کراچی : شہر قائد کے مختلف علاقوں میں صبح ساڑھے 6 بجے اچانک بجلی غائب ہوگئی، بجلی کی معطلی سے شہر کا نصف حصہ بجلی سے محروم ہوا تھا تاہم اب نیشنل گریڈسے بجلی کی فراہمی جزوی طور پر بحال ہونا شروع ہوگئی ہے۔
تفصیلات کے مطابق کے الیکٹرک نے ایک مرتبہ پھر کراچی والوں کی نیندیں حرام کر دیں، صبح ساڑھے 6 بجے بجلی کا بریک ڈاؤن ہوا اور گھنٹوں وقت گزرنے کے باوجود اب تک بجلی بحال نہ ہوسکی۔
کراچی میں بجلی کی معطلی کے حوالے سے کے الیکڑک نے سماجی رابطے کی ویب سائٹ ٹویٹر پر بجلی بریک ڈاؤن کی تصدیق کرتے ہوئے کہا کہ ای ایچ ٹی نیٹ ورک ٹرپ ہونے کے باعث شہر کا نصف حصّہ بجلی سے محروم ہوگیا۔
ای ایچ ٹی ٹرپنگ کے باعث شہر میں بجلی کی فراہمی متاثر ہے۔ نیشنل گرڈ سے بھی سپلائی منقطع ہے۔ بحالی کا عمل شروع کیا جارہا ہے۔
— KE (@KElectricPk) October 4, 2018
کے الیکڑک کے مطابق نیشنل گرڈ اسٹیشن سے کراچی کو دی کی جانے والی بجلی بھی بند ہے جبکہ بجلی کی بحالی کا کام شروع کردیا گیا ہے تاہم کے الیکڑک حکام کی جانب سے بجلی منقطع ہونے کی وجوہات نہیں بتائی گئی ہیں۔
ذرائع کے مطابق بریک ڈاؤن سے متاثر ہونے والے علاقوں میں ملیر، ماڈل کالونی،فیڈرل بی ایریا، ناظم آباد، کورنگی،لانڈھی، ڈیفنس ،کلفٹن ،گزری ، نارتھ کراچی، پی ای سی ایچ ایس اور بہادر آباد سمیت کئی علاقے شامل ہیں۔
ذرائع کا کہنا ہے کہ متاثرہ علاقوں میں صبح ساڑھے 6 بجے بجلی منقطع ہونے کے باعث طالب علموں اور دفاتر جانے والے افرادں کو شدید مشکل کا سامنا کرنا پڑا۔
مزید پڑھیں : کراچی میں بجلی کا بڑا بریک ڈاؤن
یاد رہے کہ محض دو روز قبل بھی شہر قائد کے باسیوں کو بجلی سے محروم کردیا گیا تھا پیر کی صبح 4 بجے بجلی کا بریک ڈاؤن شروع ہوا اور کئی گھنٹے سے زائد کا وقت گزرنے کے باوجود بجلی بحال نہیں ہوسکی تھی۔
کے الیکڑک انتظامیہ کا کہنا تھا کہ ہوا میں نمی کے باعث تکینکی خرابی پیدا ہوئی تھی جس کے نتیجے میں بجلی منقطع ہوئی تھی۔
