ممبئی: بالی ووڈ کی اداکارہ سونم کپور نے اپنی خواہش کا اظہار کرتے ہوئے کہا کہ میں طویل عرصے تک بالی ووڈ پر راج کرنا چاہتی ہوں۔
انہوں نے انٹرویو میں کہا کہ میری فلم بہت جلد ریلیز ہو رہی ہے اور میں اس فلم کی کامیابی کیلئے بہت پُرامید ہوں۔
انہوں نے بالی ووڈ میں کم کام کرنے کی وجہ بتاتے ہوئے کہا کہ میں اس انڈسٹری میں طویل عرصے تک راج کرنا چاہتی ہوں، اسی وجہ سے کم کام کرتی ہوں۔
ممبئی : بالی وڈ کی بلاک بسٹر ہیروئن دپیکا پڈکون نئی فلم پیکو میں حقیقی رنگ بھرنے کے لیے بنگالی زبان سیکھیں گی۔
چنائے ایکسپریس میں تامل رام لیلا میں گجراتی لڑکی کا کردارکرنے والی دپیکا اب نئی فلم میں بنگالن بنیں گی، جس کے لیے اداکارہ نے بنگالی زبان سیکھنا شروع کر دی ہے، شوجت سرکر کی ہدایتکاری میں بننے والی فلم پیکومیں امیتابھ بچن ، دپیکا کے والد کا کردار کریں گے۔
ممبئی : بالی ووڈ اداکارہ سوناکشی سنہا نے فلم ’’تیور‘‘ اداکاری کے ساتھ ساتھ اپنی آواز میں ایک گانا بھی ریکارڈ کروایا ہے، اداکارہ نے اپنی آنیوالی فلم ’’تیور‘‘ کے ٹریلر کے لانچ کرنے کی تقریب کے موقع پر صحافیوں سے گفتگو کرتے ہوئے کہا وہ ایک اچھی باتھ روم سنگر ہوں اور مادھوری کی طرح رقص کرنا چاہتی ہیں۔
سوناکشی کا کہنا تھا کہ ہم فلم کی شوٹنگ میں مصروف تھے کہ عمران خان نے مجھے فلم کے لیے گانا گانے پر اصرار کیا اور ساتھ ہی ہدایتکار امیت نے بھی میرا حوصلہ بڑھایا، اس موقع سے فائدہ اٹھاتے ہوئے لیٹس سیلیبریٹ گانے کو اپنی آواز میں ریکارڈ کروادیا۔
سوناکشی نے کہا کہ گانا ریکارڈ ہونے کے بعد سب نے میری تعریف کی اور پسند کیا، اس کے باوجود میں خود کو ایک گلوکارہ نہیں سمجھتی، میں ایک اچھی باتھ روم سنگر ہوں اور مستقبل میں گلوکاری کا سلسلہ جاری رکھنے کے لیے تربیت ضرور لوں گی۔
فلم میں ڈانس سے متعلق سوناکشی نے کہا کہ میں نے اب تک پربھودیوا سے بہت کچھ سیکھا ہے اور وہ بہت اچھے کوریو گرافر ہیں، تاہم تیور میں جنگلی طرز پر رقص کا مظاہرہ کیا ہے۔ فلم انڈسٹری میں مادھوری ڈکشٹ سے بہت متاثر ہوں اور میری خواہش ہے کہ ان ہی کی طرح رقص کروں۔
واضح رہے کہ امیت شرما کی ہدایتکاری میں بننے والی یہ فلم 2003 میں بننے والی تیلگو فلم ’’اوکاڈو‘‘کا ریمیک ہے، فلم کی دیگر کاسٹ میں ارجن کپور، منوج باجپائی ‘ قدیر خان اور شروتی ہاسن شامل ہیں، بونی کپور ،سنجے کپور سنی لیولا،نریش اگروال اور سنیل منچند کی اس مشترکہ پروڈکشن کو آئندہ سال 9 جنوری کو سینما گھروں کی زینت بنایا جائے گا۔
