کراچی : پی آئی اے کے بورڈ آف ڈائریکٹر کے اعداد وشمار کے مطابق ادارے کا سال 2018میں مجموعی خسارہ437ارب روپے سے تجاوز کرگیا ہے، ایک سال میں خسارہ کی اڑان میں32 فیصد اضافہ ریکارڈ کیا گیا۔
تفصیلات کے مطابق پی آئی اے کے بورڈ آف ڈائریکٹر نے مالی سال 2018 کے نتائج کی منظوری دے دی ہے، گزشتہ روز کراچی میں ہونے والے بورڈ آف ڈائریکٹر کے اجلاس میں منظوری کے بعد پی آئی اے نے باضابطہ طور پرسال2018 کے مالی نتائج کا اعلان کیا۔
رپورٹ کے مطابق سابقہ ادوار میں ناقص حکمت عملی کے باعث پی آئی اے کو 2018 میں بھی خسارے کی اڑان بلندی پر رہی۔67 ارب 32 کروڑ روپے کا خسارہ ہوا۔
ایک سال میں پی آئی اے کے خسارہ کی اڑان میں32 فیصد اضافہ ریکارڈ کیا گیا۔ پی آئی اے کے جاری کردہ مالی سال کے نتائج میں اعداد و شمار کے مطابق قومی ائیرلائن کو2017 میں50 ارب98 کروڑ روپے کا خسارہ ہوا تھا۔
سالانہ رپورٹ کے مطابق پی آئی اے کا مجموعی خسارہ31 دسمبر 2018کو437 ارب روپے سے تجاوز کر گیا ہے جبکہ31 دسمبر تک پی آئی اے پر مجموعی قرضہ 288ارب روپے تک جا پہنچا۔
جس کی مد میں پی آئی اے کو قرض پر سالانہ16 ارب روپے سود ادا کرنا پڑ رہا ہے، قومی ائیرلائن نے مالی نتائج اسٹاک ایکسچینج میں بھی جمع کرادیئے ہیں۔
