کوئٹہ : بلوچستان کے شہر کوئٹہ میں ڈبل روڈ پر دھماکہ کے نتیجے میں دوافراد زخمی ہوگئے، دھماکے سے دو گاڑیاں بھی مکمل تباہ ہوگئیں۔
پولیس حکام کے مطابق شہر کے وسطی علاقے ڈبل روڈ پر نجی اسپتال کے قریب سریاب فلائی اوور کے نیچے افطاری سے چند منٹ قبل زوردار دھماکہ ہوا جس کے نتیجے میں ارباب غلام علی روڈ اور چشمہ اچوزئی کے رہائشی دو افراد زخمی ہوگئے۔
دھماکے میں دو گاڑیاں مکمل تباہ ہوگئیں ،پولیس حکام کے مطابق دھماکہ ٹائم ڈیوائس کے ذریعے کیا گیا۔ بم ڈسپوزل اسکواڈ اور علاقہ پولیس جائے وقوعہ پر پہنچ گئیں۔
بم ڈسپوزل اسکواڈ کے ذرائع کا کہنا ہے کہ دھماکہ میں پانچ سے چھ کلوگرام دھماکہ خیز مواد استعمال کیا گیا جو ایک کریٹ میں رکھا گیا تھا۔
زخمیوں کو طبی امداد کیلئیے فوری طور پر قریبی اسپتال منتقل کر دیا گیا ہے جہاں ان ک حالت خطرے سے باہر بتائی جا رہی ہے۔
