دبئی: متحدہ عرب امارات میں قاتل گیم بلیو وہیل نے پنجے گاڑ لیے، ایک لڑکی اور ایک لڑکے نے ٹاسک مکمل کرنے کے لیے اپنی زندگی کا خاتمہ کرلیا۔
دبئی پولیس کے مطابق تحقیقات کی جارہی ہیں کہ دو فلپائنی طلباء کی خودکشی کرنے کی وجہ کیا تھی، آٰیا انہوں نے بلیو وہیل گیم کا ٹاسک پورا کرنے کے لیے خودکشی کی ہے یا وجہ کچھ اور ہے۔
خودکشی کرنے والے طلباء کی عمریں 15 سے 16 سال کے درمیان بتائی جاتی ہیں، دونوں طلباء یونائیٹڈ انٹرنیشنل پرائیویٹ اسکول میں گریٹ 10 کے طالب علم تھے۔
مزید پڑھیں: خودکش بلیو وہیل گیم پاکستان پہنچ گیا، خیبرپختونخواہ کے 2 نوجوان متاثر
دبئی پولیس نے گلف نیوز سے گفتگو کرتے ہوئے کہا کہ دونوں طلباء کا تعلق ایک ہی اسکول سے ہے تاہم دونوں ایک دوسرے کو جانتے نہیں تھے، لڑکی کے کمرے کے اندر اپنی زندگی کا خاتمہ کیا جبکہ لڑکے نے بلڈںگ کے 8 ویں فلور سے چھلانگ لگا کر خودکشی کی۔
دبئی پولیس کا کہنا ہے کہ ہوسکتا ہے کہ طلباء نے خودکشی کسی پریشانی کے سبب کی ہو، لیکن بلیو وہیل گیم کے ٹاسک کو مکمل کرنے بھی خودکشی کی جاسکتی ہے تاہم ابھی کچھ کہنا ممکن نہیں ہے۔
پولیس کے مطابق بدھ کی رات کال موصول ہوئی جس میں کہا گیا کہ ال غوثیہ کے علاقے میں عمارت کے 8 ویں منزل سے نوجوان نے چھلانگ لگا کر خودکشی کرلی ہے، فلپینی طالب علم کے والد کا کہنا ہے کہ ان کا بیٹا بہت ہی ہونہار طالب علم تھا یقین نہیں آرہا کہ اس نے یہ اقدام کیوں اُٹھایا۔
ابتدائی تحقیقات کے مطابق لڑکی نے اس وقت کمرہ بند کرکے اپنی زندگی کا خاتمہ کیا جب اس کے والد دوسرے کمرے میں سو رہے تھے، مقتولہ کے دوست اور فیملی ممبر خودکشی پر حیران و پریشان ہیں۔
فلپائن کے قونصل جنرل پال ریمنڈ کا کہنا ہے کہ وہ مذکورہ واقعے کی تحقیقات کے حوالے سے اسکول انتظامیہ اور پولیس سے رابطے میں ہیں تاہم حتمی رپورٹ آنے کے بعد ہی کچھ کہا جاسکے گا۔