ممبئی :بالی ووڈ اداکارہ کرینہ کپور اپنی نئی فلم کے لیے اپنے لمبے بالوں کو بھی کٹوا کر چھوٹا کر رہی ہیں۔
ممبئی کرینہ کپور کرداروں کے حوالے سے تجربات کرنے کی عادی ہیں اور لگتا یہی ہے کہ وہ ہر آزمائش پر پوری اترنے کی جستجو میں ہیں، یہ خبر گرم ہے کہ وہ نئی فلم کے لیے اپنی لمبی گھنی زلفوں کی بھی قربانی دینے جارہی ہیں۔
کرینہ کپور کی ان دنوں کوئی فلم زیادہ دنوں تک سنیما گھروں میں ٹک نہیں پاتی لیکن بالی وڈ کی ہیروئن گبھرائی نہیں۔
اب خبر آئی ہے کہ ان کی نئی آنے والی فلم کے لیے وہ اپنے لمبے بالوں کو بھی کٹوا کر چھوٹا کر رہی ہیں، دیکھنا یہ ہے کہ ان کا یہ کردار فلم بینوں کو کس حد تک متاثر کرے گا۔
ممبئی : بولی وڈ حسینہ دپیکا پڈوکون اس وقت اپنے عروج پر ہیں اور ان کی لگ بھگ ہر فلم ہی سو کروڑ کلب کا حصہ بن رہی ہے جس میں نیا اضافہ ہیپی نیو ایئر کی شکل میں ہوا ہے۔
ان کی آخری تین فلمیں ‘یہ جوانی ہے دیوانی، چنائی ایکسپریس اور رام لیلا’ نے سو کروڑ کلب میں جگہ بنائی تھی اور شاہ رخ کے ساتھ نئی فلم نے بھی یہ سنگ میل طے کرکے انہیں سو کروڑکلب کی ملکہ بنا دیا ہے، دپیکا نے اپنا کریئر فرح خان کی فلم ‘اوم شانتی اوم’ میں بولی وڈ کنگ خان کے مدمقابل شروع کیا تھا، جس کی کامیابی نے ان کے پرستاروں کی تعداد بڑھائی اور ناقدین کو گرویدہ بنالیا۔
بالی وڈ میں کامیاب ڈیبیو کے بعد اداکار نے ‘بچنا اے حسینو اور لو آج کل’ جیسی ہٹ فلمیں دیں، تاہم اس کے بعد دپیکا کا کریئر مختلف فلموں کی ناکامی سے زوال پذیر نظر آنے لگا، جس کے بعد فلم ‘کاک ٹیل’ دپیکا کے کریئر میں ٹرننگ پوائنٹ کی شکل میں ابھر کر سامنے آئی، جس میں ان کی بے باک اداکاری کو بہت زیادہ سراہا گیا۔
گزشتہ برس ان کی پہلی فلم ‘ریس ٹو’ تھی ،جس میں وہ سیف علی خان کے ساتھ نظر آئیں جو اگرچہ ناقدین کو تو کچھ زیادہ نہیں بھائی لیکن 2013 میں پہلی سو کروڑ کمانے والی فلم بنی۔
اس کے بعد یہ جوانی ہے دیوانی میں دپیکا کی رنبیر کے ساتھ جوڑی باکس آفس پرخوب جمی، اس رومانوی فلم نے تین سو کروڑ کے قریب بزنس کیا۔ فلم کی کہانی من موجی نوجوان لڑکے بنی یعنی رنبیر کپور اور دیسی گرل نینا کا کردار نبھانے والی دپیکا کی محبت سے بھرپور تھی۔
فلم کے گانے ‘بدتمیز دل اور بلم پچکاری’ نے مقبولیت کے نئے ریکارڈ قائم کیے جبکہ بولی وڈ کی ڈانسنگ کوئین مادھوری ڈکشٹ کی گانے گھاگرا میں پرفارمنس نے فلم کو مزید پُرکشش بنا دیا، بعد ازاں شاہ رخ خان اور دپیکا کی ‘چنائی ایکسپریس’ نے 373 کروڑ روپے سے زائد کا بزنس کیا، دپیکا کو چنائی ایکسپریس پر ان کے کردار کیلئے تین ایوارڈز دیئے گئے۔
