پیروں میں خون کی گردش نہ ہونے سے ان میں سُن ہونے کی علامات پائی جاتی ہیں، دل سے دور ہونے اور نیچے کی جانب ہونے کے باعث اکثر اوقات خون کے پہنچنے اور واپس آنے میں رکاوٹ ہوتی ہے۔
خون کی اسی رکاوٹ کے سبب پاؤں میں سوجن اور تکلیف کی شکایات بڑھ جاتی ہیں اس کیلئے ضروری نہیں کہ مریض کو ذیابیطس (شوگر) بھی ہو۔
عام طور پر ہم صحت مند سرگرمیوں سے دور رہتے ہیں اس لیے اس کا اثر خون کی گردش پر بھی پڑتا ہے اور خون کو اوپر کی جانب پھیپھڑوں تک واپس جانے کیلئے رکاوٹیں درپیش ہوتی ہیں۔
اگر اس کیفیت کا خیال نہ رکھا جائے تو سوجن کے ساتھ ساتھ دیگر امراض بھی پیدا ہونا شروع ہوجاتے ہیںِ خون کو پیروں تک پہنچانے کی کچھ خاص ورزشیں ہیں جنہیں کرنے سے ہم اس پریشانی یا تکلیف سے بچ سکتے ہیں۔
اس حوالے سے شیخ زید ہسپتال اور کڈنی ٹرانسپلانٹ سینٹر لاہور کے سابق اسسٹنٹ پروفیسر یورولوجی ڈاکٹر خالد جمیل نے ایک پروگرام میں پیروں میں خون کی گردش کیلئے کی جانے والی ورزش کے بارے میں بتایا۔
1 : چہل قدمی
انہوں نے کہا کہ اس کیلئے پیدل چلنا بہت ضروری ہے کیونکہ جب ہم قدم بڑھاتے ہیں تو ہماری پنڈلیوں کے مسلز پمپ کا کام کرتے ہیں اور خون کو واپس اوپر پہنچانے میں اہم کردار ادا کرتے ہیں۔ سب سے بہترین ورزش پیدل چلنا ہے ہر شخص کو روزانہ 10 ہزار قدم پیدل ضرور چلنا چاہیے۔
2 : کھڑے ہوکر ایڑھی اٹھانا
خون کی روانی کو برقرار رکھنے کیلئے دوسری ورزش کھڑے ہوکر ایڑھیاں اٹھانا بھی ہے چاہے تو سیدھے کھڑے ہوجائیں یا سیڑھی کے کنارے پر پنجے رکھ کر ایڑھیوں کو اوپر نیچے کریں۔ اگر کسی دیوار کے سہارے کی ضرورت ہو تو وہ بھی کرسکتے ہیں۔
3 : کمر سیدھی رکھ کر سارا زور ایڑھی پر دیں
اس ورزش کو عام زبان میں اٹھک بیٹھک یا پنجابی میں ڈنڈ لگانا بھی کہتے ہیں فرق صرف اتنا ہے کہ اس میں مکمل نیچے نہیں بیٹھنا تھوڑا سا جھک تے ہوئے سارا زور ایڑھی سے لگانا ہے۔
4 : سائیکل چلانا
سائیکل چلانا بھی بہت زبردست ورزش ہے گار چاہیں تو باہر سڑک پر چلائیں یا گھر میں سائیکلنگ ایکسرسائز مشین بھی استعمال کرسکتے ہیں۔
5 : پٹھوں کو لمبا کرنا
اس ورزش کا طریقہ ہے کہ ایک ٹانگ کو اٹھا کر کسی کرسی یا اس جتنی اونچی جگہ پر رکھ کر پٹھوں کو کھینچیں اور ہاتھ سے پنجے کو چھوئیں۔
6 : لیٹ کر پاؤں کی ورزش
اس کا طریقہ یہ ہے کہ سیدھے لیٹ کر دونوں ٹانگیں کسی اسٹول پر رکھ کر اونچی کریں اور اور دونوں پیروں کو کلاک اور اینٹی کلاک وائز گھمائیں۔
7 : فوم رول کی مدد سے ورزش
فوم رول عام طور پر بازار میں دستیاب ہوتے ہیں اس طریقہ یہ ہوتا ہے کہ رول کو ران کے نیچے رکھ کر اس پر زور دیتے ہوئے حرکت دیں۔
8 : مالش کرنا
اس کے علاوہ ہفتے میں دو سے تین بار پیروں کی مالش ضرور کریں اور کسی معیاری سرسوں کا کھوپرے یا زیتون کے تیل سے مساج کریں۔
9 : سانس لینے کا طریقہ
ورزش کے کیلئے ایک خاص انداز سے سانس لینا بہت مفید ہے اس کا فائدہ یہ ہوتا ہے کہ خون کی تنگ نالیاں کھل جاتی ہیں، ایک منٹ میں 6 سے 7 مرتبہ ایسے سانس لیں کہ ناک سے ہوا لے جاکر 6 سے سات سیکنڈ بعد ناک سے ہی باہر نکالیں۔ یہ عمل پانچ منٹ تک لازمی کریں۔ ایسا کرنے سے آپ کا بلڈ پریشر بھی نارمل ہوجائے گا۔،
ڈاکٹر خالد جمیل نے بتایا کہ اس عمل کو اپنی زندگی کا حصہ بنا لیں کم از کم چھ مہینے لازمی کریں آپ اپنے اندر بہتر تبدیلی محسوس کریں گے۔
