپنڈی کے ریہائشی علاقہ چٹیاں ہٹیاں میں دھماکہ ہوا ، دھماکہ کی جگہ امدادی اور رسکیو ٹیمیں روانہ ہوگئی ہیں، جبکہ قانون نافذ کرنے والے جائے وقوعہ پر پہنچ گئی ہیں۔
پولیس ذرائع کے مطابق دھماکہ امام بارگاہ کے قریب ہوا ہے، دھماکہ کے وقت امام بارگاہ میں عید میلادالنبی کی محفل جاری تھی، ذرائع کا کہنا ہے کہ دھماکا انتہائی شدید تھا، جس کے باعث قریبی عمارتوں کے شیشے ٹوٹ گئے، دھماکے کے نتیجے میں زخمی ہونے افراد کو قریبی ڈسٹرک اسپتال منتقل کیا جارہا ہے ، جبکہ تاحال دھماکے کی نوعیت سے متعلق حتمی طور پر ابھی کچھ معلوم نہیں ہوسکا، واقعے کے بعد علاقے کی بجلی بند ہوگئی۔
حملے کے نتیجے میں امام بارگاہ کی دیوار کو بھی نقصان پہنچا جبکہ دھماکے کے وقت امام بارگاہ میں محفل میلاد جاری تھی، دوسری جانب راولپنڈی کے ڈسٹرکٹ ہیڈ کوارٹر اسپتال میں ایمر جنسی نافذ کردی گئی ہے۔
جعفرآباد : نامعلوم شرپسندوں نے پاکستان ریلوے کی پٹری دھماکہ خیز مواد سے تباہ کردی جس کے باعث سندھ و پنجاب تا بلوچستان ٹرینوں کی آمد ورفت معطل ہوگئی۔
تفصیلات کے مطابق بلوچستان کے ڈسٹرکٹ جعفر آباد کے علاقے ڈیرہ الہٰ یارمیں جمعے کی صبح نامعلوم شرپسندوں نے ریلوے ٹریک کو دھماکہ خیز مواد لگا کر تباہ کردیا ہے ، دھماکے کے مقام پر گہرا گڑھا ہوگیا ہے اوردو فٹ سے زائد ٹریک کو نقصان پہنچا ہے۔
ٹریک کو نقصان پہنچنے کے باعث سندھ اور پنجاب سے بلوچستان آنے جانے والی ٹرینوں کی آمدورفت روک دی گئی ہے اور ٹریک کی مرمت اور بحالی کا کام جاری ہے۔
پولیس اورایف سی کی بھاری نفری جائے وقوعہ پر پہنچ گئی ہے اورواقعے میں ملوث افراد کی تلاش جاری ہے۔
کوئٹہ: سریاب روڈ دھماکے کے نتیجے میں مبینہ دہشتگرد ہلاک ہوگیا۔
پولیس کے مطابق شہر کے نواحی علاقے سریاب روڈ موسیٰ کالونی میں زور دار دھماکہ ہوا دھماکے کی آواز دور دور تک سنی گئی ، واقعے کے بعد سیکورٹی فورسز کی بھاری نفری علاقے میں پہنچ گیا ایس ایس پی آپریشن اعتزاز کے مطابق دہشت گرد بم لے کر اپنے ٹارگٹ پر جارہا تھا کہ اُن کے ہاتھوں میں بم پھٹ گیا جس میں دہشتگرد ہلاک ہوگیا بم دو کلو وزنی تھا مطلوبہ ٹارگٹ سے پہلے بھٹ گیا، مزید تحقیقات سیکورٹی ادارے کررہے ہیں۔
عراق :عراق اور سعودی عرب کی سرحدی بارڈر پر خودکش حملے سے دو سعودی گارڈ جاں بحق اور تین زخمی ہوگئے۔
خبر رساں ایجنسی کے مطابق عراقی سرحدی علاقے عرار کے قریب نامعلوم حملہ آور نے سعودی گارڈز پر فائرنگ کردی جبکہ ایک حملہ آور نے خود کو دھماکے سے اڑا لیا، دھماکے میں ایک سینئر آفیسر سمیت دو سعودی گارڈز جاں بحق اور تین زخمی ہوگئے جبکہ ایک حملہ آور کو گرفتار کرلیا گیا،سعودی افواج شام میں اسلامی ریاست کے خلاف امریکا کی قیادت میں فضائی حملوں میں شامل ہیں۔
دوسری جانب امریکی ائیر فورس افرادی قوت کی کمی کی وجہ سے عراق اور شام کے علاقوں میں کارروائی کرنے کے لیے تیار نہیں۔ امریکی فضائیہ کا کہنا ہے کہ امریکی آپریٹر کو ڈرون کے استعمال میں دشواری کا سامنا ہے اور ڈرون کو آپریٹ کرنے کے لیے مزید افرادی قوت کی ضرورت ہے ورنہ ان حالات میں شام اور عراق میں کارروائی کرنا مشکل ہوجائے گا۔