سال کی آخری فلم ‘رام لیلا’ تھی، جس میں اداکار رنویر سنگھ کے ساتھ دپیکا کی جوڑی نے شائقین کو دیوانہ کر دیا، اس فلم نے 200 کروڑ روپے سے زائد کا بزنس کیا، فلم ‘رام لیلا’ کو ہدایت کار سنجے لیلا بھنسالی نے ڈائریکٹ کیا۔
رواں برس دپیکا نے ایک بار پھر شاہ رخ کے ساتھ تیسری مرتبہ ہیپی نیو ایئر میں کام کیا، جس نے صرف تین دن میں ہی سو کروڑ سے زیادہ کا بزنس کر کے ریکارڈ قائم کر دیا ہے۔
ممبئی: معروف ولن شکتی کپور کی بیٹی اداکارہ شردھا کپور اپنے کیریئر میں پہلی بار آئٹم سانگ کرنے والی ہیں، شردھا اس سانگ کے متعلق بہت پرجوش نظر آئیں۔
انگریزی اخبار ڈی این اے میں شائع شدہ خبر کے مطابق کرن جوہر کی فلم ’انگلی‘ میں شردھا کا آئٹم سانگ شامل کیا جانے والا ہے، اس فلم کی ہدایت رینسل ڈیسلوا دے رہے ہیں۔
اخبار سے بات چیت کرتے ہوئے شردھا نے کہاکہ مجھ پر ناچ بسنتی نام کا گانا فلمایا جائے گا، فلم میں اس کے علاوہ میرا کوئی رول نہیں ہے لیکن میں اس نئے چیلنج کے بارے میں بہت پرامید ہوں۔
اس فلم میں عمران ہاشمی، کنگنا راناوت، رندیپ ہوڈا اور سنجے دت اہم کردار ادا کر رہے ہیں، معروف ولن شکتی کپور کی بیٹی اداکارہ شردھا کپور اپنے کیریئر میں پہلی بار آئٹم سانگ کرنے والی ہیں۔
ممبئی: بالی ووڈ اداکارہ دیپکا پڈکون نے کہا ہے کہ ایوارڈ میرے لئے انتہائی اہمیت کا حامل ہے کیونکہ یہ کسی کے کام کو سراہنے کی علامت ہوتا ہے۔
میڈیا سے گفتگو کرتے ہوئے انہوں نے کہا کہ ایوارڈ آرٹسٹ کو سراہنے اور اس کے محنتی ہونے کی علامت ہے۔ انہوں نے کہا کہ یہی وجہ ہے کہ ایوارڈ میرے لئے بھی اہمیت کا حامل ہے۔
انہوں نے کہا کہ گذشتہ سال ایوارڈ نہ ملنے پر مایوسی ہوئی تھی، ایوارڈ ملنے سے پہلے خواہ ہم کچھ بھی کہتے رہیں لیکن جس دن ایوارڈ تقریب ہوتی ہے، اس دن ہم میں سے ہر ایک ایوارڈ ملنے کا خواہاں ہوتا ہے۔
ممبئی: بالی ووڈ اداکارہ پرینیتی چوپڑا نے کہا ہے ان کا پہلا جنون گلوکاری ہے، بالی ووڈ اداکارہ پرینیتی چوپڑا نے اپنے انٹرویو میں کہا کہ ان کی پہلی محبت گلوکاری ہے۔ جس کا انہیں جنون کی حد تک شوق ہے۔ لیکن قسمت انہیں اداکاری کے میدان میں لے آئی اور انہیں انڈسٹری میں مقام بھی حاصل ہے۔
پرینیتی نے کہا کہ جب بھی انہیں موقع ملا وہ گلوکاری کا شوق ضرور پورا کریں گی وہ امید کرتی ہیں کہ انہیں جلد ہی گلوکاری کی پیشکش ہو۔
