اسلام آباد : سیکرٹری خارجہ اعزاز چودھری نے کہا ہے کہ یمن میں پھنسے ہوئے پاکستانیوں کو بحفاظت نکالنے کیلئے جامع پلان بنا لیا ہے ۔
پاک بحریہ کے دو جہاز یمن روانہ کئے جا رہے ہیں، ان خیالات کا اظہار انہوں نے دفتر خارجہ میں میڈیا کو بریفنگ دیتے ہوئے کیا۔
انہوں نے کہا کہ سعودی عرب کی سالمیت کو خطرہ ہواتو پاکستان اس کا منہ توڑ جواب دیگا۔بریفنگ دیتے ہوئے سیکریٹری خارجہ کا کہنا تھاکہ یمن میں پھنسے پاکستانیوں کو نکالنے کیلئے جامع پلان بنا لیا ہے، جس کی نگرانی وزیراعظم کر رہے ہیں۔
انہوں نے کہا کہ اس وقت صنعا سے چھ سو پاکستانیوں کا قافلہ حدیدہ کی جانب رواں دواں ہے، اعزاز چودھری نے بتایا کہ اگلے اڑتالیس گھنٹوں میں ایک وفد سعودی عرب جارہا ہے جہاں حالات کا اندازہ لگایا جائے گا۔
انہوں نے کہا کہ پاک بحریہ کے دو جہاز بحیرہ احمر کی جانب روانہ کئے جا رہے ہیں، اعزاز چودھری کا کہنا تھا کہ پاکستان سعودی عرب کی جانب ہونے والی کسی بھی حملے کا منہ توڑ جواب دیگا۔
اعزازچودھری نے بتایا کہ حکومت پاکستان دو ماہ سے یمن کا جائزہ لے رہی تھی اور اس نے فروری کے آخرمیں پاکستانیوں کو یمن چھوڑ دینے کی ہدایت کی تھی ۔
انہوںنے پاکستانیوں کے انخلاء کے حوالے سے پاکستانی سفیر کی خدمات کو سراہا۔
