Tag: boieng 777

پیرس: بحرِہند کے جزیرے لاری یونین سے ملنے والا جہاز کا پرکا حصہ جو کہ مبینہ طورپر16 ماہ قبل لاپتہ ہونے والے ملیشین طیارے کا ہے، تحقیق کاروں کے حوالے کردیا گیا۔

پیرس ایئرپورٹ کی ویب سائٹ نے تصدیق کی ہے کہ لاری یونین کے ساحل سے ملنے والا پرکا حصہ مزید تحقیق کے لئے وزارتِ دفاع کے زیرانتظام لیبارٹری بھجوایا جارہا ہے جو کہ تولوز شہرمیں واقع ہے۔ طیارے کے پرکی حفاظت کے لئے پولیس اس کے ہمراہ رہے گی۔

ملیشیا کے وزیرِٹرانسپورٹ نے جمعے کو کوالالمپور میں میڈیا سے گفتگو کرتے ہوئے بتایا کہ ’’اس بات کی تصدیق ہوچکی ہے کہ لاری یونین سے ملنے والا جہاز کا حصہ بوئنگ 777 کا ہے اور عنقریب پرواز نمبر’ایم ایچ 370‘کی گمشدگی کا معمہ حل ہونے والا ہے۔

وزیرٹرانسپورٹ عبدالعزیز کپراوی کا کہنا تھا لا ری یونین سے ملنے والے پر کے حصے پر موجود سیریل نمبر سے تصدیق ہوگئی ہے کہ وہ ملیشیا کے گمشدہ طیارے کا ہے اور اب ہم یہ یقین کرسکتے ہیں کہ ایم ایچ 370 بحرہند میں کہیں حادثے کا شکارہوا ہے۔

واضح رہے کہ بد قسمت طیارہ بوئنگ 777 پرواز نمبر ایم ایچ 370 اب سے لگ بھگ 16 ماہ قبل مارچ 2014میں لاپتہ ہوگیاتھا ، طیارے میں عملے سمیت 239 افراد سوار تھے۔

ایم ایچ 370 نامی یہ پرواز کوالالمپور سے چین کے شہر بیجنگ جارہی تھی۔