اسلام آباد: وزارت قومی صحت کے ادارے بارڈر ہیلتھ سروسز میں اندھیر نگری چوپٹ راج چل رہا ہے، ذرائع نے انکشاف کیا ہے کہ ادارے میں حساس عہدوں پر جونیئر اور نا تجربہ کار ڈاکٹرز تعینات کیے گئے ہیں۔
ذرائع وزارت صحت کے مطابق ایئر پورٹس، بندرگاہ اور کراسنگ پوائنٹس جیسے حساس مقامات پر ہیلتھ سروسز میں جونیئر ڈاکٹرز تعینات کیے گئے ہیں، یہ تعیناتیاں قادر پٹیل کے دور میں ہوئی ہیں۔
ذرائع کا کہنا ہے کہ حساس مقامات پر تعینات ڈاکٹرز ماسٹرز اِن پبلک ہیلتھ نہیں ہیں، بلکہ ایئرپورٹ، بندرگاہ اور کراسنگ پوائنٹس کے انچارج ڈاکٹرز ایم بی بی ایس ہیں، بارڈر ہیلتھ سروسز میں گریڈ 19 کے 4 سنیئر ڈاکٹرز موجود ہیں، اور گریڈ 18 کے 20 تجربہ کار ڈاکٹرز ہیں۔
ذرائع کے مطابق پشاور میں تعینات گریڈ 17 کے ڈاکٹر فریض الدین پر نوازشات کی بارش کی گئی ہے، ڈاکٹر فریض بہ طور انچارج پشاور ایئرپورٹ، سول سرجن، طورخم پوائنٹ تعینات ہیں، جب کہ گریڈ 17 کے ڈاکٹر علی زرداری انچارج جناح ایئرپورٹ کراچی تعینات ہیں، اور ڈیپوٹیشن ڈاکٹر عابدہ انچارج کراچی سی پورٹ تعینات ہیں۔
گریڈ 17 کے ڈاکٹر صوفان شاہ انچارج فیصل آباد ایئرپورٹ، گریڈ 17 کے ڈاکٹر سکندر انچارج علامہ اقبال ایئرپورٹ لاہور، گریڈ 17 کے ڈاکٹر زبیر انچارج گوادر ایئرپورٹ و بندرگاہ، جب کہ گریڈ 17 کی ڈاکٹر حمیرہ انچارج واہگہ بارڈر تعینات ہیں۔
