کراچی : شہر قائد میں دہشت گردی کی کوشش ناکام بنادی گئی، بم ڈسپوزل اسکواڈ نےسینٹرل جیل کے قریب رکھا گیا بم نارکارہ بنادیا۔
سہراب گوٹھ کے قریب پولیس موبائل پر کریکر حملے میں دو اہلکار زخمی ہوگئے۔ پولیس ذرائع سے ملنے والی اطلاعات کے مطابق سینٹرل جیل کے قریب شاہراہ پر رکھے گئے بم کو بم ڈسپوزل اسکواڈ نے موقع پر پہنچ کر ناکارہ بنادیا۔
پولیس کے مطابق بم ٹائم ڈیوائس کے ساتھ منسلک تھا جس کا وزن آدھا کلو سے زائد تھا ۔ پولیس کاکہنا ہے کہ بارودی مواد کے ساتھ کیلیں بھی نصب تھیں، بم رکھنے کامقصد خوف و ہراس پھیلانا تھا۔
سہراب گوٹھ کے قریب فیڈرل بی انڈسٹریل ایریا میں پولیس موبائل کے قریب کریکر حملے سے دو اہلکار زخمی ہوگئے ۔ گلستان جوہر بلاک 18 اورجوہر موڑ کے قریب فائرنگ سے دو افراد زخمی ہوگئے ۔
منگھوپیر ، اورنگی ٹاؤن ، زمان ٹاؤن ،پہلوان گوٹھ مین مبینہ پولیس مقابلوں کے دوران آٹھ ملزمان کو زخمی حالت میں گرفتار کرکے اسلحہ اور منشیات برآمد کرلی گئی ، سائٹ لیبر اسکوائر کے علاقے سے ملنے والے مارٹر بم کو بم ڈسپوزل اسکواڈ نے ناکارہ بنادیا ۔
