کوئٹہ : بلوچستان میں ملک کا پہلا اینٹی رائٹس ویمن ونگ قائم کردیا گیا ہے جس کا مقصد ہنگاموں، بدامنی کے دوران حالات اور شرپسندوں سے نمٹنا ہے۔
بلوچستان حکومت نے صوبے میں جدید پولیسنگ کی جانب اہم اقدام اٹھاتے ہوئے ملک کا پہلا شعبہ انسداد فساد خواتین قائم کردیا مذکورہ ونگ میں 40 تربیت یافتہ لیڈیز کیڈٹس شامل ہیں۔
اس حوالے سے اے آر وائی نیوز کے پروگرام شام رمضان میں ترجمان وزیراعلیٰ بلوچستان بابر یوسف زئی نے اس کے قیام سے متعلق اہم وجوہات تفصیل سے بیان کیں۔
انہوں نے بتایا کہ پہلے مرحلے میں ان کو صرف کوئٹہ مین تعینات کیا جائے گا اس کے اگلے مرحلے میں ان کا دائرہ کار پورے بلوچستان تک پھیلا دیا جائے گا۔
بابر یوسف زئی نے بتایا کہ ان خواتین پولیس اہلکاروں کو ہنگاموں، بدامنی کے دوران حالات اور شرپسندوں سے نمٹنے کی خصوصی تربیت دی گئی ہے جب کہ خواتین اہلکاروں کو اینٹی رائٹ سازو سامان اور آلات سے بھی لیس کیا گیا ہے۔
انہوں نے یہ بھی کہا کہ پاکستان میں اس طرح کے خصوصی یونٹ کی پہلے کوئی مثال موجود نہیں، کراچی، لاہور اور پشاور پولیس میں بھی یہ یونٹ قائم نہیں ہوا ہے، ویمن اینٹی رائٹ ونگ قائم کرنا جدید دور کے عسکری تقاضوں میں سے ایک ہے۔