اداکارہ پرینیتی کی فلم ”کل دل” جس میں ان کے ساتھی اداکار رنویر سنگھ، علی ظفر اور گوندا ہیں، جلد ہی سینما گھروں میں نمائش کے لئے پیش کی جائے گی، فلم کی ہدایات شاد علی نے دی ہے۔
ممبئی: بالی ووڈ اداکارہ کرشمہ کپور شادی کے بعد ایک بار پھر فلموں میں کام کرنے کیلئے پرعزم نظر آ رہی ہیں۔
کرشمہ کپور کا کہنا ہے کہ وہ ایک اچھے اسکرپٹ کی تلاش میں ہیں اور جیسے ہی انھیں ان کی مرضی کا کردار ملے گا وہ ہامی بھر لیں گی، بلا ک بسٹر فلم راجہ ہندوستانی کی ہیروئن کرشمہ کپور کا مزید کہنا ہے کہ وہ اپنے آپ کو خوش قسمت سمجھتی ہیں کہ فلم انڈسٹری چھوڑنے کے بعد بھی انھیں لا تعداد فلموں میں کام کرنے کی پیشکش ہو چکی ہے ۔
انھوں نے کہا کہ اب عنقریب ان کے مداح انھیں بڑی اسکرین پر دیکھیں گے۔
ممبئی: حال ہی میں کامیاب فلم ”میری کوم“ دینے والی بالی ووڈ اداکارہ پریانکا چوپڑا کو آشوب چشم ہوگیا ہے، جس کی وجہ سے وہ آرام کرنے پر مجبور ہوگئی ہیں اور آنکھوں کے انفکشن کی وجہ سے وہ اب دیوالی بھی پرجوش انداز میں نہ منا سکیں، پریانکا چوپڑا ان دنوں سنجے لیلہ بھنسالی کی فلم ”بجراوٴ ستانی“ کی عکسبندی کروا رہی ہیں اور آنکھ کے انفکشن کی وجہ سے انھیں نہ صرف فلم کی عکسبندی روکنا پڑی بلکہ وہ اپنی خواہشات کے مطابق دیوالی بھی نہیں منا پائیں گی۔
اس موقع پر پریانکا چوپڑا نے ٹویٹر پر اپنے پیغام میں کہا ہے کہ ”وہ آشوب چشم کی وجہ سے بستر پر پڑی ہیں‘ انھیں بالکل اچھا نہیں لگ رہا کہ دیوالی آرہی ہے۔ وہ ہمیشہ دیوالی بہترین انداز میں مناتی ہیں، اس بار وہ دیوالی کی خوشیاں من پسند طریقے سے نہیں منا پائیں گی۔
اپنے ٹویٹ میں پریانکا نے اپنی سرخ آنکھوں والی تصویر بھی شیئر کی ہے اور ساتھ ہی لکھا ہے کہ”اسے مت دیکھیں۔ “ پریانکا کے ساتھ اس فلم میں رنویر سنگھ اور سوناکشی سنہا بھی کرداروں میں شامل ہیں۔
بتایا جاتا ہے کہ اپنی نئی فلم ”بجراوٴ مستانی “ میں بھی پریانکا چوپڑا سابق فلم ”میری کوم “ کی طرح پھر سے ایک بھرپور کردار ادا کر رہی ہیں، جس کے فلم ساز بھنسالی ہیں اور یہ محض ایک اتفاق ہی ہے کہ بھنسالی ہی کی گزشتہ دونوں ریلیز ہونے والی فلموں میں پریانکا ہی کاسٹ میں شامل رہی ہیں جب کہ صرف فلم ”رام لیلہ“ میں پریانکا نے صرف ایک آئٹم سانگ کیا تھا جو کہ بھنسالی کی فلمسازی کے ساتھ ساتھ ایک ڈائریکٹشنل فلم بھی تھی جس میں وہ بطور ہدایتکار بھی سامنے آئے۔